ତେହରାନ: ଇରାନର ମେଜର ଜେନେରାଲ କାଶିମ ସୁଲେମାନିଙ୍କୁ ଆମେରିକା ହତ୍ୟା କରିବା ପରେ ଉଭୟ ଦେଶ ମଧ୍ୟରେ ବିବାଦ ବଢିବାରେ ଲାଗିଛି । ଘଟଣା ପରେ ୱାଶିଂଟନ ଓ ତେହେରାନ ମଧ୍ୟରେ ଯୁଦ୍ଧ ପରିସ୍ଥିତି ଉପୁଜିଛି। ଆମେରିକା ଇରାନର ୫୨ ଟି ସ୍ଥାନକୁ ଧ୍ଵଂସ କରିବାକୁ ଚେତାବନୀ ଦେଇଥିବା ବେଳେ ଇରାନ ମଧ୍ୟ ଆମେରିକାକୁ କଡା ଜବାବ ଦେବାକୁ ପ୍ରସ୍ତୁତ ରହିଛି । ଇରାନ ଆମେରିକାର ୧୪୦ ଟି ସ୍ଥାନକୁ ଧ୍ବଂସ କରିଦେବାକୁ ଧମକ ଦେଇଛି ।
ଯଦି ଇରାନ ଆମେରିକାର ଯବାନ କିମ୍ବା ସମ୍ପତ୍ତି ଉପରେ ଆକ୍ରମଣ କରିବ ତାହେଲେ ଇରାନର 52ଟି ଐତିହାସିକ ସ୍ଥାନକୁ ଟାର୍ଗେଟ କରି ନିମିଷକ ମଧ୍ୟରେ ଧ୍ଵଂସ କରିଦେବୁ ବୋଲି ଗତ ଶନିବାର ଦିନ ଚେତାବନୀ ଦେଇଥିଲେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ତେବେ ଆଜି ଆମେରିକାକୁ ଏହାର ପାଲଟା ଜବାବ ଦେଇଛି ଇରାନ । ଯଦି ଆମେରିକା ଇରାନର କୌଣସି ସ୍ଥାନରେ ଆକ୍ରମଣ କରେ ତେବେ ଏହାର କଡା ଜବାବ ଦିଆଯିବ । ଏଥିପାଇଁ ଆମେରିକାର 140ଟି ସ୍ଥାନକୁ ଟାର୍ଗେଟରେ ରଖାଯାଇଛି ବୋଲି ଇରାନର କୁଦ୍ସ ଫୋର୍ସ ଚେତାବନୀ ଦେଇଛି ।
