ଇସଲାମାବାଦ: ପାକିସ୍ତାନରେ କୋରୋନା କାୟା ବିସ୍ତାର କରିବାରେ ଲାଗିଛି । ଏଭଳି ସ୍ଥିତି ପାକ୍ ସରକାର ପ୍ରଥମେ ଲକଡାଉନକୁ ବୃଦ୍ଧି କରିଥିବାବେଳେ ଏବେ ଆନ୍ତର୍ଜାତୀୟ ବିମାନ ଚଳାଚଳ ଉପରେ କଟକଣା ଜାରି କରିଛନ୍ତି । ମେ 15 ପୂର୍ବରୁ କୌଣସି ଆନ୍ତର୍ଜାତିକ ବିମାନ ଉଡାଣ ଭରିବ ନାହିଁ । ଏନେଇ ଶନିବାର ବିମାନ ଚଳାଚଳ ବିଭାଗ ପକ୍ଷରୁ ସ୍ପଷ୍ଟ କରିଛି । ପୂର୍ବରୁ ଏପ୍ରିଲ 21 ପରେ ଉଡାଣ ଭରିବା ନେଇ ଘୋଷଣା କରାଯାଇଥିଲା ।
ଶୁକ୍ରବାର ପାକ୍ ସରକାର ଦେଶରେ ଜାରି ହୋଇଥିବା ଲକଡାଉନକୁ ମେ 9 ଯାଏଁ ବୃଦ୍ଧି କରିଛନ୍ତି । ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଅଧ୍ୟକ୍ଷତାରେ ଅନୁଷ୍ଠିତ ଜାତୀୟ ସମନ୍ୱୟ କମିଟି (ଏନସିସି )ର ଏହି ବୈଠକରେ ଲକଡାଉନ ଅବଧି ବୃଦ୍ଧି ନେଇ ନିଷ୍ପତ୍ତି ନିଆଯାଇଛି ।
ସୂଚନାଯୋଗ୍ୟ, ରବିବାର ସୁଦ୍ଧା ପାକିସ୍ତାନରେ 12 ହଜାର 657 କୋରୋନା ସଂକ୍ରମିତ ହୋଇଥିବାବେଳେ 265 ଜଣ ମୃତ୍ୟୁବରଣ କରିଛନ୍ତି ।
