ଲଣ୍ଡନ: ଆଉ ସପ୍ତାହେ ପରେ ବ୍ରିଟେନରେ କୋହଳ ହେବ ଲକଡାଉନ ନିୟମ । ଏନେଇ ମନ୍ତ୍ରୀ ଓ ଡାକ୍ତରଙ୍କ ସହ ବିଚାର ବିମର୍ସ ପରେ ପ୍ରଧାନମନ୍ତ୍ରୀ ବୋରିଶ ଜନଶନ ଘୋଷଣା କରିବେ ବୋଲି ଜଣାପଡିଛି । ରବିବାର ଗଣମାଧ୍ୟମକୁ ସୂଚନା ଦେଇ ଏହା ପ୍ରକାଶ କରିଛନ୍ତି କ୍ୟାବିନେଟ ମନ୍ତ୍ରୀ ମାଇକେଲ ଗୋଭ । ପ୍ରଧାନମନ୍ତ୍ରୀଙ୍କ ପକ୍ଷରୁ ଗୋଭ ଏହା ମଧ୍ୟ କହିଛନ୍ତି ଦେଶର ଅର୍ଥନୀତି ପୂର୍ବାବସ୍ଥାକୁ ଫେରିବାର ସମୟ ଆସିଛି ବୋଲି ବୋରିଶ ପ୍ରକାଶ କରିଛନ୍ତି ।
ମାର୍ଚ୍ଚ 23ରୁ ଲକଡାଉନ ଓ ସାମାଜିକ ଦୂରତା ମାନି ଆସୁଥିବା ବ୍ରିଟେନରେ ଆଗାମୀ ସପ୍ତାହରେ କିପରି ନିୟମ କୋହଳ ହେବ ସେ ନେଇ ବୋରିଶ ଚିନ୍ତା କରୁଛନ୍ତି । ସାମାଜିକ ଦୂରତା କେତେ ଦୂର ବଳବତ୍ତର ରହିବ ତାହା ମଧ୍ୟ ସେ ନିଷ୍ପତ୍ତି ନେବେ ବୋଲି ଗୋଭ କହିଛନ୍ତି । ତେବେ ଆଗାମୀ ଦିନରେ ଦେଶର ଅର୍ଥନୀତି କିପରି ସଶକ୍ତ ହେବ, କିପରି ପିଲାମାନେ ପୁଣି ସ୍କୁଲ ଯିବେ ଓ କର୍ମଚାରୀମାନେ କିପରି କର୍ମସ୍ଥଳକୁ ଫେରିପାରିବେ ତାହା ଆଲୋଚନାର ମୁଖ୍ୟ ଦିଗ ରହିବ ବୋଲି ଜଣାପଡିଛି । ହେଲେ ଦେଶରେ ଲକଡାଉନ କୋହଳ ପାଇଁ ଦେଶକୁ ନିର୍ଦ୍ଧାରିତ 5ଟି ଦିଗରେ ସଫଳ ହେବାକୁ ପଡିବ ବୋଲି ମଧ୍ୟ ଗୋଭ କହିଛନ୍ତି ।
ବ୍ରିଟେନ ସରକାର ଦ୍ବାରା ନିର୍ଦ୍ଧାରିତ ଏହି 5ଟି ଦିଗ ମଧ୍ୟରେ ରହିଛି ଆକ୍ରାନ୍ତ ସଂଖ୍ୟାରେ ହ୍ରାସ, ମୃତ୍ୟୁ ସଂଖ୍ୟାରେ ଅବନତି ଓ ପ୍ରତ୍ୟେକ ପରିସ୍ଥିତି ପାଇଁ ଜାତୀୟ ସ୍ବାସ୍ଥ୍ୟ ସେବାର ପର୍ଯ୍ୟାପ୍ତ ପ୍ରସ୍ତୁତି । ଏନେଇ ଦେଶର ସ୍ବାସ୍ଥ୍ୟ ଏକ୍ସପର୍ଟ, କର୍ମଚାରୀ ଓ ବିଭିନ୍ନ ବର୍ଗର ଲୋକଙ୍କ ମତାମତ ଲୋଡିଛନ୍ତି ବୋରିଶ । ବିଭିନ୍ନ ଦିଗର ସ୍ଥିତି ପରଖିବା ପରେ ପଦକ୍ଷେପ ଗ୍ରହଣ କରାଯିବ । ସେପଟେ ପରିବର୍ଦ୍ଧିତ ଲକଡାଉନ ଅବଧି ଲୋକଙ୍କ ମାନସିକ ଓ ଶାରିରୀକ ସ୍ବାସ୍ଥ୍ୟ ଉପରେ ପ୍ରଭାବ ପକାଉଥିବା ହୃଦବୋଧ କରିଛନ୍ତି ବୋରିଶ । କିନ୍ତୁ ସ୍ଥିତି ନସୁଧୁରିବା ସମୟରେ କୌଣସି ପଦକ୍ଷେପ ନେବା ମୁର୍ଖାମୀ ହେବ ବୋଲି କହିଛନ୍ତି ଗୋଭ । ଯାହା ଦେଶରେ ଦ୍ବିତୀୟ ଥର ପାଇଁ ବିପତ୍ତିକୁ ଡାକିବ ନିଶ୍ଚୟ ।
ବର୍ତ୍ତମାନ ବ୍ରିଟେନରେ କୋରୋନା ଆକ୍ରାନ୍ତ ସଂଖ୍ୟା 1,87,842 ରହିଥିବା ବେଳେ ମୃତ୍ୟୁ ସଂଖ୍ୟା 28,520ରେ ସ୍ଥିର ରହିଛି ।
@IANS
