ଜେରୁସେଲମ: ଇସ୍ରାଏଲରେ ଚାଞ୍ଚଲ୍ୟ । ରବିବାର ବୈଦେଶିକ ମନ୍ତ୍ରଣାଳୟର ସୂଚନା ମୁତାବକ ହର୍ଜିଲିୟା ସହରରେ ଠାବ ହୋଇଛି ଚୀନ ରାଷ୍ଟ୍ରଦୂତ ଡୁ ୱେଇସଙ୍କ ମର ଶରୀର । ସମ୍ପୃକ୍ତ ସହରରେ ଥିବା ତାଙ୍କର ସରକାରୀ ବାସଭବନରୁ ତାଙ୍କର ମୃତଦେହ ଉଦ୍ଧାର ହୋଇଥିବା ଜଣାପଡିଛି ।
ସୂଚନା ମୁତାବକ ରବିବାର ସକାଳେ ତାଙ୍କ ସହକାରୀ ତାଙ୍କୁ ଉଠାଇବାକୁ ଯିବା ସମୟରେ ଦେଖିଥିଲେ କି ୱେଇସ ବିଛଣା ଉପରେ ନିସ୍ତେଜ ପଡି ରହିଛନ୍ତି । ପାଖରୁ ଯାଇ ଦେଖିବା ପରେ ଜଣା ପଡିଥିଲା କି ନିଶ୍ବାସ ବନ୍ଦ ହୋଇ ସାରିଛି । ତେବେ ଶନିବାର ରାତିରେ ତାଙ୍କ ହୃତସ୍ପନ୍ଦନ ବନ୍ଦ ହୋଇଥିବା ଅନୁମାନ କରାଯାଉଛି ।
ଏନେଇ ଇସ୍ରାଏଲ ବୈଦେଶିକ ମନ୍ତ୍ରଣାଳୟ ପକ୍ଷରୁ କୁହାଯାଇଛି କି ନିର୍ଦ୍ଦେଶକ ଜେନେରାଲ ୟୁଭାଲ ରୋତେମ ଏ ବିଷୟରେ ସହକାରୀ ରାଷ୍ଟ୍ରଦୂତ ଦାଇ ୟୁମିଙ୍ଗଙ୍କ ସହ କଥା ହୋଇ ଗଭୀର ଶୋକ ପ୍ରକାଶ କରିଛନ୍ତି । ଏଥିସହ ଆବଶ୍ୟକ କ୍ଷେତ୍ରରେ ସମସ୍ତ ସାହାଯ୍ୟ କରିବା ପାଇଁ ମଧ୍ୟ ଇସ୍ରାଏଲ ଇଚ୍ଛା ପ୍ରକାଶ କରିଥିବା କୁହାଯାଇଛି । ତେବେ ମୃତକଙ୍କ ପରିବାର ଇସ୍ରାଏଲରେ ନଥିବା ଜଣାପଡିଛି ।
ୱେଇସ ଫେବୃଆରୀ 15ରେ ନିଜ ପଦ ଗ୍ରହଣ କରିବା ପାଇଁ ଇସ୍ରାଏଲ ଆସିଥିଲେ ଏବଂ ପହଞ୍ଚିବାର 2 ସପ୍ତାହ ପର୍ଯ୍ୟନ୍ତ କ୍ବାରେନଣ୍ଟାଇନରେ ରହିଥିଲେ । ଦେଶରେ ଲାଗୁ ହୋଇଥିବା ଲକଡାଉନ କଟକଣା ପାଇଁ ସେ ନିଜ ଜରୁରୀ କାଗଜ ପତ୍ର ଯାଞ୍ଚ ପାଇଁ ରାଷ୍ଟ୍ରପତି ରିୟୁଭେନ ରିଭଲିନଙ୍କୁ ଦେଖାଇ ମଧ୍ୟ ପାରିନଥିଲେ । ତେବେ ଏନେଇ ଚୀନ ପକ୍ଷରୁ କୌଣସି ପ୍ରତିକ୍ରିୟା ଏଯାବତ ମିଳିପାରିନାହିଁ ।
@IANS
