ରୋମ: ଧିରେ ଧିରେ ରୋମ ସହରରେ ବଢିବାରେ ଲାଗିଛି କୋରୋନା ସଂକ୍ରମଣର ମାତ୍ରା । ଏମିତିରେ ସହରରେ ପୁନର୍ବାର ଲକଡାଉନ କଟକଣା ଲାଗୁ କରିବା ପାଇଁ ଯୋଜନା ଆରମ୍ଭ ହୋଇଥିବା ଅଧିକାରୀ ସୂତ୍ରରୁ ଜଣା ପଡିଛି । ତେବେ ସହରରେ ଲାଗୁ ହେବାକୁ ଥିବା ଏହି ଦ୍ବିତୀୟ ଲକଡାଉନ ହେବ ।
ସୂଚନା ମୁତାବକ ଇଟାଲୀର ରୋମ ସମେତ ଲାଜିଓ ପ୍ରାନ୍ତରେ କୋରୋନା ସଂକ୍ରମଣର ମାତ୍ରା ଅହେତୁକ ଭାବେ ବୃଦ୍ଧି ପାଉଥିବା ଦେଖାଯାଉଛି । ଯାହା ଏବେ ସରକାରଙ୍କ ପାଇଁ ମୁଣ୍ଡ ବ୍ୟଥାର କାରଣ ପାଲଟିଛି । ଗୋଟିଏ ପଟେ ସ୍ଥିତିରେ ସାମାନ୍ୟ ସୁଧାର ଆସିବା ପରେ ପର୍ଯ୍ୟଟନ ଓ ଅନ୍ୟ ବ୍ୟବସାୟକୁ ସ୍ବାଭାବିକ କରିବା ପାଇଁ ଯୋଜନା ଚାଲିଥିବା ବେଳେ ହଠାତ୍ ସଂକ୍ରମଣରେ ବୃଦ୍ଧି ସମସ୍ତ ଯୋଜନାକୁ ପ୍ରଭାବିତ କରିଥିବା ଦେଖାଯାଇଛି ।
ତେବେ ସହରରେ ବଢୁଥିବା ସଂକ୍ରମଣକୁ ନଜରରେ ରଖି ଆବଶ୍ୟକସ୍ଥଳରେ ଦ୍ବିତୀୟ ଥର ପାଇଁ ଲକଡାଉନ କଟକଣା ଜାରି କରାଯିବା ନେଇ ଲାଜିଓ ଅଧିକାରୀ ବିଧିବଦ୍ଧ ଭାବେ ବୁଧବାର ଘୋଷଣା କରିଛନ୍ତି । ରବିବାର ସହରରେ 17ଟି ନୂଆ ମାମଲା ଚିହ୍ନଟ ହୋଇଥିଲା । ଯେଉଁଥିରୁ 10 ଜଣ ବାହାର ଦେଶରୁ ବା ରାଜ୍ୟରୁ ଫେରିଥିବା ଜଣା ପଡିଛି । ଏନେଇ ବୁଧବାର ଲାଜିଓର ସ୍ବାସ୍ଥ୍ୟ କମିଶନର ଆଲେସୋ ଡି’ଅମାଟୋ ଏକ ଫେସବୁକ ପୋଷ୍ଟରେ କହିଥିଲେ କି ସହରରେ ସମସ୍ତ ନାଗରିକଙ୍କୁ ମାସ୍କର ବ୍ୟବହାର ଉପରେ ଗୁରୁତ୍ବ ଦେବାକୁ ହେବ । ନଚେତ୍ ପୁଣି ପୁରୁଣା କଟକଣା ବଳବତ୍ତର ହେବ । ତେଣୁ ଆଜି ଯାଏଁ ସ୍ଥିତି ସୁଧାରିବା ପାଇଁ ହୋଇଥିବା ପରିଶ୍ରମକୁ ବୃଥା ନକରି ଲୋକେ ସତର୍କ ହେବାର ଆବଶ୍ୟକତା ରହିଥିବା ସେ କହିଥିଲେ ।
ତେବେ ୟୁରୋପରେ କୋରୋନା ଦ୍ବାରା ସର୍ବାଧିକ ପ୍ରଭାବିତ ଦେଶ ମଧ୍ୟରେ ଇଟାଲୀ ସ୍ଥାନ ପାଇଥିବା ବେଳେ ଏଠାରେ ଆଜି ଯାଏଁ ମୋଟ 245,032 ଜଣ ଆକ୍ରାନ୍ତ ହୋଇଥିବା ବେଳେ ମୃତ୍ୟୁ ସଂଖ୍ୟା 30,082ରେ ପହଞ୍ଚିଥିବା ଜଣା ପଡିଛି ।
@IANS
