ଲଣ୍ଡନ: ଖୁବ ଶୀଘ୍ର ଲଣ୍ଡନରେ ସ୍ବାଭାବିକ ହେବାକୁ ଯାଉଛି ଶିକ୍ଷା ବ୍ୟବସ୍ଥା । ଏନେଇ ସୋମବାର ପ୍ରଧାନମନ୍ତ୍ରୀ ବୋରିଶ ଜନଶନ ସୂଚନା ଦେଇଛନ୍ତି । ସୂଚନା ମୁତାବକ ଦେଶରେ ସମସ୍ତ ପ୍ରାଥମିକ ବିଦ୍ୟାଳୟ ଜୁନ ପହିଲାରୁ ଖୋଲିବାକୁ ଥିବା ବେଳେ ମାଧ୍ୟମିକ ବିଦ୍ୟାଳୟ ସବୁ ଜୁନ 15 ସୁଦ୍ଧା ଖୋଲାଯିବ । ସେହିପରି ପ୍ରାଥମିକ ବିଦ୍ୟାଳୟରେ ପ୍ରଥମ ଓ ଷଷ୍ଠ ଶ୍ରେଣୀର ପିଲାମାନେ ପ୍ରଥମେ ସ୍କୁଲ ଯିବା ନେଇ ନିଷ୍ପତ୍ତି ହୋଇଛି ।
ଡାଉନିଂ ଷ୍ଟ୍ରିଟରେ ଦୈନନ୍ଦିନ କୋଭିଡ-19 ସ୍ଥିତି ବିବରଣୀ ଦେବା ସମୟରେ ଏହା ପ୍ରକାଶ କରିଥିଲେ ବୋରିଶ । ସେ ଏହା ମଧ୍ୟ କହିଛନ୍ତି କି ଖୁବଶୀଘ୍ର ଦେଶ ଦ୍ବିତୀୟ ପର୍ଯ୍ୟାୟ ଲକଡାଉନ କୋହଳ ନୀତିକୁ ଉନ୍ନୀତ ହେବ । ଏନେଇ ଦେଶରେ ବିଦ୍ୟାଳୟଗୁଡିକ ଖୋଲିବା ପାଇଁ ନିଷ୍ପତ୍ତି ନିଆଯାଇଛି । ଅନ୍ୟ ଦେଶମାନେ ଧିରେ ଧିରେ ସ୍ବାଭାବିକ ହେବାକୁ ଯାଇ ବିଦ୍ୟାଳୟମାନ ଖୋଲୁଥିବା ବେଳେ ଲଣ୍ଡନରେ ମଧ୍ୟ ଛାତ୍ରଛାତ୍ରୀଙ୍କ ଭବିଷ୍ୟତକୁ ନଜରରେ ରଖି ବିଦ୍ୟାଳୟ ଖୋଲାଯିବ ।
ସମାନ ଭାବେ ଜୁନ 15ରୁ ମାଧ୍ୟମିକ ଶିକ୍ଷାର ଦଶମ ଓ ଦ୍ବାଦଶ ଶ୍ରେଣୀର ଛାତ୍ରଛାତ୍ରୀ ସ୍କୁଲ ଫେରିବା ନେଇ ସ୍ପଷ୍ଟ କରାଯାଇଛି । ହେଲେ ଏସମସ୍ତ ପଦକ୍ଷେପ ସହ ପିଲାମାନଙ୍କୁ ସୁରକ୍ଷା ପଦକ୍ଷେପ ଯଥା ମାସ୍କ, ସାନିଟାଇଜର ଓ ଗ୍ଲୋବ୍ସ ପିନ୍ଧିବା ବାଧ୍ୟତାମୂଳକ କରାଯାଇଛି । ଏନେଇ ବିଦ୍ୟାଳୟର ଶିକ୍ଷକ ଶିକ୍ଷୟିତ୍ରୀଙ୍କ ସହ ଆଲୋଚନା ପରେ ଶିକ୍ଷା ସଚିବ ଗାଭିନ ୱିଲିୟମସନ ଏହା ଘୋଷଣା କରିଛନ୍ତି । ଏନେଇ ବୋରିଶ କହିଛନ୍ତି କି ଦେଶର ସମସ୍ତ ସ୍କୁଲ ବର୍ତ୍ତମାନ ଖୋଲିବା ପରିସ୍ଥିତିରେ ନଥିଲେ ସରକାର ଏହି ସ୍କୁଲଗୁଡିକୁ ସ୍ବାଭାବିକ ହେବାରେ ସାହାଯ୍ୟ କରିବ ।
@IANS
