କାବୁଲ: ଆଫଗାନିସ୍ତାନରେ ଲଗାତାର ବଢିବାରେ ଲାଗିଛି ଆତଙ୍କୀ ରାଜ । ଗୋଟିଏ ପଟେ କୋରୋନା ପ୍ରକୋପ ନିଜର କାୟ ବିସ୍ତାର କରୁଥିବାରୁ ଦେଶବାସୀ ଭୟଭୀତ ଥିବା ବେଳେ ଅନ୍ୟଟେ ଲଗାତାର ଆତଙ୍କୀ ଆକ୍ରମଣ ଲୋକଙ୍କ ମନୋବଳକୁ ଭାଙ୍ଗିବାରେ ଲାଗିଛି । ମଙ୍ଗଳବାର କ୍ରମାଗତ ଦ୍ବିତୀୟ ଆକ୍ରମଣ ଭାବେ ଏକ ଅନ୍ତ୍ୟେଷ୍ଟି କ୍ରିୟାରେ ହୋଇଛି ଆତ୍ମଘାତୀ ବିସ୍ଫୋରଣ ।
ସୂଚନା ଅନୁଯାୟୀ ନାଙ୍ଗରହାର ପ୍ରାନ୍ତରେ ଏକ ଶବସତ୍କାର ଚାଲିଥିବା ବେଳେ ଏଠାରେ ହଠାତ୍ ହୋଇଥିଲା ଆତ୍ମଘାତୀ ବିସ୍ଫୋରଣ । ଘଟଣାରେ ପ୍ରାୟ 15 ଜଣଙ୍କ ମୃ୍ତ୍ୟୁ ହୋଇଥିବା ଆକଳନ କରାଯାଇଛି । ଏଥିସହ ପ୍ରାୟ 56 ଜଣ ଆହତ ହୋଇଥିବା ମଧ୍ୟ ଜଣା ପଡିଛି । ତେବେ କୁଜ କୁନାର ଜିଲ୍ଲାର ଜଣେ ସ୍ଥାନୀୟ ପୋଲିସ ଅଫିସରଙ୍କ ଶବସତ୍କାର ଚାଲିଥିବା ବେଳେ ଏହି ବିସ୍ଫୋରଣ ହୋଇଥିବା ଜଣା ପଡିଛି । ସକାଳ 11ଟା ସମୟରେ ଏହି ଘଟଣା ଘଟିଥିବା ରିପୋର୍ଟରୁ ପ୍ରକାଶିତ ।
ଏହି ବିସ୍ଫୋରଣରେ ସମ୍ପୃକ୍ତ ପ୍ରାନ୍ତ କାଉନସିଲର ସଦସ୍ୟ ଅବଦୁଲ୍ଲା ମାଲାକଜାଇଙ୍କର ମୃତ୍ୟୁ ହୋଇଥିବା ଜଣାପଡିଛି । ସେପଟେ ଆହତଙ୍କ ମଧ୍ୟରେ ଅନେକଙ୍କ ଅବସ୍ଥା ସଙ୍କଟାପନ୍ନ ରହିଥିବାରୁ ସେମାନଙ୍କୁ ସ୍ଥାନୀୟ କୁଜ କୁନାର ହସ୍ପିଟାଲ ଓ ପ୍ରାନ୍ତ ରାଜଧାନୀ ଜଲାଲାବାଦର ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି କରାଯାଇଛି । ତେଣେ ସମ୍ପୃକ୍ତ ଘଟଣା ପଛରେ ବର୍ତ୍ତମାନ ସୁଦ୍ଧା କୌଣସି ସଙ୍ଗଠନ ନିଜକୁ ଦାୟୀ କରିନାହାନ୍ତି ।
ଏହାପୂର୍ବରୁ ମଙ୍ଗଳବାର ସକାଳେ ପ୍ରଥମେ ଦସ୍ତ-ଏ-ବରଚୀ ଅଞ୍ଚଳରେ ଏକ ଡାକ୍ତରଖାନାରେ ବୋମା ବିସ୍ଫୋରଣ ସହ ଗୁଳି ବର୍ଷଣ ହୋଇଥିଲା । ଏଥିରେ 5 ଜଣଙ୍କର ମୃତ୍ୟୁ ହେବା ସହ 4 ଜଣ ଆହତ ହୋଇଥିଲେ । ଘଟଣାସ୍ଥଳରୁ 40 ଜଣଙ୍କୁ ଉଦ୍ଧାର ମଧ୍ୟ କରାଯାଇଥିଲା ।
@IANS
