ସିଓଲ: ତିକ୍ତ ହେବାରେ ଲାଗିଥିବା ଅନ୍ତଃକୋରିଆନ ସମ୍ପର୍କ ପାଇଁ ନିଜକୁ ଦାୟୀ କରି ପଦ ଛାଡିଛନ୍ତି ଏକତ୍ରୀକରଣ ଦାୟିତ୍ବରେ ଥିବା ମନ୍ତ୍ରୀ କିମ୍ ୟେଓନ-ଚୁଲ । ଲଗାତାର କିଛି ଦିନ ଧରି ଉଭୟ ଉତ୍ତର ଓ ଦକ୍ଷିଣ କୋରିଆ ମଧ୍ୟରେ ସମ୍ପର୍କରେ ତିକ୍ତତା ବଢିଚାଲିଥିବା ବେଳେ 2018 ମସିହାରେ ସ୍ବାକ୍ଷରିତ ଚୁକ୍ତିରେ ସମ୍ପୃକ୍ତ ଦାୟିତ୍ବରେ ଥିବା କିମ୍ ନିଜକୁ ଦାୟୀ କରିଛନ୍ତି । ଏନେଇ ସେ ରାଷ୍ଟ୍ରପତି ମୁନ ଜୈ-ଇନଙ୍କୁ ନିଜ ଇସ୍ତଫା ପତ୍ର ହସ୍ତାନ୍ତର କରିଛନ୍ତି ।
ଏନେଇ ସରକାରୀ ମୁଖପାତ୍ର କାଙ୍ଗ ମିନ-ସେଓକଙ୍କ କହିବା ଅନୁଯାୟୀ ରାଷ୍ଟ୍ରପତି ମୁନ ଗୁରୁବାର କିମ୍ଙ୍କ ସହ ରାତ୍ରିଭୋଜନରେ ଏସମ୍ପର୍କରେ ଆଲୋଚନା କରିଥିଲେ । କିମ୍ଙ୍କର ଏପରି ନିଷ୍ପତ୍ତି ପଛର ପ୍ରକୃତ କାରଣ କ’ଣ ଓ ଏପରି କରିବାର ଉଦ୍ଦେଶ୍ୟ କ’ଣ ରହିଛି ବୋଲି ମୁନ ଏହି ସମୟରେ ତାଙ୍କୁ ପଚାରି ବୁଝିଥିଲେ । ହେଲେ କିମ୍ଙ୍କ ପଦ ଛାଡିବା ପରେ ଏହି ସ୍ଥାନର ପରବର୍ତ୍ତୀ ଅଧିକାରୀ କିଏ ହେବ ସେନେଇ କାଙ୍ଗ କୌଣସି ସୂଚନା ଦେଇନଥିଲେ । ତେବେ ମୁନ କିମ୍ଙ୍କ ଇସ୍ତଫା ପତ୍ର ଗ୍ରହଣ କରିଥିବା ସେ ସ୍ପଷ୍ଟ କରିଥିଲେ ।
ବର୍ତ୍ତମାନ ଉପ ଏକତ୍ରୀକରଣ ମନ୍ତ୍ରୀ ଭାବେ ସୁହ ହୋ କାର୍ଯ୍ୟରତ ରହିଛନ୍ତି । ପରବର୍ତ୍ତୀ ଅଧିକାରୀ କାଙ୍ଗଙ୍କ ଦାୟିତ୍ବ ନେବା ପର୍ଯ୍ୟନ୍ତ ସୁହ ଏହି ଦାୟିତ୍ବ ତୁଲାଇବା ନେଇ ଜଣା ପଡିଛି । ତେବେ କିମ୍ଙ୍କ ସ୍ଥାନ ନେବା ପାଇଁ ଓକିଲ ଲି ଇନ-ୟଙ୍ଗ ଓ ମୁନଙ୍କ ପୂର୍ବତନ ମୁଖ୍ୟ ସହଯୋଗୀ ଇମ ଜଙ୍ଗ-ସେଓକ ଦାବିଦାର ରହିଥିବା ଜଣାଯାଇଛି ।
ସୂଚନା ମୁତାବକ କୈସଙ୍ଗଠାରେ ଥିବା ଅନ୍ତଃକୋରିଆନ ମିଳିତ ଯୋଗାଯୋଗ କାର୍ଯ୍ୟାଳୟକୁ ଉତ୍ତର କୋରିଆ ନଷ୍ଟ କରିବା ପରେ ଉଭୟ ଦେଶ ମଧ୍ୟରେ ଜଟିଳ ପରିସ୍ଥିତି ସୃଷ୍ଟି ହୋଇଛି । ସେପଟେ ଗୁରୁବାର ଅନେକ ସେନାବିହୀନ ଅଞ୍ଚଳରେ ସେନା ମୁତୟନ କରି ଉତ୍ତର କୋରିଆ ଯୁଦ୍ଧ ପାଇଁ ଇଙ୍ଗିତ କରୁଥିବା ଦେଖାଯାଇଛି ।
@IANS
