କଲମ୍ବୋ: ପର୍ଯ୍ୟଟନ ପାଇଁ ସୀମା ଖୋଲିବା ନିଷ୍ପତ୍ତିରେ ସାମୟିକ ବିରାମ ଲଗାଇଛି ଶ୍ରୀଲଙ୍କା । ଆଗାମୀ ଦୁଇ ସପ୍ତାହ ଯାଏଁ ଏହି କଟକଣା ବଜାୟ ରହିବା ନେଇ ସୂଚନା ରହିଛି । ସେପଟେ ଆଗକୁ ସଂସଦୀୟ ନିର୍ବାଚନ ଆସୁଥିବାରୁ ଦେଶବ୍ୟାପୀ ଲାଗୁ ହୋଇଥିବା କର୍ଫ୍ୟୁ କୋହଳ କରିବା ପାଇଁ ସରକାର ନିର୍ଦ୍ଦେଶ ଦେଇଛନ୍ତି । ସୋମବାର ଏନେଇ ସରକାର ବିଧିବଦ୍ଧ ଭାବେ ଘୋଷଣା କରିଛନ୍ତି ।
ପ୍ରଥମେ ଦେଶରେ ସମସ୍ତ ଅନ୍ତର୍ଜାତୀୟ ବିମାନ ସେବା ପାଇଁ ବିମାନବନ୍ଦରଗୁଡିକୁ ଅଗଷ୍ଟ 1ରୁ ଖୋଲିବା ପାଇଁ ଯୋଜନା ରହିଥିଲା । ହେଲେ ଏହି ଯୋଜନାକୁ ବର୍ତ୍ତମାନ ସ୍ଥଗିତ ରଖାଯାଇ ଦେଶରେ ସୁଧୁରିବା ସ୍ଥିତିକୁ ସ୍ଥାୟୀ କରିବା ସହ ଦେଶରେ ନିର୍ବାଚନ ପ୍ରକ୍ରିୟା ସୁରୁଖୁରୁରେ ସାରିବା ପାଇଁ ସରକାର ଯୋଜନା କରିଛନ୍ତି । ଏଥିସହ ଶ୍ରୀଲଙ୍କା ଫେରିବାକୁ ଚାହୁଁଥିବା ବାସିନ୍ଦାଙ୍କୁ କିପରି ସ୍ବଦେଶ ଫେରାଇ ଅଣାଯିବ ସେନେଇ ସରକାର ଚିନ୍ତା କରୁଛନ୍ତି ।
ଏନେଇ ପର୍ଯ୍ୟଟନ ମନ୍ତ୍ରୀ ପ୍ରସନ୍ନା ରଣତୁଙ୍ଗାଙ୍କ କହିବା ଅନୁଯାୟୀ ଦେଶକୁ ପ୍ରଥମେ ସମସ୍ତ 46,000 ରେଜିଷ୍ଟର କରିଥିବା ନାଗରିକ ଫେରିବା ପରେ ହିଁ ପର୍ଯ୍ୟଟନ ଶିଳ୍ପ ସ୍ବାଭାବିକ କରାଯିବ । ତେବେ ପର୍ଯ୍ୟଟକଙ୍କ ପାଇଁ ବିମାନବନ୍ଦର ଖୋଲିଲେ ସେମାନଙ୍କୁ କିଛିଟା ନିର୍ଦ୍ଦିଷ୍ଟ କଟକଣା ଦେଇ ଗତି କରିବାକୁ ପଡିବ । ବିଦେଶରୁ ଆସୁଥିବା ପର୍ଯ୍ୟଟକଙ୍କୁ ପ୍ରଥମେ 72 ଘଣ୍ଟା ମଧ୍ୟରେ ହୋଇଥିବା ପିସିଆରର ନେଗେଟିଭ ରିପୋର୍ଟ ଦାଖଲ କରିବାକୁ ହେବ । ଏହାପରେ ଅନ୍ୟ ଏକ ରିପୋର୍ଟ ଶ୍ରୀଲଙ୍କାରେ ପହଞ୍ଚିବା ପରେ ଦାଖଲ କରିବାକୁ ହେବ ବୋଲି ସ୍ପଷ୍ଟ ହୋଇଛି । ସେହିପରି ଭାବେ ତୃତୀୟ ରିପୋର୍ଟକୁ 10 ଦିନ ମଧ୍ୟରେ ଦାଖଲ କରିବାକୁ ହେବ ।
ତଥାପି ଶ୍ରୀଲଙ୍କାରେ ରହଣି ସମୟରେ ଯଦି କୌଣସି ପର୍ଯ୍ୟଟକଙ୍କ ପାଖରେ କୋରୋନାର ଲକ୍ଷଣ ଦେଖାଯାଏ ତେବେ ତାଙ୍କୁ ଆଉ ଥରେ ପିସିଆର ଟେଷ୍ଟିଂ ଦେଇ ଗତି କରିବାକୁ ହେବ । ଏଥିସହ ଯଦି କୌଣସି ବ୍ୟକ୍ତି ଶ୍ରୀଲଙ୍କା ଫେରିବା ପରେ ବିନା ମାସ୍କରେ ଦେଖାଯାଆନ୍ତି ତେବେ ତାଙ୍କୁ 14 ଦିନିଆ ବାଧ୍ୟତାମୂଳକ କ୍ବାରେଣ୍ଟାଇନରେ ରଖାଯିବାର ବ୍ୟବସ୍ଥା ହୋଇଥିବା କୁହାଯାଇଛି ।
@IANS
