କାବୁଲ: ଆଫଗାନିସ୍ତାନରେ ସୁରକ୍ଷାକର୍ମୀଙ୍କୁ ପୁଣି ଟାର୍ଗେଟ କଲେ ତାଲିବାନ ଆତଙ୍କବାଦୀ । ଆଫଗାନିସ୍ତାନର ଉତ୍ତର-ପଶ୍ଚିମ ବାଗିସ୍ ପ୍ରଦେଶରେ ଏକ ରାସ୍ତା କଡରେ ବୋମା ବିସ୍ଫୋରଣ ଘଟିଛି । ଘଟଣାରେ ଜଣେ ଶିଶୁ ସମେତ ତିନି ଜଣ ସାଧାରଣ ନାଗରିକ ପ୍ରାଣ ହରାଇଛନ୍ତି । ଶନିବାର ସକାଳୁ ଏହି ବୋମା ବିସ୍ଫୋରଣ ଘଟିଥିବା ସୂଚନା ମିଳିଛି ।
ଏହି ବିସ୍ଫୋରଣ କାଲା-ଏ-ନାୱ ଅଞ୍ଚଳ ଏବଂ ଅବକାମାରି ଜିଲ୍ଲା ଖୁଦାଇଦାଡ ତାଇୟାବ ମଧ୍ୟରେ ଥିବା ରାଜପଥରେ ଘଟିଛି ବୋଲି ଅବକାମାରି ଜିଲ୍ଲା ମୁଖ୍ୟ କହିଛନ୍ତି । ତେବେ ସୁରକ୍ଷାକର୍ମୀଙ୍କୁ ଟାର୍ଗେଟ କରିବା ପାଇଁ ତାଲିବାନ ଆତଙ୍କବାଦୀଙ୍କ ଦ୍ବାରା ଏହି ବୋମା ଖଞ୍ଜା ଯାଇଥିଲା । ଘଟଣାରେ ଜଣେ ଶିଶୁ, ଜଣେ ମହିଳା ଏବଂ ଜଣେ ବ୍ୟକ୍ତିଙ୍କର ମୃତ୍ୟୁ ଘଟିଛି । ସେପଟେ ତାଲିବାନ ଏବେସୁଦ୍ଧା ଘଟଣାପାଇଁ ନିଜକୁ ଦାୟୀ କରିନାହିଁ ।
