କାଠମାଣ୍ଡୁ: ଲକଡାଉନ ସମୟରେ ସାରା ବିଶ୍ବ ଏକ ପ୍ରକାର ସ୍ଥିର ହୋଇଯାଇଥିବା ବେଳେ ଏହି ସୁଯୋଗର ଲାଭ ଉଠାଇ ଚାଲିଛି ଅନେକ ମରାମତି କାର୍ଯ୍ୟ । ରାସ୍ତା ଘାଟ ନବୀକରଣ, ବିଦ୍ୟୁତ ସଂଯୋଗ ଆଦି ସହ ଏବେ ବିମାନବନ୍ଦର ରୂପରେଖ ପରିବର୍ତ୍ତନ ମଧ୍ୟ ଏହି ଲକଡାଉନ ମଧ୍ୟରେ ଆରମ୍ଭ ହୋଇଛି । ଭାରତ ପରି ନେପାଳ ମଧ୍ୟ ଖୁବ ଶୀଘ୍ର ଦେଶରେ ବିମାନ ସେବା ଆରମ୍ଭ କରିବାକୁ ଯାଉଛି । ଏନେଇ ଲକଡାଉନର ଜନଶୂନ୍ୟ ସମୟର ସୁଯୋଗ ନେଇ ଦେଶର ତ୍ରିଭୂବନ ଅନ୍ତର୍ଜାତୀୟ ବିମାନବନ୍ଦରର ବଦଳୁଛି ରୂପରେଖ ।
ଆଗକୁ ବିମାନ ସେବା ସ୍ବାଭାବିକ ହେବା ମାତ୍ରେ ଅନେକ ଗୁରୁତ୍ବପୂର୍ଣ୍ଣ ଦିଗ ପ୍ରତି ନଜର ଦେବାକୁ ହେବ । ଯେପରିକି ବିମାନବନ୍ଦରରେ ଉଭୟ ଘରୋଇ ଅନ୍ତର୍ଜାତୀୟ ଉଡାଣ ପାଇଁ ନିର୍ଦ୍ଦିଷ୍ଟ ଟର୍ମିନାଲରେ ଯାତ୍ରୀଙ୍କ ପାଇଁ ସାମାଜିକ ଦୂରତାର ସୁବିଧା କରାଯାଇଛି । ଏଥିସହ ବିମାନବନ୍ଦରରେ 3000ମିଟରର ରନ ୱେ ରହିଥିବା ବେଳେ ଲକଡାଉନ ସମୟ ଅବଧି ମଧ୍ୟରେ ଏହାର ଲମ୍ବକୁ 3300 ମିଟରରେ ପରିଣତ କରାଯାଇଛି । ସମାନ ଭାବେ ନୂଆ ପାର୍କିଂ ସ୍ପେଶ ଓ ନୂଆ ଡିପାର୍ଚର ଗେଟ ଆଦିର ନିର୍ମାଣ କାର୍ଯ୍ୟ ମଧ୍ୟ ଜାରି ରହିଥିବା ଜଣାପଡିଛି ।
ପୂର୍ବରୁ ବିମାନ ବନ୍ଦରରେ 9ଟି ପାର୍କିଂ ସ୍ଥାନ ରହିଥିବା ବେଳେ ଏବେ ଏହି ସଂଖ୍ୟାକୁ ବଢାଇ 13 କରାଯାଇଛି । ସେହିପରି ଡିପାର୍ଚର ଲାଉଞ୍ଜଗୁଡିକୁ ବନ୍ଦ କରାଯାଇ 6ଟି ନୂଆ ଡିପାର୍ଚର ଗେଟର ନିର୍ମାଣ କାର୍ଯ୍ୟ ଶେଷ ହୋଇଛି । ତେବେ ଆଉ କିଛି ମାସ ପରେ ଆଗନ୍ତୁକ ଯାତ୍ରୀଙ୍କ ପାଇଁ ଏକ ନୂଆ ଗେଟ ତିଆରି ହେବା ନେଇ ସୂଚନା ରହିଛି । ଯେଉଁଥିରେ ହେଲଥ ଡେସ୍କର ସୁବିଧା ରହିବ । ଏନେଇ ସୂଚନା ଦେଇଛନ୍ତି ବିମାନବନ୍ଦର ମୁଖପାତ୍ର ଦେବ ଚନ୍ଦ୍ର ଲାଲ କର୍ଣ୍ଣ ।
@IANS
