ସିଓଲ: କୋରୋନା ମୁକାବିଲା ପାଇଁ ସୁରକ୍ଷା ପଦକ୍ଷେପ କଡାକଡି କରିଛି ଉତ୍ତର କୋରିଆ । ଏନେଇ ସୀମା କଟକଣା ମଧ୍ୟ କଡାକଡି କରାଯାଇଥିବା ସ୍ପଷ୍ଟ ହୋଇଛି । କିଛି ଦିନ ତଳେ ସର୍ବୋଚ୍ଚ ନେତା କିମ ଜଙ୍ଗ ଉନ ଏକ ବୈଠକରେ ଏନେଇ ଆଲୋଚନା କରିବା ସହ ଦେଶବାସୀଙ୍କୁ ଯଥା ସମ୍ଭବ ସତର୍କ ରହିବା ପାଇଁ ପରାମର୍ଶ ଦେଇଥିଲେ । କିମ୍ଙ୍କ ଆହ୍ବାନ ପରେ ଦେଶରେ ସମସ୍ତ କଟକଣାକୁ ଅଧିକ କଡାକଡି କରାଯାଇଛି ।
ସୂଚନା ଅନୁଯାୟୀ ଗତ ସପ୍ତାହରେ କିମ୍ ଏକ ପଲିଟବ୍ୟୁରୋ ବୈଠକ ଡାକିଥିଲେ । ଯେଉଁଥିରେ ସେ ଦେଶରେ ଥିବା କୋରୋନା ସ୍ଥିତି ସମ୍ପର୍କରେ ଆଲୋଚନା କରିବା ସହ ସ୍ଥିତିରେ ସୁଧାର ଆସିବା ପୂର୍ବରୁ କଟକଣା କୋହଳ କରିବାକୁ ରୋକଠୋକ ନାସ୍ତିବାଣୀ ଶୁଣାଇଥିଲେ । ପରିସ୍ଥିତି ଅତି ସମ୍ବେଦନଶୀଳ ରହିଥିବା ବେଳେ ଏପରି ସ୍ଥିତିରେ ଗୋଟିଏ ସାମାନ୍ୟ ଭୁଲ ଭୟଙ୍କର ପରିଣାମ ଆଣିପାରେ । ତେଣୁ ଏଥିରୁ ଦେଶବାସୀଙ୍କୁ ବଞ୍ଚାଇବା ପାଇଁ କିମ୍ ଅଧିକ ସତର୍କ ରହିବା ପାଇଁ ଦେଶବାସୀଙ୍କୁ ପରାମର୍ଶ ଦେଇଥିଲେ ।
ବର୍ତ୍ତମାନ ଉତ୍ତର କୋରିଆ ନିଜର ସମସ୍ତ ସୀମା ସମ୍ପୂର୍ଣ୍ଣ ବନ୍ଦ କରିବା ସହ ଦେଶରେ କୋରୋନା ମୁକାବିଲା ପାଇଁ ନୂଆ ଯୋଜନା କାର୍ଯ୍ୟକାରୀ କରିଥିବା ନେଇ ସୂଚନା ଦେଇଛନ୍ତି ଉତ୍ତର କୋରିଆ କ୍ୟାବିନେଟ ମନ୍ତ୍ରୀ ମିଞ୍ଜୁ ଜୋସୋନ । ସେପଟେ ଦେଶରେ କୋରୋନା ସଂକ୍ରମଣ ରୋକିବା ପାଇଁ ଦେଶ ଅତି ବଡ ଓ ଶକ୍ତିଶାଳୀ ପଦକ୍ଷେପ ଯୁଦ୍ଧକାଳୀନ ଭିତ୍ତିରେ ଗ୍ରହଣ କରୁଥିବା ମଧ୍ୟ ସେ ପ୍ରକାଶ କରିଛନ୍ତି ।
କେତେକ ସୂତ୍ରରୁ ପ୍ରକାଶ ପାଇଥିଲା କି ନିଜ ଆର୍ଥିକ ସ୍ଥିତି ମଜଭୂତ କରିବା ପାଇଁ ଉତ୍ତର କୋରିଆ ନିଜ ସୀମା କଟକଣା କୋହଳ କରିବ । ହେଲେ ଏସମସ୍ତ ଖବରକୁ ମିଛ ପ୍ରମାଣିତ କରି ମଙ୍ଗଳବାର ଉଭୟ ଜଳ ଓ ସ୍ଥଳ ସୀମା ବନ୍ଦ କରିଛି ଦେଶ ।
@IANS
