ଇସଲାମାବାଦ: ପାକିସ୍ତାନର ରାୱଲପିଣ୍ଡିରେ ଏକ ସେନା ବିମାନ ଦୁର୍ଘଟଣାଗ୍ରସ୍ତ ହୋଇଛି । ଏଥିରେ 17 ଜଣଙ୍କ ମୃତ୍ୟୁ ହୋଇଥିବା ବେଳେ ଅନେକ ଆହତ ହୋଇଛନ୍ତି । ମୃତକଙ୍କ ମଧ୍ୟ 12 ଜଣ ସାଧାରଣ ନାଗରିକ ଥିବାବେଳେ 5 ଜଣ ପାକିସ୍ତାନୀ ଯବାନ ରହିଛନ୍ତି ।
ମଙ୍ଗଳବାର ଭୋର ସମୟରେ ଏହି ଦୁର୍ଘଟଣା ଘଟିଥିବା ବେଳେ ମୃତକ 5 ଯବାନଙ୍କ ମଧ୍ୟରେ 2 ଜଣ ପାଇଲଟ ଥିବାର ଜଣାପଡିଛି । ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଜାରି ରହିଥିବା ବେଳେ ବର୍ତ୍ତମାନ କେତେକଙ୍କ ସ୍ଥିତି ଗମ୍ଭୀର ରହିଛି ।
ଦୁର୍ଘଟଣାର କାରଣ ସ୍ପଷ୍ଟ ହୋଇନଥିବା ବେଳେ ପାକିସ୍ତାନୀ ସେନାଙ୍କ କହିବାନୁଯାୟୀ, ଏହି ବିମାନଟି ପ୍ରଶିକ୍ଷଣ ଉଡାଣ ଭରୁ ଥିବା ସମୟରେ ଏକ ଜନବସତି ଅଞ୍ଚଳରେ ଦୁର୍ଘଟଣାର ଶିକାର ହୋଇଛି । ସେପଟେ ଉଦ୍ଧାରକାରୀ ଦଳଙ୍କ କହିବା ଅନୁଯାୟୀ, ବିମାନଟି ନିୟନ୍ତ୍ରଣ ହରାଇ ତଳକୁ ଖସିପଡିଛି।
