ଭିଏଣ୍ଟିଏନ: ନ୍ୟୁଜିଲାଣ୍ଡର ସଫଳ କୋରୋନା ମୁକାବିଲା ପରେ ଏବେ ଅନ୍ୟ ଏକ କୋରୋନା ମୁକ୍ତ ରାଷ୍ଟ୍ର ଭାବରେ ଉଭା ହୋଇଛି ଲାଓସ । ଦେଶରେ ଚିକିତ୍ସାଧିନ ଅବସ୍ଥାରେ ଥିବା 19 ଜଣ କୋରୋନା ଆକ୍ରାନ୍ତ ଶନିବାର ସମ୍ପୂର୍ଣ୍ଣ ସୁସ୍ଥ ହୋଇଥିବା ଜଣା ପଡିଛି । ଏଥିସହ ଗତ 59 ଦିନ ହେବ ଦେଶରେ କୌଣସି ନୂଆ ଆକ୍ରାନ୍ତ ଚିହ୍ନଟ ହୋଇନଥିବାରୁ ନିଜକୁ ଶନିବାର କୋରୋନା ମୁକ୍ତ ରାଷ୍ଟ୍ର ଭାବେ ଘୋଷଣା କରିଛି ଲାଓସ ।
କୋରୋନାର ବର୍ତ୍ତମାନ ସୁଦ୍ଧା କୌଣସି ପ୍ରତିଷେଧକ ଟୀକା ବାହାରି ନଥିବା ବେଳେ ଏହି ଲଢେଇରେ ସଫଳତା ହାସଲ କରିବା ନିଜ ଭିତରେ ଏକ ବହୁତ ବଡ ବିଜୟ ବୋଲି ପ୍ରକାଶ କରିଛନ୍ତି ପ୍ରଧାନମନ୍ତ୍ରୀ ଥୋଙ୍ଗଲୌନ ସିସୌଲିଥ । ସେ ଦେଶରେ କୋରୋନା ସମ୍ପର୍କରେ ସୂଚନା ଦେଇ କହିଥିଲେ କି ଲାଓସରେ ଅନ୍ୟ ଦେଶମାନଙ୍କ ତୁଳନାରେ ବହୁ ବିଳମ୍ବରେ କୋରୋନାର ପଦପାତ ଦେଖିବାକୁ ମିଳିଥିଲା ।
ମାର୍ଚ୍ଚ 24ରେ ଦେଶରେ ଜନୈକ 36 ବର୍ଷୀୟ ଟୁରିଷ୍ଟ ଗାଇଡ କୋରୋନା ଦ୍ବାରା ସଂକ୍ରମିତ ୟୁରୋପିୟାନ ଅତିଥିଙ୍କ ସହ ରହି ସଂକ୍ରମିତ ହୋଇଥିଲେ । ଏଥିସହ ବ୍ୟାଙ୍ଗକକ୍ରେ ଆୟୋଜିତ ଏକ ସମ୍ମିଳନୀରେ ଯୋଗ ଦେଇଥିବା ଜଣେ 28 ବର୍ଷୀୟ ଯୁବକ ମଧ୍ୟ ପରେ ପଜିଟିଭ ଚିହ୍ନଟ ହୋଇଥିଲେ । ଏହାପରେ ଦେଶରେ ଟେଷ୍ଟିଂ ପ୍ରକ୍ରିୟା ଆରମ୍ଭ ହୋଇଥିଲା । ଏଥିରେ 8926 ଜଣଙ୍କ ରକ୍ତ ନମୂନା ସଂଗ୍ରହ କରାଯାଇ ପରୀକ୍ଷା କରାଯାଇଥିଲା । ଯେଉଁଥିରେ ମାତ୍ର 19 ଜଣ ପଜିଟିଭ ଚିହ୍ନଟ ହୋଇଥିଲେ । ଖୁସିର କଥା କି ଏହି ସଂକ୍ରମଣରେ ଦେଶରେ କୌଣସି ମୃତ୍ୟୁ ହୋଇନାହିଁ ।
ସେପଟେ ଦେଶରେ କୋରୋନା ସଂକ୍ରମଣ ରୋକିବା ପାଇଁ କଡା ପଦକ୍ଷେପମାନ ଗ୍ରହଣ କରାଯାଇଥିଲା । ଦେଶରେ ସମସ୍ତ ନାଗରିକଙ୍କ ପାଇଁ କ୍ବାରେଣ୍ଟାଇନ ନିୟମକୁ କଡାକଡି କରାଯାଇଥିଲା । କେବଳ ଅତ୍ୟାବଶ୍ୟକ କ୍ଷେତ୍ରରେ ବାହାରକୁ ବାହାରିବା ପାଇଁ ନିର୍ଦ୍ଦେଶ ରହିଥିବା ବେଳେ ଅନ୍ୟ ସମୟରେ ଘରେ କ୍ବାରେଣ୍ଟାଇନରେ ରହିବା ପାଇଁ ପରାମର୍ଶ ଦିଆଯାଇଥିଲା । କେବଳ ସେତିକି ନୁହେଁ, ଦେଶର ସୀମା ବନ୍ଦ କରାଯିବା ସହ ବାର, ପବ୍ ଓ ରେସ୍ତୋରାଁ ଆଦି ମଧ୍ୟ ବନ୍ଦ କରାଯାଇଥିଲା ।
ଏହାପରେ ସ୍ଥିତି ନିୟନ୍ତ୍ରଣାଧିନ ହେବା ପରେ ମେ’ ମାସ ଶେଷ ସପ୍ତାହରୁ ଶିକ୍ଷା ବ୍ୟବସ୍ଥା ସ୍ବାଭାବିକ କରିବା ସହ ଅନ୍ୟାନ୍ୟ ମନୋରଞ୍ଜନ ମାଧ୍ୟମ ଯଥା ଥିଏଟର, ମଲ୍, ରେସ୍ତୋରାଁ, ପବ୍ ଆଦି ଖୋଲାଯାଇଥିଲା । ହେଲେ ଏବେ ପର୍ଯ୍ୟନ୍ତ ଦେଶର ସୀମାରେ କଟକଣା କଡାକଡି ରହିଥିବା ଜଣା ପଡିଛି ।
@IANS
