ଢାକା: ବାଂଲାଦେଶରେ କୋରୋନା ସଂକ୍ରମଣ ମାତ୍ରା ବେଲଗାମ ହୋଇ ପଡିଥିବା ବେଳେ ସୋମବାର ଆଖି ବୁଜିଛନ୍ତି ଦେଶର ପ୍ରତିରକ୍ଷା ସଚିବ ଅବଦୁଲ୍ଲା ଅଲ ମୋହସିନ ଚୌଧୁରୀ । ସେ କୋରୋନାରେ ଆକ୍ରାନ୍ତ ଥିବା ବେଳେ ମୃତ୍ୟୁ ବେଳକୁ ଡାକ୍ତରଖାନାରେ ତାଙ୍କର ଚିକିତ୍ସା ଜାରି ରହିଥିଲା । କୋରୋନା ପଜିଟିଭ ଚିହ୍ନଟ ହେବା ପରେ ତାଙ୍କୁ ଢାକାର ମିଳିତ ମିଲିଟାରୀ ହସ୍ପିଟାଲରେ ଭର୍ତ୍ତି କରାଯାଇଥିଲା ।
କୋରୋନା ଚିକିତ୍ସା ଜାରି ରହିଥିବା ବେଳେ ସୋମବାର ସକାଳ 9ଟା 30 ସମୟରେ ସେ ପ୍ରାଣ ହରାଇଥିଲେ । ମେ’ 29ରେ ତାଙ୍କୁ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ତେବେ ଧିରେ ଧିରେ ତାଙ୍କ ଅବସ୍ଥା ଗମ୍ଭୀର ହେବାରୁ ଜୁନ 6ରେ ତାଙ୍କୁ ସ୍ବତନ୍ତ୍ର ୱାର୍ଡକୁ ସ୍ଥାନାନ୍ତର କରାଯାଇଥିଲା । ତଥାପି ତାଙ୍କ ସ୍ବାସ୍ଥ୍ୟାବସ୍ଥାରେ କୌଣସି ପରିବର୍ତ୍ତନ ନହେବାରୁ ଜୁନ 18ରେ ତାଙ୍କୁ ଭେଣ୍ଟିଲେଟରରେ ରଖାଯାଇଥିଲା ।
ଜାନୁଆରୀ ମାସରେ ସେ ପ୍ରତିରକ୍ଷା ସଚିବ ଭାବେ ଦାୟିତ୍ବ ଗ୍ରହଣ କରିଥିବା ବେଳେ ଜୁନ 14ରେ ତାଙ୍କୁ ବରିଷ୍ଠ ପଦବୀକୁ ଉନ୍ନୀତ କରାଯାଇଥିଲା । ତେବେ ବାଂଲାଦେଶରେ ବର୍ତ୍ତମାନ କୋରୋନା ଆକ୍ରାନ୍ତ ସଂଖ୍ୟା 137,787ରେ ପହଞ୍ଚିଥିବା ବେଳେ ମୃତ୍ୟୁ ସଂଖ୍ୟା 1738ରେ ପହଞ୍ଚିଛି ।
@IANS
