ନୂଆଦିଲ୍ଲୀ: ସାରା ବିଶ୍ୱରେ ଆତଙ୍କ ଖେଳାଇଥିବା କୁଖ୍ୟାତ ଆତଙ୍କବାଦୀ ମାସୁଦ ଅଜହର କିନ୍ତୁ ପୋଲିସ ହେପାଜତରେ ଜଣେ ସାଧାରଣ ବ୍ୟକ୍ତି। ଜୈସ-ଇ-ମହମ୍ମଦ ଭଳି ଆତଙ୍କୀ ସଙ୍ଗଠନ ଦ୍ୱାରା ଭାରତରେ ଅନେକ ଆକ୍ରମଣ କରିଥିବା ମାସୁଦ କେତେ ଡରୁଆ ତାହାର ପ୍ରମାଣ ମିଳିଛି । ମାତ୍ର ଗୋଟିଏ ଚାପୁଡାରେ ସେ କିପରି ସବୁ କଥା କହିଥିଲା ତାହାର ପ୍ରମାଣ ଦେଇଛନ୍ତି ଜଣେ ପୋଲିସ ଅଫିସର।
ସୂଚନାଯୋଗ୍ୟ ଯେ 1994 ଫେବୃୟାରୀରେ ଅଜହର ଦକ୍ଷିଣ କାଶ୍ମୀରର ଅନନ୍ତନାଗ ଠାରେ ଭାରତୀୟ ସେନା ଦ୍ୱାରା ଗିରଫ ହୋଇଥିଲା । ସେ ଏକ ପର୍ତ୍ତୁଗୀଜ ପାସପୋର୍ଟ ଦ୍ୱାରା ବାଂଲାଦେଶ ଦେଇ ଭାରତରେ ପ୍ରବେଶ କରିଥିଲା। ତେବେ ସେନା ଦ୍ୱାରା ଗିରଫ ହେବା ପରେ ଅଜହରକୁ ନେଇ ସମସ୍ତଙ୍କ ମନରେ ଏକ ଉତ୍କଣ୍ଠା ରହିଥିଲା। ଆତଙ୍କୀ ବିଷୟରେ ସେ ସମସ୍ତ ତଥ୍ୟ ଦେବେ ନା ନାହିଁ ସେନେଇ ପୋଲିସ ଅଫିସର ଦ୍ୱନ୍ଦରେ ରହିଥିଲେ।
କିନ୍ତୁ ସାରା ବିଶ୍ୱକୁ ଥରହର କରିଥିବା ଏହି ଆତଙ୍କୀ ଯେ କେତେ ଭୟଭୀତ ତାହା ପ୍ରଥମ ତଦନ୍ତରୁ ଜଣାପଡିଯାଇଥିଲା। ସେ ସମୟରେ ତାକୁ ପଚରାଉଚୁରା କରିଥିବା ସିକିମ ପୋଲିସର ପୂର୍ବତନ ଡାଇରେକ୍ଟର ଜେନେରାଲ ଅଭିନାଶ ମୋହନାନେ ନିକଟରେ ଏହି କଥାର ଖୁଲାସା କରିଛନ୍ତି। ସେ କହିଛନ୍ତି ଯେ ସୁରକ୍ଷାକର୍ମୀଙ୍କୁ ଅଜହର ପାଇଁ ବେଶୀ କଷ୍ଟ କରିବାକୁ ପଡିନଥିଲା। ପ୍ରଥମେ କୌଣସି ତଥ୍ୟ ଦେବାକୁ ମନା କରୁଥିବା ଅଜହର ଜଣେ ଆର୍ମି ଅଫିସରଙ୍କ ଏକ ଶକ୍ତ ଚାପୁଡାରେ ସବୁ ସତ କଥା କହିଥିଲା।
ଅଭିନାଶ କହିଛନ୍ତି ଯେ ପୋଲିସ ହେପାଜତରେ ମାସୁଦ ଅତ୍ୟନ୍ତ ଡରୁଆ ଥିଲା। ଜଣେ ଆର୍ମି ଅଫିସର ତାକୁ ଏକ ଚାପୁଡା ମାରିଥିଲେ, ଯେଉଁଥିରେ ସେ ଡରିଯାଇ ସବୁ ସତ ଓଗାଳି ଦେଇଥିଲା। କିପରି ପାକ୍ରୁ ଆତଙ୍କବାଦୀ କାର୍ଯ୍ୟକଳାପ ପରିଚାଳିତ ହେଉଛି ସେସବୁ ବିଷୟରେ ସେ କହି ଦେଇଥିଲା। ତେବେ 1999ରେ କାନ୍ଦାହାର ବିମାନ ଅପହୃତଙ୍କ ବଦଳରେ ମାସୁଦର ମୁକ୍ତି ପରେ ସେ ଏହାର ପ୍ରତିଶୋଧ ନେଇଥିଲା। ଜୈସ-ଇ-ମହମ୍ମଦ ନାମରେ ଆତଙ୍କୀ ସଙ୍ଗଠନ ଗଠନ କରି ସେ ଭାରତରେ ଅନେକ ବଡ ବଡ ଆକ୍ରମଣ କରିଥିଲା।
