ବ୍ୟାଙ୍ଗକକ୍: ସମୟ ଥିଲା ପର୍ଯ୍ୟଟକଙ୍କ ପାଇଁ ଛୁଟି କାଟିବାର ଏକ ମନ ପସନ୍ଦର ସ୍ଥାନ ଥିଲା ଥାଇଲାଣ୍ଡ । ହେଲେ ଏବେ କୋରୋନା ପ୍ରକୋପରେ ଖାଲି ପଡିଛି ଏହି ପର୍ଯ୍ୟଟନସ୍ଥଳୀ । ବିଶେଷକରି ମନୋରଞ୍ଜନର ଖୋରାକ ଯୋଗାଉଥିବା ଏହି ସ୍ଥାନରେ ଏବେ ବନ୍ଦ ହୋଇଛି ସମସ୍ତ ଦ୍ବୀପ ଓ ଏଠାରେ ଥିବା ବାର, ହୋଟେଲ ଓ ରେସ୍ତୋରାଁ । ଏନେଇ ଫୁକେଟ ପ୍ରାନ୍ତୀୟ ରାଜ୍ୟପାଳ ସୁଫୋଟ ରୋଦ୍ରୁଆଙ୍ଗ ଘୋଷଣା କରିଛନ୍ତି କି ପରିସ୍ଥିତିରେ ସୁଧାର ନଆସିବା ଯାଏଁ ସମସ୍ତ କର୍ମଚାରୀମାନେ ନିଜ ଘରକୁ ଯାଇପାରିବେ ।
ଏହି ଘୋଷଣା ଆଧାରରେ ଶୁକ୍ରବାର ପ୍ରାୟ 5000 କର୍ମଚାରୀ ହୋଟେଲ, ବାର ଓ ରେସ୍ତୋରାଁ ଛାଡି ନିଜ ଘରକୁ ଫେରିଥିବା ବେଳେ ଆଗାମୀ କିଛି ଦିନରେ ଅନ୍ୟ 15 ହଜାର କର୍ମଚାରୀଙ୍କୁ ଫୁକେଟ ଖାଲି କରିବା ପାଇଁ ନିର୍ଦ୍ଦେଶ ଦିଆଯାଇଛି । ତେବେ ପରିସ୍ଥିତିରେ ସୁଧାର ନଆସିବା ଯାଏଁ ଏହି କର୍ମଚାରୀମାନେ କର୍ମକ୍ଷେତ୍ରକୁ ନଫେରିବା ପାଇଁ ମଧ୍ୟ କଡା ନିର୍ଦ୍ଦେଶ ରହିଛି ।
ଅନ୍ୟପଟେ ବର୍ତ୍ତମାନ ବିମାନ ଓ ରେଳ ସେବା ବନ୍ଦ ଥିବାରୁ କର୍ମଚାରୀମାନଙ୍କୁ ସଡକ ପଥ ଦେଇ ଘରକୁ ଫେରିବା ପାଇଁ କୁହାଯାଇଛି । ତେବେ ମେ 15 ଯାଏଁ ବିପଦ ସ୍ତରରେ ହ୍ରାସର କୌଣସି ସୂଚନା ନଥିବାରୁ ସେପର୍ଯ୍ୟନ୍ତ ସମସ୍ତ ଦୋକାନ ବଜାର, ବାର ଆଦି ବନ୍ଦ ରହିବାର ନିଷ୍ପତ୍ତି ନିଆଯାଇଛି । ସେପଟେ ବିପଦ ସଙ୍କେତରେ ବ୍ୟାଙ୍ଗକକ୍ ଓ ଫୁକେଟ ଥିବାରୁ ଏହି ଦୁଇ ସ୍ଥାନରେ ନିୟମକୁ କଡାକଡି କରାଯାଇଛି ।
ସୂଚନା ଅନୁଯାୟୀ ଥାଇଲାଣ୍ଡରେ 2966 ଆକ୍ରାନ୍ତ ରହିଥିବା ବେଳେ 54 ଜଣଙ୍କର ମୃତ୍ୟୁ ହୋଇଛି ।
