ଲଣ୍ଡନ: ତିନି ମାସ ପରେ ଇଂଲଣ୍ଡରେ ପୁଣି ଖୋଲିଛି ବାର୍, ପବ୍, ରେସ୍ତୋରାଁ ଓ ସ୍ପାର ଦ୍ବାର । କୋରୋନା ଜନିତ ସ୍ଥିତିରେ ସାମାନ୍ୟ ସୁଧାର ପରେ ଶନିବାର ଏହି ସବୁ ସେବା ଦେଶରେ ପୁଣି ଆରମ୍ଭ ହୋଇଛି । ଏପରିକି ସିନେମା ହଲ ଆଦି ମଧ୍ୟ ପୁଣି ଖୋଲିଥିବା ଜଣା ପଡିଛି । କେତେକ ସେଲୁନ ଓ ସ୍ପାରେ ଭୋରୁ ଭୋରୁ ଗ୍ରାହକଙ୍କ ଭିଡ ଜମିଥିବା ବେଳେ ଅନ୍ୟପଟେ ବାର୍ ଓ ପବ୍ରେ ସକାଳ 6ଟା ଯାଏଁ ଅପେକ୍ଷା କରିବାକୁ ପଡିଥିଲା ।
ଏଥିସହ ଦେଶରେ ଆଉଟଡୋର ଜିମ୍, ପିଲାମାନଙ୍କ ପାଇଁ ଖେଳ ପଡିଆ, ଲାଇବ୍ରେରୀ, କମ୍ୟୁନିଟି ସେଣ୍ଟର, ବିଙ୍ଗୋ ହଲ, ସଂଗ୍ରହାଳୟ, ଗ୍ୟାଲେରୀ, ଥିମ ପାର୍କ, ଆମ୍ୟୁଜମେଣ୍ଟ ଆର୍କେଡ, ଆଉଟଡୋର ସ୍କେଟିଂ ରିଙ୍କ, ସୋସିଆଲ କ୍ଲବ ଓ ମଡର୍ଣ୍ଣଭିଲେଜ ଆଦି ମଧ୍ୟ ଖୋଲିଛି । ସେହିପରି ଧାର୍ମିକ ସ୍ଥଳୀ ସମେତ ବିବାହ ଓ ଅନ୍ୟାନ୍ୟ ଉତ୍ସବରେ ବର୍ତ୍ତମାନ କେବଳ 30 ଜଣ ଅତିଥିଙ୍କ ପାଇଁ ଅନୁମତି ରହିଛି ।
ତେବେ ଦେଶରେ ନିୟମ କୋହଳ ହେବା ସହ ଲୋକଙ୍କ ଅଧିକ ଦାୟିତ୍ବବାନ ହେବାକୁ ପଡିବ ବୋଲି ପ୍ରଧାନମନ୍ତ୍ରୀ ବୋରିସ ଜନସନ ପ୍ରକାଶ କରିଛନ୍ତି । ଏଥିସହ ନାଗରିକଙ୍କୁ ଅତିକମ୍ରେ 2 ମିଟରର ସାମାଜିକ ଦୂରତା ବଜାୟ ରଖିବା ପାଇଁ ବୋରିସ ପରାମର୍ଶ ଦେଇଛନ୍ତି । ସେପଟେ ଆୟରଲାଣ୍ଡରେ ଜୁଲାଇ 10 ପରେ ରେସ୍ତୋରାଁ ଆଦି ଖୋଲିବାକୁ ଥିବା ବେଳେ ସ୍କଟଲାଣ୍ଡରେ ଜୁଲାଇ 6 ପରେ ସ୍ଥିତି ସ୍ବାଭାବିକ ହେବା ନେଇ ସୂଚନା ରହିଛି ।
@IANS
