ୱାର୍ସ: ପୋଲାଣ୍ଡରେ ଶେଷ ହୋଇଛି ରାଷ୍ଟ୍ରପତି ନିର୍ବାଚନ । ଏଥିରେ ପୁଣି ବାଜିମାତ କରିଛନ୍ତି ରାଷ୍ଟ୍ରପତି ଆଣ୍ଡ୍ରେଜେ ଡୁଡା । ଏଥିସହ ଦେଶରେ ନିଜର ଦ୍ବିତୀୟ ପାଳି ଆରମ୍ଭ କରିଛନ୍ତି ଆଣ୍ଡ୍ରେଜେ । ବିରୋଧୀ ସମର୍ଥିତ ପ୍ରତିଦ୍ବନ୍ଦୀ ତଥା ୱାର୍ସ ମେୟର ରାଫାଲ ଟ୍ରାଜାସ୍କୋସ୍କି ବିରୋଧରେ ନିର୍ବାଚନ ଜିତି ଆଣ୍ଡେଜେ ଦେଶରେ ନିଜର ଦ୍ବିତୀୟ ପାଳି ଆରମ୍ଭ କରିଥିବା ସୁନିଶ୍ଚିତ କରିଛନ୍ତି । ଏନେଇ ସୋମବାର ସୂଚନା ଦେଇଛି ଜାତୀୟ ନିର୍ବାଚନ କମିଶନ (ପିକେଡବ୍ଲୁ) ।
ଚଳିତ ନିର୍ବାଚନରେ ଆଣ୍ଡ୍ରେଜେ ଗଭର୍ଣ୍ଣିଂ ଲ’ ଓ ଜଷ୍ଟିସ ପାର୍ଟିର ସମର୍ଥନରେ ପ୍ରତିଦ୍ବନ୍ଦ୍ବିତା କରିଥିଲେ । ଏଥିରେ ସେ 51.21 ପ୍ରତିଶତ ଭୋଟରେ ସେ ବାଜିମାତ କରିଥିଲେ । ଅପରପକ୍ଷରେ ପ୍ରତିଦ୍ବନ୍ଦିତା କରୁଥିବା ଟ୍ରାଜାସ୍କୋସ୍କି ମାତ୍ର 48.79 ପ୍ରତିଶତ ଭୋଟରେ ପରାଜୟ ବରଣ କରିଛନ୍ତି । ଏନେଇ ପିକେଡବ୍ଲୁ ମୁଖ୍ୟ ସିଲୱେଷ୍ଟର ମାର୍କିନିଆକଙ୍କ କହିବା ଅନୁଯାୟୀ ୱାର୍ସ ସମେତ 5ଟି ବାଲଟ ବିଦେଶରେ ଅନୁଷ୍ଠିତ ହୋଇଥିବା ବେଳେ ଏହା ଫଳାଫଳକୁ ବିଶେଷ ପ୍ରଭାବିତ କରିବ ନାହିଁ ।
ସେପଟେ ଏକ୍ସିଟ ପୋଲ ଅନୁଯାୟୀ ଡୁଡାଙ୍କ ବିଜୟ ନେଇ ମାତ୍ର 0.8 ପ୍ରତିଶତ ସମ୍ଭାବନା ରହିଥିଲା । ହେଲେ ବିଳମ୍ବରେ ହୋଇଥିବା କ୍ରମାଗତ ଦୁଇଟି ମତଦାନ ପ୍ରକ୍ରିୟା ଡୁଡାଙ୍କ ବିଜୟ ସମ୍ଭାବନାକୁ 2 ପ୍ରତିଶତ ବୃଦ୍ଧି କରିବାରେ ସାହାଯ୍ୟ କରିଥିଲା । ଯାହା ତଳିତ ନିର୍ବାଚନରେ ତାଙ୍କର ବିଜୟ ସହ ଦେଶରେ ଦ୍ବିତୀୟ ଶାସନ ପାଳିକୁ ସୁନିଶ୍ଚିତ କରିଥିଲା । ସେପଟେ ନିର୍ବାଚନ ଲଢେଇକୁ ଶେଷ କରିବା ସହ ନିଜ ବିଜୟ ପାଳନ କରିବା ପାଇଁ ଡୁଡା ନିଜ ପ୍ରତିଦ୍ବନ୍ଦୀ ଟ୍ରାଜାସ୍କୋସ୍କି ଓ ତାଙ୍କ ପତ୍ନୀଙ୍କୁ ରାଷ୍ଟ୍ରପତି ଭବନକୁ ନିମନ୍ତ୍ରଣ କରିଥିଲେ । ଏଠାରେ ଉଭୟେ କରମର୍ଦ୍ଦନ କରିବା ସହ ଏକ ନୂଆ ପାଳିର ଘୋଷଣା କରିଥିଲେ ଡୁଡା ।
ସୂଚନା ମୁତବାକ ଗତ ମେ’ 10ରୁ ଦେଶରେ ରାଷ୍ଟ୍ରପତି ନିର୍ବାଚନ ପ୍ରକ୍ରିୟା ଆରମ୍ଭ ହୋଇଥିବା ବେଳେ କୋରୋନା ମହାମାରି ପାଇଁ ଏହି ପ୍ରକ୍ରିୟାରେ ବିଳମ୍ବ ହୋଇଥିଲା । ବର୍ତ୍ତମାନ ସୁଦ୍ଧା ଦେଶରେ ଆକ୍ରାନ୍ତ ସଂଖ୍ୟା 37,891ରେ ପହଞ୍ଚିଥିବା ବେଳେ ମୃତ୍ୟୁ ସଂଖ୍ୟା 1571ରେ ପହଞ୍ଚିଥିବା ଜଣା ପଡିଛି ।
@IANS
