ବେଜିଂ: କିଛି ଦିନର ବିରତି ପରେ ପୁଣି ଚୀନର ଆରମ୍ଭ ହୋଇଛି କୋରୋନା ସଂକ୍ରମଣ । ଏନେଇ ବେଜିଂ ନାଗରିକଙ୍କୁ କୋରୋନା ସଂକ୍ରମଣରୁ ରକ୍ଷା କରିବା ପାଇଁ ଶନିବାର ଜାରି ହୋଇଛି ନୂଆ ଗାଇଡଲାଇନ । ଏହି ନୂଆ ଗାଇଡଲାଇନ ଅନୁଯାୟୀ ସହରବାସୀଙ୍କୁ ମାସ୍କ ପିନ୍ଧିବା ବାଧ୍ୟତାମୂଳକ ରହିବା ସହ ନିୟମିତ ସମୟ ବ୍ୟବଧାନରେ ହାତ ଧୋଇବା ଓ ସାମାଜିକ ଦୂରତା ବଜାୟ ରଖିବା ପାଇଁ କଡା ନିର୍ଦ୍ଦେଶ ଦିଆଯାଇଛି ।
ବେଜିଂର ହୋଲସେଲ ଫୁଡ ମାର୍କେଟରୁ ପୁନର୍ବାର ସଂକ୍ରମଣ ସ୍ଥାନୀୟ ସଂକ୍ରମଣ ଆକାରରେ ଆରମ୍ଭ ହୋଇଥିବା ବେଳେ ସହରବାସୀଙ୍କୁ ଅଧିକ ସତର୍କ ରହିବାର ଆବଶ୍ୟକ ରହିଥିବା ଗାଇଡଲାଇନରେ ସ୍ପଷ୍ଟ କରାଯାଇଛି । ଜନଗହଳିପୂର୍ଣ୍ଣ ଅଞ୍ଚଳ, ଡାକ୍ତରଖାନା, ସର୍ବସାଧାରଣ ପରିବହନମାନଙ୍କରେ ମାସ୍କ ବାଧ୍ୟତାମୂଳକ କରାଯିବା ନେଇ ସୂଚନା ଦେଇଛି ବେଜିଂ ଡିଜିଜ୍ କଣ୍ଟ୍ରୋଲ ଆଣ୍ଡ ପ୍ରିଭେନ୍ସନ ସେଣ୍ଟର ।
ଯେଉଁ ବ୍ୟକ୍ତିଙ୍କୁ ଶ୍ବାସକ୍ରିୟାଜନିତ ଅସୁବିଧା ଅଛି ସେମାନଙ୍କ ଜନଗହଳିପୂର୍ଣ୍ଣ ଅଞ୍ଚଳକୁ ଯିବା ପାଇଁ ବାରଣ କରାଯାଇଛି । ଏଥିସହ ମାଛ, ମାଂସ, ଅଣ୍ଡା ଓ ସାମୂଦ୍ରିକ ଖାଦ୍ୟ ଆଦି ରୋଷେଇ କରିବା ସମୟରେ ହାତକୁ ବାରମ୍ବାର ସଫା କରିବା ପାଇଁ କୁହାଯାଇଛି । ଏଥିସହ ଅଧୁଆ ହାତକୁ ମୁହଁ, ନାକ, ପାଟି ଓ ଆଖିଠାରୁ ଦୂରରେ ରଖିବାକୁ ପରାମର୍ଶ ଦିଆଯାଇଛି । ବର୍ତ୍ତମାନ ସୁଦ୍ଧା ଚୀନରେ 84,725ଟି କୋରୋନା ସଂକ୍ରମଣ ମାମଲା ସାମ୍ନାକୁ ଆସିଥିବା ବେଳେ 4642 ଜଣଙ୍କ ମୃତ୍ୟୁ ହୋଇଥିବା ଜଣାପଡିଛି ।
@IANS
