ଲଣ୍ଡନ: ଜୁନ 22 ସୁଦ୍ଧା ଦେଶର ସମସ୍ତ ପବ୍ କାର୍ଯ୍ୟକାରୀ ହେବା ନେଇ ୟୁକେ ପ୍ରଧାନମନ୍ତ୍ରୀ ବୋରିସ ଜନଶନ ସୋମବାର ସ୍ପଷ୍ଟ କରିଛନ୍ତି । ଦେଶରେ 3,500,000 ଚାକିରୀ ବଞ୍ଚାଇବାକୁ ଯାଇ ଏପରି ନିଷ୍ପତ୍ତି ନେଇଥିବା ବୋରିସ ପ୍ରକାଶ କରିଛନ୍ତି । ଶନିବାର ଓ ରବିବାର ଏସମ୍ପର୍କରେ ଗୁରୁତ୍ବପୂର୍ଣ୍ଣ ଆଲୋଚନା ପରେ ବୋରିଶ ଦେଶକୁ ଜୁଲାଇ ସୁଦ୍ଧା ସ୍ବାଭାବିକ ସ୍ଥିତିକୁ ଫେରାଇବାକୁ ଜୋରସୋର ଚେଷ୍ଟା ଆରମ୍ଭ କରିଛନ୍ତି ।
କିଛି ଦିନ ତଳେ ଦେଶର ବାଣିଜ୍ୟ ସଚିବ ଆଲୋକ ଶର୍ମା ସରକାରଙ୍କୁ ଦେଶରେ ଲକଡାଉନ ଜନିତ ବେରୋଜଗାରୀ ସୃଷ୍ଟି ନେଇ ସତର୍କ କରାଇଥିଲେ । ଯାହା ବୋରିସଙ୍କୁ ଚିନ୍ତାରେ ପକାଇବା ସହ ତ୍ବରିତ ଭାବେ କିଛି ପଦକ୍ଷେପ ନେବା ପାଇଁ ବାଧ୍ୟ କରିଥିଲା । ଏନେଇ ସେ ‘ସେଭ ସମର୍ ସିକ୍ସ’ ନାମକ ଏକ ଦଳ ପ୍ରସ୍ତୁତ କରିଛନ୍ତି । ଏହି ଦଳକୁ ଆସନ୍ତା ମାସେ ମଧ୍ୟରେ ଦେଶର ଅର୍ଥନୀତିକୁ ସ୍ବାଭାବିକ କରାଇବାର ଦାୟିତ୍ବ ଦିଆଯାଇଛି ।
ପୂର୍ବରୁ ଦେଶର ପବ୍, ବାର ଓ ରେସ୍ତୋରାଁ ଆଦି ଜୁଲାଇ 4 ପୂର୍ବରୁ ନଖୋଲିବା ପାଇଁ ନିର୍ଦ୍ଦେଶ ରହିଥିଲା । କିନ୍ତୁ ପାର୍ସଲ ସର୍ଭିସ ପାଇଁ ଏ ସମସ୍ତଙ୍କୁ ଅନୁମତି ରହିଥିଲା । ହେଲେ ବେରୋଜଗାର ଚିନ୍ତାରେ ବୋରିସଙ୍କ ଦ୍ବାରା ଗଠିତ ଦଳ ଜୁନ 22 ସୁଦ୍ଧା ସମସ୍ତ ପବ୍ ଖୋଲିବା ପାଇଁ ନିଷ୍ପତ୍ତି ନେଇଛନ୍ତି । ତେବେ କୋରୋନା ମାଡରେ ଦେଶର ଆତିଥ୍ୟତା ସେବା ବିଶେଷ ପ୍ରଭାବିତ ହୋଇଥିବା ବୋରିସ ହୃଦବୋଧ କରିଛନ୍ତି । ମାର୍ଚ୍ଚ 16ରେ ଦେଶରେ ଏହି ସେବା ବନ୍ଦ ଥିବା ବେଳେ ଏହି କ୍ଷେତ୍ରରେ ସର୍ବାଧିକ ବେରୋଜଗାର ସ୍ଥିତି ସୃଷ୍ଟି ହେବାର ଆଶଙ୍କା ଦେଖା ଦେଇଛି ।
@IANS
