କାବୁଲ: ବନ୍ଧୁକ ବଳରେ ଆଫଗାନିସ୍ତାନର କ୍ଷମତା ଦଖଲ କରିବା ପରେ ନିଜ ଅସଲ ରୂପ ଦେଖାଇଛନ୍ତି ତାଲିବାନ ଆତଙ୍କୀ । ସାରା ଦେଶକୁ ନିଜ କବଜାକୁ ନେଇ ଆତଙ୍କ ଆରମ୍ଭ କରିଦେଇଛି ତାଲିବାନ । ଏହାରି ମଧ୍ୟରେ ଗଣମାଧ୍ୟମକୁ ନିଜ ଅକ୍ତିଆରକୁ ନେବାକୁ ଚେଷ୍ଟା କରୁଛନ୍ତି ତାଲିବାନୀ ।
ଆଫଗାନିସ୍ତାନ ରାଜଧାନୀ କାବୁଲରେ ଭୟାବହ ସ୍ଥିତି ମଧ୍ୟରେ ସୋମବାର ଟୋଲୋ ନ୍ୟୁଜ (TOLOnews) କମ୍ପାଉଣ୍ଡ୍ ଭିତରେ ଫଶିଛନ୍ତି ତାଲିବାନ ଆତଙ୍କୀ । ଏଠାରେ ସେମାନେ ସୁରକ୍ଷାକର୍ମୀଙ୍କ ଅସ୍ତ୍ର ଛଡାଇନେଇଛନ୍ତି । ହେଲେ ଟୋଲୋ ନ୍ୟୁଜ କାର୍ଯ୍ୟାଳୟ ସୁରକ୍ଷିତ ରହିବ ବୋଲି ପ୍ରତିଶୃତି ଦେଇଛନ୍ତି ତାଲିବାନୀ ।
ଟୋଲୋ ନ୍ୟୁଜ ଆଫଗାନିସ୍ତାନରେ ପରିଚାଳିତ ମିଡିଆ ପ୍ରତିଷ୍ଠାନ । ଏହା ଦୀର୍ଘ ଦିନରୁ ତାଲିବାନ ଆତଙ୍କର ପ୍ରତିଟି ଖବର ଓ ଅପଡେଟ ଦେଶବିଦେଶର ଜନସାଧାରଣଙ୍କ ନିକଟରେ ପହଁଞ୍ଚାଇଆସୁଛି। ତାଲିବାନ ଆତଙ୍କୀ ଟୋଲୋ ନ୍ୟୁଜ କମ୍ପାଉଣ୍ଡରେ ପଶିବା ନେଇ ଟୋଲୋ ନ୍ୟୁଜ ହିଁ ଦେଇଛି ଖବର ।
ଟୋଲୋ ନ୍ୟୁଜ ପକ୍ଷରୁ ମିଳିଥିବା ସୂଚନା ଅନୁଯାୟୀ, କାବୁଲ ସ୍ଥିତ ନ୍ୟୁଜ କମ୍ପାଉଣ୍ଡ୍ରେ ତାଲିବାନ ଆତଙ୍କୀ ପଶିଆସିଛନ୍ତି । ଏଠାରେ ମୁତୟନ ସୁରକ୍ଷାକର୍ମୀଙ୍କ ବନ୍ଧୁକ ଯାଞ୍ଚ କରିଛନ୍ତି । କେବଳ ସେତିକି ନୁହେଁ, ସରକାରଙ୍କ ପକ୍ଷରୁ ସୁରକ୍ଷାକର୍ମୀଙ୍କୁ ଦିଆଯାଇଥିବା ବନ୍ଧୁକ ମଧ୍ୟ ଛଡାଇ ନେଇଛନ୍ତି ଆତଙ୍କୀ ।
ଏହାପୂର୍ବରୁ ତାଲିବାନ କାନ୍ଧାହାରରେ ଏକ ରେଡିଓ ଷ୍ଟେସନକୁ ନିଜ କବଜାକୁ ନେଇଥିଲେ । ଏମାନେ ଗତ କିଛି ଦିନରୁ ଆଫଗାନିସ୍ତାନର ଶାସନ ଦଖଲ କରିବାକୁ ପ୍ରୟାସ ଜାରି ରଖିଛନ୍ତି । ଶୁକ୍ରବାର ତାଲିବାନ ଆତଙ୍କୀ ଆଫଗାନିସ୍ତାନର ରାଜଧାନୀ କାବୁଲକୁ ନିଜ କବଜାକୁ ନେଇଥିଲେ, ଯାହାପରେ ଦେଶରେ ପୁନର୍ବାର ତାଲିବାନୀ ରାଜର ପ୍ରତ୍ୟାବର୍ତ୍ତନ ହୋଇଛି ।
