ଲଣ୍ଡନ: ଆମେରିକା ଓ ଇଂଲଣ୍ଡରେ ନିଆଁ ପରି ବ୍ୟାପିଥିବା ଜାତିଆଣ ବିରୋଧୀ ଆନ୍ଦୋଳନରେ ଦିନକୁ ଦିନ ଯୋଡି ହେବାରେ ଲାଗିଛି ନୂଆ ଅଧ୍ୟାୟ । ଆମେରିକାରେ ଆରମ୍ଭ ହୋଇଥିବା ଏହି ଆନ୍ଦୋଳନ ଧିରେ ଧିରେ ଇଂଲଣ୍ଡକୁ ବ୍ୟାପିବାରେ ଲାଗିଥିଲା । ଇଂଲଣ୍ଡରେ କିଛି ଆନ୍ଦୋଳନରେ କିଛି ଅସାମାଜିକ ବ୍ୟକ୍ତିଙ୍କ ସମ୍ପୃକ୍ତି ଦେଶରେ ଆନ୍ଦୋଳନର ପରିଭାଷା ପରିବର୍ତ୍ତନ କରିଥିଲା । ଫଳରେ ନଷ୍ଟ ହୋଇଥିଲା ଦେଶର ଅନେକ ଜନନାୟକଙ୍କ ପ୍ରତିମୂର୍ତ୍ତୀ ।
ଏମିତିରେ ବୁଧବାର ଦେଶର ବ୍ରିଷ୍ଟଲ ସହରରେ ଥିବା ଏଡୱାର୍ଡ କୋଲଷ୍ଟୋନଙ୍କ ପ୍ରତିମୂର୍ତ୍ତୀ ସ୍ଥାନରେ ସ୍ଥାପିତ ହୋଇଥିଲା ‘ବ୍ଲାକ ଲାଇଭ୍ସ ମ୍ୟାଟର’ର ନାୟିକା ଜେନ ରୈଡଙ୍କ ପ୍ରତିମୂର୍ତ୍ତୀ । ହେଲେ ମୂର୍ତ୍ତି ସ୍ଥାପନ ହେବାର 24 ଘଣ୍ଟା ନପୂରୁଣୁ ଏହାକୁ ହଟାଇଛନ୍ତି ବ୍ରିଷ୍ଟଲ ମେୟର ମାର୍ଭିନ ରେସ । ଯାହାକୁ ନେଇ ଆନ୍ଦୋଳନକାରୀଙ୍କ ମଧ୍ୟରେ ତୀବ୍ର ଅସନ୍ତାଷ ପ୍ରକାଶ ପାଇଥିବା ଦେଖାଯାଇଛି ।
ସୂଚନା ଅନୁଯାୟୀ ଇଂଲଣ୍ଡର ବ୍ରିଷ୍ଟଲ ସହରର ମଧ୍ୟଭାଗରେ 1895 ମସିହାରୁ ସ୍ଥାପିତ ହୋଇଥିଲା ଅନୁଗାମୀଙ୍କ ବ୍ୟାପାରୀ ଏଡୱାର୍ଡ କୋଲଷ୍ଟନଙ୍କ ପ୍ରତିମୂର୍ତ୍ତୀ । ହେଲେ ତାଙ୍କର ନୀତିକୁ ବିରୋଧ କରି ଗତ ଜୁନ ମାସରେ ଜାତିଆଣ ବିରୋଧୀ ଆନ୍ଦୋଳନକାରୀମାନେ କୋଲଷ୍ଟନଙ୍କ ପ୍ରତିମୂର୍ତ୍ତୀକୁ ଯଥା ସ୍ଥାନରୁ ଖସାଇ ଆଣି ହାର୍ବର ନିକଟରେ ରଖିଥିଲେ । ପରେ ପ୍ରତିମୂର୍ତ୍ତୀକୁ ପେରୋ ବ୍ରିଜରୁ ନଦୀକୁ ଭସାଇ ଦିଆଯାଇଥିଲା । ଯାହାକୁ ପରବର୍ତ୍ତୀ ସମୟରେ ଉଦ୍ଧାର କରାଯାଇ ସଂଗ୍ରହାଳୟରେ ସ୍ଥାପନ କରାଯିବା ନେଇ ଘୋଷଣା କରାଯାଇଥିଲା ।
ଘଟଣାର ଠିକ୍ ମାସେ ପରେ ବ୍ଲାକ ଲାଉଭ୍ସ ମ୍ୟାଟର ଆନ୍ଦୋଳନକାରୀ ଜେନଙ୍କ ପ୍ରତିମୂର୍ତ୍ତୀକୁ ବିକ୍ଷୋଭକାରୀମାନେ ସ୍ଥାପନ କରିଥିଲେ । ଏହି ପ୍ରତିମୂର୍ତ୍ତୀକୁ ‘ଶକ୍ତିର ପ୍ରେରଣା’ ନାମ ଦିଆଯାଇଥିବା ବେଳେ ଏହାକୁ ପ୍ରସ୍ତୁତ କରିଥିଲେ କାରିଗର ମାର୍ସ କ୍ବିନ । ସେପଟେ ଏହି ପ୍ରତିମୂର୍ତ୍ତୀକୁ ଆନ୍ଦୋଳନ ଚାଲିଥିବା ଯାଏଁ ଅସ୍ଥାୟୀ ଭାବେ ସ୍ଥାପନ କରିବା ପାଇଁ ନିଷ୍ପତ୍ତି ନିଆଯାଇଥିଲା ।
@IANS
