ସିଓଲ: ନିର୍ଦ୍ଧାରିତ ସମୟ ପୂର୍ବରୁ ଦେଶରେ ଶୁକ୍ରବାର ଆରମ୍ଭ ହୋଇଛି ସଂସଦୀୟ ନିର୍ବାଚନ । ଦେଶର କୋରୋନା ଆକ୍ରାନ୍ତମାନେ ବିଶୋଧିତ ପୋଲିଂ ଷ୍ଟେସନରେ ପହଞ୍ଚି ନିଜ ମତ ସାବ୍ୟସ୍ତ କରିଛନ୍ତି । ଏଥିପାଇଁ ଦେଶରେ ସଂକ୍ରମିତଙ୍କ ପାଇଁ 8ଟି ପୋଲିଂ ବୁଥର ବ୍ୟବସ୍ଥା କରାଯାଇଛି ।
ସୂଚନା ମୁତାବକ ଉଭୟ ସିଓଲ ଡାଏଗୁରେ ଏହି 8ଟି ପୋଲିଂ ବୁଥ ସ୍ଥାପନ କରାଯାଇଛି। ଯେଉଁଠି ଚିକିତ୍ସାଧିନ 3 ହଜାର ସଂକ୍ରମିତ ଓ କାର୍ଯ୍ୟରତ 900 ଡାକ୍ତରୀ କର୍ମଚାରୀମାନେ ନିଜ ମତ ସାବ୍ୟସ୍ତ କରିଛନ୍ତି । ପ୍ରକୃତରେ ଏପ୍ରିଲ 15ରେ ସଂସଦୀୟ ନିର୍ବାଚନ ତାରିଖ ନିର୍ଦ୍ଧାରିତ ହୋଇଥିବା ବେଳେ ଆଗୁଆ ନିର୍ବାଚନ କରିବା ଦ୍ବାରା ନିର୍ଦ୍ଧିରିତ ତାରିଖରେ ଲୋକଙ୍କ ଭିଡ କମ ହେବ ବୋଲି ଅଧିକାରୀମାନେ ଆଶା ରଖିଛନ୍ତି । ଏଥିପାଇଁ କୋରୋନା ପରିସ୍ଥିତି ସତ୍ତ୍ବେ ଦେଶରେ ଆଗୁଆ ନିର୍ବାଚନ କରାଯାଇଥିବା ଜଣାପଡିଛି ।
ତେବେ ଏହି ଆଗୁଆ ନିର୍ବାଚନ ପାଇଁ ଗୁରୁବାର ସମସ୍ତ ପୋଲିଂ ବୁଥକୁ ସାନିଟାଇଜ କରାଯାଇଥିଲା । ଏଥିସହ ମତ ସାବ୍ୟସ୍ତ କରିବାକୁ ଆସୁଥିବା ଲୋକଙ୍କୁ ମାସ୍କ ବ୍ୟବହାର ସହ ସାନିଟାଇଜରର ବ୍ୟବହାର ଓ ହାତରେ ଗ୍ଲୋବ୍ସ ପିନ୍ଧିବା ବାଧ୍ୟତାମୂଳକ ରହିଥିଲା । ଶୁକ୍ରବାର ପୋଲିଂ ବୁଥରେ ପ୍ରବେଶ କରୁଥିବା ଲୋକଙ୍କର ପ୍ରଥମେ ଶରୀରର ତାପମାତ୍ରା ପରୀକ୍ଷା ହୋଇଥିଲା, ଏହାପରେ ସେମାନଙ୍କୁ ବୁଥ ମଧ୍ୟକୁ ଛଡାଯାଇଥିଲା ।
ସେପଟେ କୋରୋନା ସଂକ୍ରମଣ ସତ୍ତ୍ବେ ଦେଶବାସୀ ଖୁବ ଉତ୍ସାହର ସହ ମତ ସାବ୍ୟସ୍ତ କରିଥିବା ଦେଖିବାକୁ ମିଳିଥିଲା ।
