କାଠମାଣ୍ଡୁ: କିଛି ଦିନ ପରେ ନେପାଳରେ ପୁଣି ବଢିଛି କୋରୋନା ପଜିଟିଭ ସଂଖ୍ୟା । ମଙ୍ଗଳବାର ପୁଣି 2ଟି ନୂଆ ମାମଲା ସାମନାକୁ ଆସିଛି । ଫଳରେ ଦେଶରେ ମୋଟ ଆକ୍ରାନ୍ତ 54କୁ ବୃଦ୍ଧି ପାଇଛି ।
କାଠମାଣ୍ଡୁକୁ ପଠାଯାଇଥିବା 83ଟି ସାମ୍ପଲରୁ ଏହି 2ଟି ରିପୋର୍ଟ ପଜିଟିଭ ଆସିଛି । ଉଭୟ ନେପାଳର ରାଉଟହ୍ୟାଟ ଜିଲ୍ଲାର ବୋଲି ସରକାର ସୂଚନା ଦେଇଛନ୍ତି । ଏମାନଙ୍କ ଭିତରୁ ଜଣେ ନିକଟରେ ଭାରତର କୋଲକାତାରୁ ଫେରିଥିଲେ । ସେ 2 ସପ୍ତାହ କ୍ବାରେଣ୍ଟାଇନରେ ରହିବା ପରେ ଘରକୁ ଫେରିଥିଲେ । ସେତେବେଳେ ତାଙ୍କ ସ୍କ୍ରିନିଂ ଆରଡିଟି କିଟ୍ସରେ ହୋଇଥିଲା ଓ ଏହା ନେଗେଟିଭ ଆସିଥିଲା । ତେବେ ବର୍ତ୍ତମାନ ତାଙ୍କୁ ଖୋଜା ଚାଲିଥିବା ରାଉଟହ୍ୟାଟର ଜିଲ୍ଲା ଚିକିତ୍ସାଳୟର ମୁଖ୍ୟ ମହେଶ ଶାହ କହିଛନ୍ତି ।
ତେବେ ଦ୍ବିତୀୟ ଆକ୍ରାନ୍ତ ବର୍ତ୍ତମାନ ଦେୱାହିରେ କ୍ବାରେଣ୍ଟାଇନରେ ଅଛନ୍ତି । ଫେବୃୟାରୀ 25ରେ ନେପାଳରେ ଦକ୍ଷିଣ ଏସିଆର ପ୍ରଥମ ରାଷ୍ଟ୍ର ଭାବେ କୋରୋନା ମାମଲା ବାହାରିଥିଲା । ଚୀନରୁ ଫେରିଥିବା ଜଣେ ଛାତ୍ରଙ୍କଠାରେ କୋଭିଡ 19 ବାହାରିଥିଲା । ତେବେ ପ୍ରାୟ ମାସେ ପରେ ମାର୍ଚ୍ଚ 23ରେ ଦ୍ବିତୀୟ ଆକ୍ରାନ୍ତ ସ୍ପଷ୍ଟ ହୋଇଥିଲେ । ଏହାପରେ ମାର୍ଚ୍ଚ 24ରେ ଦେଶବ୍ୟାପୀ ଲକଡାଉନ ଘୋଷଣା ହୋଇଥିଲା ଯାହା ନିକଟରେ ମେ 7 ଯାଏଁ ବୃଦ୍ଧି ପାଇଛି । ଦେଶରେ ଉଦୟପୁର ଜିଲ୍ଲାକୁ ହଟସ୍ପଟ ଭାବେ ଘୋଷଣା କରାଯାଇଛି । ଏଠାରେ ସର୍ବାଧିକ 14ଟି ପଜିଟିଭ ବାହାରିଛି ।
