ଲଣ୍ଡନ: ୟୁକେରେ ଜାରି ରହିଥିବା 2 ମିଟରର ସାମାଜିକ ଦୂରତ୍ବ ନିୟମ କେତେ ଦୂର ଠିକ୍, ସେନେଇ ଜାରି ରହିଛି ସମୀକ୍ଷା । ପ୍ରଧାନମନ୍ତ୍ରୀ ବୋରିସ ଜନସନଙ୍କ ପ୍ରତ୍ୟକ୍ଷ ତତ୍ତ୍ବାବଧାନରେ ଏହି ସମୀକ୍ଷା ଚାଲିଥିବା ବେଳେ ଏହି ପ୍ରକ୍ରିୟା ବର୍ତ୍ତମାନ ଶେଷ ପର୍ଯ୍ୟାୟରେ ପହଞ୍ଚିଛି । ଏନେଇ ସୂଚନା ଦେଇଛନ୍ତି ୟୁକେ ସାଂସ୍କୃତିକ ସଚିବ ଅଲିଭର ଡାଉଡେନ ।
ଡାଉଡେନ ଗଣମାଧ୍ୟମକୁ ସୂଚନା ଦେଇ କହିଛନ୍ତି କି ସରକାରଙ୍କ ଦ୍ବାରା ଚାଲିଥିବା ଏହି ସମୀକ୍ଷା ପ୍ରକ୍ରିୟା ଆଗାମୀ କିଛି ଦିନ ମଧ୍ୟରେ ସମାପ୍ତ ହେବ । ବର୍ତ୍ତମାନ ଲାଗୁ ରହିଥିବା 2 ମିଟରର ସାମାଜିକ ଦୂରତ୍ବ ନିୟମ ଦେଶରେ ଅନେକ ବ୍ୟବସାୟ ପ୍ରତି ବିପଦ ସୃଷ୍ଟି କରିବା ସହ ଅନେକ କ୍ଷେତ୍ରରେ ଏହା ସମ୍ଭବ ନୁହେଁ ବୋଲି ବିରୋଧୀମାନେ ସ୍ବର ଉତ୍ତୋଳନ କରିଥିଲେ । ସେପଟ ବିଶ୍ବ ସ୍ବାସ୍ଥ୍ୟ ସଙ୍ଗଠନ ମଧ୍ୟ 1.5ମିଟର ବ୍ୟବଧାନର ସାମାଜିକ ଦୂରତ୍ବ କଟକଣା ଲାଗୁ ପାଇଁ ଗାଇଡଲାଇନ ଜାରି କରିଥିଲେ ।
ଏହି କ୍ରମରେ ସରକାର ଲାଗୁ ନିୟମର ସମୀକ୍ଷା ଆରମ୍ଭ କରିଥିଲେ । ଗତ ଜୁନ 22ରୁ ଦେଶରେ ପବ୍, ରେସ୍ତୋରାଁ ଓ କ୍ୟାଫେ ଆଦି ଖୋଲିଥିବା ବେଳେ ଏହି ସାମାଜିକ ଦୂରତ୍ବ ନିୟମ ସେମାନଙ୍କ ବ୍ୟବସାୟକୁ କିପରି ପ୍ରଭାବିତ କରୁଛି ତାହାର ସମୀକ୍ଷା ଜାରି ରହିଛି । ସେପଟେ ଜୁନ 14ରୁ ପ୍ରଧାନମନ୍ତ୍ରୀ ବୋରିସ ଜନସନଙ୍କ ତତ୍ତ୍ବାବଧାନରେ ଆରମ୍ଭ ହୋଇଥିବା ଏହି ସମୀକ୍ଷାରେ ଦେଶରେ ପର୍ଯ୍ୟାୟକ୍ରମେ କୋହଳ ହେଉଥିବା କଟକଣା ପରେ ସାମାଜିକ ଦୂରତ୍ବ ନିୟମ କ’ଣ ପ୍ରଭାବ ପକାଉଛି ତାହା ଅନୁଧ୍ୟାନ କରାଯାଉଛି ।
ବର୍ତ୍ତମାନ ସୁଦ୍ଧା ଏହି ନିୟମରେ ପରିବର୍ତ୍ତନ ନେଇ କୌଣସି ସୂଚନା ରହିନାହିଁ । ତେବେ ଆଗାମୀ ପଦକ୍ଷେପ କ’ଣ ରହିବ ତାହା ସମୀକ୍ଷାର ଅନ୍ତରେ ହିଁ ଜଣା ପଡିବ ।
@IANS
