ଇସଲାମାବାଦ: ନିଷ୍ଠୁରତା ଓ ନିର୍ଦ୍ଦୟତାର ଚରମ ସୀମାରେ ପାକିସ୍ତାନ । କୃରତାର ସହର ପାକିସ୍ତାନରୁ ସାମ୍ନାକୁ ଆସିଛି ଲଜ୍ଜାଜନକ ଦୃଶ୍ୟ । ପଦାରେ ପଡିଛି ପାକିସ୍ତାନରେ ମହିଳା ସମ୍ମାନର ପ୍ରକୃତ ସତ ।
ପାକିସ୍ତାନରେ ଜଣେ ମହିଳାଙ୍କ ଉପରେ ହୋଇଥିବା କ୍ରୁର ଆକ୍ରମଣର ଭିଡିଓ ଭାଇରାଲ ହେଉଛି । ଭାଇରାଲ ହେଉଥିବା ଭିଡିଓରେ ପୁରୁଷଙ୍କ ଭିଡ ଜଣେ ମହିଳାଙ୍କୁ ଅମାନୁଷିକ ଭାବରେ ମାଡ ମାରିବା ସହିତ ତାଙ୍କ ପୋଷାକ ଚିରି ଦେଉଛନ୍ତି । ଆକ୍ରମଣର ଶିକାର ହୋଇଥିବା ମହିଳା ଜଣଙ୍କ ଟିକ୍ଟକ ଷ୍ଟାର ହୋଇଥିବାବେଳେ ବେଶ ଲୋକପ୍ରିୟତା ହାସଲ କରିଥିଲେ ।
୧୪ ଅଗଷ୍ଟରେ ଯେବେ ପାକିସ୍ତାନ ନିଜ ସ୍ବାଧୀନତାର ଉତ୍ସବ ପାଳନ କରୁଥିଲା, ସେବେ ଲାହୋରରେ ଘଟିଥିଲା ମହିଳାଙ୍କୁ ମାଡ ମାରିବା ସହିତ ପୋଷାକ ଚିରିଦେବାର ଲଜ୍ଜାଜନକ ଘଟଣା । ସୂଚନା ଅନୁଯାୟୀ ଏହି ଘଟଣା ଲାହୋରର ଗ୍ରେଟର ଇକବାଲ ପାର୍କରେ ହୋଇଛି ।
ମହିଳାଙ୍କ ସହ ଏହି ଘଟଣାକୁ ନେଇ ସୋସିଆଲ ମିଡିଆରେ ଅସନ୍ତୋଷ ପ୍ରକାଶ କରିଛନ୍ତି ୟୁଜର୍ସ। ମହିଳା ଜଣକ ଏ ବାବଦରେ ପୋଲିସ ନିକଟରେ ଅଭିଯୋଗ କରିଛନ୍ତି । ସେ ଅଭିଯୋଗ କରିଛନ୍ତି ଯେ ପ୍ରାୟ 400 ଲୋକଙ୍କ ଭିଡ ତାଙ୍କୁ ଆକ୍ରମଣ କରିଥିଲେ। ଯେତେବେଳେ ଏହି ଆକ୍ରମଣ ହୋଇଥିଲା, ମହିଳା ଜଣକ ମିନାର-ଏ-ପାକିସ୍ତାନ ନିକଟରେ କିଛି ବନ୍ଧୁଙ୍କ ସହ ଭିଡିଓ ସୁଟିଂ କରୁଥିଲେ।
ମହିଳା ଜଣକ କହିଛନ୍ତି ଯେ ତାଙ୍କ ପୋଷାକ ଚିରି ଦିଆଯାଇଥିଲା। ମହିଳା ଜଣକ ଆହୁରି ମଧ୍ୟ ଅଭିଯୋଗ କରିଛନ୍ତି ଯେ ସେ ତାଙ୍କ ପ୍ରତିରକ୍ଷା ପାଇଁ ଚିତ୍କାର କରିଥିଲେ, କିନ୍ତୁ ସାହାଯ୍ୟ କରିବାକୁ କେହି ଆଗେଇ ନଥିଲେ। ତାଙ୍କ ଅଳଙ୍କାର ଚୋରି ହୋଇଥିବା ମହିଳା ଅଭିଯୋଗ କରିଛନ୍ତି।
