ଲଣ୍ଡନ: ଦେଶରେ ଲକଡାଉନ ପରିସ୍ଥିତି ପାଇଁ ଦୀର୍ଘ 2ମାସରୁ ଉର୍ଦ୍ଧ୍ବ ସମୟ ଧରି ଜାରି ରହିଥିଲା ଅନଲାଇନ ଶିକ୍ଷାଦାନ । ହେଲେ ସମସ୍ତେ ଏହି ସୁବିଧା ପାଇପାରିନଥିବାରୁ କେତେକ ଛାତ୍ରଛାତ୍ରୀ ଲକଡାଉନ ସମୟରେ ପାଠପଢାରୁ ବଞ୍ଚିତ ରହିଥିଲେ । ଏମାନଙ୍କ କଥା ଚିନ୍ତା କରି ପ୍ରଧାନମନ୍ତ୍ରୀ ବୋରିସ ଜନଶନ ଏକ ନୂଆ ଯୋଜନା ପ୍ରସ୍ତୁତ କରିଛନ୍ତି । 1 ବିଲିୟନ ପାଉଣ୍ଡ ବା 1.24 ବିଲିୟନ ଡଲାର ବିନିମୟରେ ଏହି ଯୋଜନା ପ୍ରସ୍ତୁତ ହୋଇଥିବା ନେଇ ଶିକ୍ଷା ବିଭାଗ ସ୍ପଷ୍ଟ କରିଛି ।
ଏହି ଯୋଜନା ଦ୍ବାରା ବର୍ତ୍ତମାନର ଆଧୁନିକ ବ୍ୟବସ୍ଥାର ଲାଭ ଉଠାଇ ପାରୁନଥିବା ଲକ୍ଷଲକ୍ଷ ଛାତ୍ରଛାତ୍ରୀଙ୍କୁ ଶିକ୍ଷା ଯୋଗାଇବାରେ ବ୍ୟବହାର କରାଯିବ । ଏହି ଛାତ୍ରଛାତ୍ରୀଙ୍କ ପାଇଁ ସ୍ବତନ୍ତ୍ର ଟ୍ୟୁସନର ବ୍ୟବସ୍ଥା କରାଯାଇ ଶିକ୍ଷାଦାନ କରାଯିବାର ଯୋଜନା ରହିଛି । ତେବେ ଏହି ଯୋଜନାରେ ଖର୍ଚ୍ଚ ହେଉଥିବା ମୋଟ ଅର୍ଥରାଶିରୁ 350 ମିଲିୟନ ପାଉଣ୍ଡ ଅର୍ଥ ଜାତୀୟ ଶିକ୍ଷାଦାନ କାର୍ଯ୍ୟକ୍ରମରେ ବ୍ୟବହାର ହେବ । ଏଥିସହ ବଳକା 650 ମିଲିୟନ ପାଉଣ୍ଡ ଅର୍ଥକୁ 2020-21 ଶିକ୍ଷାବର୍ଷ ପାଇଁ ରାଜ୍ୟସ୍ତରୀୟ ସମସ୍ତ ପ୍ରାଥମିକ ଓ ମାଧ୍ୟମିକ ବିଦ୍ୟାଳୟମାନଙ୍କରେ ସୁରକ୍ଷିତ ଶିକ୍ଷାଦାନ ପାଇଁ ବ୍ୟବହାର କରାଯିବ ।
ତେବେ ଏହି ବ୍ୟୟବରାଦରେ ବିଦ୍ୟାଳୟମାନଙ୍କରେ କିପରି ବିଭିନ୍ନ ଦିଗରେ ଅର୍ଥ ବଣ୍ଟନ ହେବ ତାହା କେବଳ ପ୍ରଧାନଶିକ୍ଷକ ବା ଶିକ୍ଷୟିତ୍ରୀ ବିଚାର କରିବେ । ଏନେଇ ପ୍ରଧାନମନ୍ତ୍ରୀ ବୋରିଶ ଜନଶନ କହିଛନ୍ତି କି ଏହି ଯୋଜନାରେ ଖର୍ଚ୍ଚ ହେବାକୁ ଥିବା ଅର୍ଥରାଶି ଦ୍ବାରା କିପରି ଅଧିକର ଅଧିକ ଛାତ୍ରଛାତ୍ରୀ ଲାଭ ପାଇପାରିବେ ତାହା ପ୍ରଧାନଶିକ୍ଷକ ବା ଶିକ୍ଷୟିତ୍ରୀଙ୍କ ଉପରେ ନିର୍ଭର କରେ । ଏହୀ ସେମାନଙ୍କ ପାଇଁ ଏକ ବଡ ଦାୟିତ୍ବ । ତେବେ ଏହି ଯୋଜନା ଦ୍ବାରା ସେପ୍ଟେମ୍ବର ସୁଦ୍ଧା ସମସ୍ତ ଛାତ୍ରଛାତ୍ରୀଙ୍କୁ ସ୍କୁଲ ଫେରାଇବାର ମଧ୍ୟ ଯୋଜନା ରହିଛି ।
ଦେଶରେ ଲକଡାଉନ ଲାଗୁ ହେବା ଦ୍ବାରା ଏପରି ଅନେକ ଛାତ୍ରଛାତ୍ରୀ ପାଠପଢାରୁ ବଞ୍ଚିତ ହୋଇଥିବା ରିପୋର୍ଟ ପ୍ରକାଶ ପାଇବା ପରେ ସରକାର ଏ ଦିଗରେ ତତ୍ପରତା ପ୍ରକାଶ କରିଥିବା ଦେଖାଯାଇଥିଲା । ଏନେଇ ଶିକ୍ଷା ସଚିବ ଗ୍ୟାଭିନ ୱିଲିୟମସନ କହିଛନ୍ତି କି ଏହି ପ୍ୟାକେଜ ଦ୍ବାରା ଜରୁରୀ ଛାତ୍ରଛାତ୍ରୀମାନଙ୍କୁ ପୁଣି ମୁଖ୍ୟସ୍ରୋତକୁ ଫେରାଇ ଆଣି ସ୍କୁଲ ଫେରାଇବାର ଯୋଜନା ରହିଛି । ଏହାର ମୂଳ ଉଦ୍ଦେଶ୍ୟ ହେଉଛି ଆଜିର ପୀଢିକୁ କୋରୋନାର ପ୍ରକୋପରୁ ବଞ୍ଚାଇ ସେମାନଙ୍କର ସୁନ୍ଦର ଭବିଷ୍ୟତ ଗଠନ ।
@IANS
