ବେଜିଂ: ଆଉ ଦିନ କେଇଟା ପରେ ଆରମ୍ଭ ହେବ ନୂଆ ଶିକ୍ଷାବର୍ଷ । ଏନେଇ ଚୀନରେ କୋରୋନା ପରିସ୍ଥିତିରେ ସାମାନ୍ୟ ସୁଧାର ପରେ ପୁଣି ସ୍କୁଲକୁ ଫେରିଛନ୍ତି ପ୍ରାଥମିକ ଓ ମାଧ୍ୟମିକ ବିଦ୍ୟାଳୟର ଅନ୍ତିମ ବର୍ଷ ଶିକ୍ଷାର୍ଥୀ । ଆଗାମୀ ଦିନରେ ପରୀକ୍ଷା ଥିବା ସହ ଉଚ୍ଚ ଶିକ୍ଷା ପାଇଁ ଆରମ୍ଭ ହେବ ପ୍ରବେଶିକା ପରୀକ୍ଷା । ଯାହାକୁ ନଜରରେ ରଖି ଶିକ୍ଷାନୁଷ୍ଠାନ ଏବେ ପୁଣି ଚଳଚଞ୍ଚଳ ହୋଇଉଠିଛି ।
ପ୍ରଥମେ ଲୁନାର ନବବର୍ଷ ଛୁଟିଠାରୁ ଆରମ୍ଭ ହୋଇଥିବା ସ୍କୁଲ ଛୁଟି ପରବର୍ତ୍ତୀ ସମୟରେ କୋରୋନା ସଂକ୍ରମଣ ପାଇଁ ଅନିର୍ଦ୍ଦିଷ୍ଟ କାଳ ପାଇଁ ବୃଦ୍ଧି ହୋଇଥିଲା । ହେଲେ ଏବେ ପରିସ୍ଥିତିରେ ଆସିଛି ସାମାନ୍ୟ ସୁଧାର । ଏମିତିରେ ଉଚ୍ଚ ଶିକ୍ଷାକୁ ଗୁରୁତ୍ବ ଦେଇଛି ଚୀନ ସରକାର । ତେବେ ବର୍ତ୍ତମାନ ଖୋଲିଥିବା ସ୍କୁଲମାନଙ୍କରେ କେବଳ ସିନିୟର ଛାତ୍ରଛାତ୍ରୀମାନଙ୍କୁ ଆସିବା ପାଇଁ ଅନୁମତି ଦିଆଯାଇଛି । ହେଲେ କେତୋଟି ସ୍କୁଲ ଖୋଲିବାକୁ ଅନୁମତି ମିଳିଛି ତାହା ସ୍ପଷ୍ଟ କରିନାହାନ୍ତି ଶିକ୍ଷା ବିଭାଗ ନିର୍ଦ୍ଦେଶକ ୱାଙ୍ଗ ଡେଙ୍ଗଫେଙ୍ଗ ।
ସେପଟେ ଚୀନର ଏକ ଆଞ୍ଚଳିକ ଟେଲିଭିଜନର ଖବର ମୁତାବକ ଦେଶର 49ହଜାର ଛାତ୍ରଛାତ୍ରୀ ଉଚ୍ଚ ଶିକ୍ଷା ପାଇଁ ସ୍କୁଲକୁ ଫେରିଛନ୍ତି । ଜୁଲାଇ 7 ଓ 8 ରେ ହେବାକୁ ଥିବା ପ୍ରବେଶିକା ପରୀକ୍ଷା ପାଇଁ ଛାତ୍ରଛାତ୍ରୀମାନେ ଖୁବ ଉତ୍ସାହିତ ଅଛନ୍ତି ବୋଲି ପ୍ରକାଶ କରିଛନ୍ତି । ଏନେଇ ଏକ ଖବରକାଗଜର ସୂଚନା ମୁତାବକ ବର୍ତ୍ତମାନ ସୁଦ୍ଧା ଦେଶର ବେଜିଂ ଓ ସାଙ୍ଘାଇ ସମେତ 30ଟି ପ୍ରାନ୍ତରେ ସ୍କୁଲ ଖୋଲାଯାଇଛି । ଆଗାମୀ ଦିନରେ ଅନ୍ୟ ପ୍ରାନ୍ତମାନଙ୍କରେ ମଧ୍ୟ ଧିରେ ଧିରେ ପରିସ୍ଥିତି ସ୍ବାଭାବିକ ହେବା ସହ ସ୍କୁଲ ଖୋଲା ଯିବାର ନିଷ୍ପତ୍ତି ନିଆଯାଇଛି ।
