ଟୋକିଓ: ଜାପାନର ଏକ ସ୍ଥାନୀୟ ଡାକ୍ତରଖାନାରେ ସ୍ବାସ୍ଥ୍ୟ ପରୀକ୍ଷା ପାଇଁ ଭର୍ତ୍ତି ହେଲେ ପ୍ରଧାନମନ୍ତ୍ରୀ ସିଞ୍ଜୋ ଆବେ । ସୋମବାର ସେ ଡାକ୍ତରଖାନାରେ ସାଧାରଣ ସ୍ବାସ୍ଥ୍ୟ ପରୀକ୍ଷା ନେଇ ଭର୍ତ୍ତି ହୋଇଥିବା ଜନୈକ ସହଯୋଗୀ ସୂଚନା ଦେଇଛନ୍ତି । ଅନ୍ୟପଟେ କିନ୍ତୁ ଆବେ ବିଗତ କିଛି ଦିନ ହେବ ଅସୁସ୍ଥ ଥିବା ଗୁପ୍ତ ସୂତ୍ରରୁ ପ୍ରକାଶ ପାଇଛି । ତେଣୁ ଏହି ଅସୁସ୍ଥତା କାରଣରୁ ସେ ଡାକ୍ତରଖାନାରେ ଭର୍ତ୍ତି ହୋଇଥିବା ଅନୁମାନ କରାଯାଉଛି ।
ଏନେଇ ଜନୈକ ସରକାରୀ ଅଧିକାରୀଙ୍କ ସୂଚନା ମୁତାବକ ସୋମବାର ଗୋଟିଏ ଦିନିଆ ସ୍ବାସ୍ଥ୍ୟ ପରୀକ୍ଷା ପାଇଁ ଆବେ ସ୍ଥାନୀୟ କେଇଓ ୟୁନିଭର୍ସିଟି ହସ୍ପିଟାଲରେ ଭର୍ତ୍ତି ହୋଇଛନ୍ତି । ସେପଟେ ରବିବାର ଦେଶର ପୂର୍ବତନ ଅର୍ଥମନ୍ତ୍ରୀ ଅକିରା ଅମାରି ମତ ଦେଇ କହିଥିଲେ କି ପ୍ରଧାନମନ୍ତ୍ରୀଙ୍କୁ ବର୍ତ୍ତମାନ ସ୍ବାସ୍ଥ୍ୟ ପ୍ରତି ଧ୍ୟାନ ଦେବାର ସମୟ ଆସିଛି । ଅକିରାଙ୍କ ଏହି ମତକୁ ନେଇ ଆବେଙ୍କ ଖରାପ ସ୍ବାସ୍ଥ୍ୟ ନେଇ ଅନେକ କଳ୍ପନା ଜଳ୍ପନା କରାଯାଇଥିଲା ।
ସୂଚନା ମୁତାବକ ପ୍ରଧାନମନ୍ତ୍ରୀ ଭାବେ 2006 ମସିହାରେ ଦାୟିତ୍ବ ଗ୍ରହଣ କରିବା ପରେ 65 ବର୍ଷୀୟ ଆବେ ଅଲସର ରୋଗର ଚିକିତ୍ସା ପାଇଁ 2007 ମସିହାରେ କିଛି ସମୟର ବିରତି ନେଇଥିଲେ । ସେପଟେ ଚଳିତ ମାସ ଆରମ୍ଭରେ ଜାପାନର ସର୍ବୋଚ୍ଚ ମୁଖପାତ୍ର ତଥା କ୍ୟାବିନେଟ ମୁଖ୍ୟ ସଚିବ ୟୋସିହିଦେ ସୁଗା ଆବେଙ୍କ ଖରାପ ସ୍ବାସ୍ଥ୍ୟ ନେଇ ପରୋକ୍ଷରେ ସୂଚନା ଦେଇଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
