ଢାକା: ସାରା ବିଶ୍ବରେ କୋରୋନା ନିଜର କାୟା ବିସ୍ତାର କରି ଚାଲିଥିବା ବେଳେ ଏହାର ପ୍ରଭାବରେ ଗଡି ଚାଲିଛି ଗୋଟିଏ ପରେ ଗୋଟିଏ ମୁଣ୍ଡ । ବାଂଲାଦେଶରେ ମଧ୍ୟ କୋରୋନା ସ୍ଥିତିରେ ବିଶେଷ ସୁଧାର ଆସିନଥିବା ଦେଖିବାକୁ ମିଳିଛି । ଏମିତିରେ ଦେଶର ଜନୈକ ମନ୍ତ୍ରୀଙ୍କର କୋରୋନାରେ ମୃତ୍ୟୁ ହୋଇଥିବା ଜଣାପଡିଛି । ମୃତ୍ୟୁ ପୂର୍ବରୁ ସେ କୋରୋନାରେ ଆକ୍ରାନ୍ତ ଥିବା ଜଣା ନଥିବା ବେଳେ ମୃତ୍ୟୁ ପରେ ରିପୋର୍ଟରେ ସେ ପଜିଟିଭ ଥିବା ଜଣା ପଡିଥିଲା ।
ମୃତକ ଜଣଙ୍କ ହେଉଛନ୍ତି ଦେଶର ଧାର୍ମିକ ବ୍ୟାପାର ମନ୍ତ୍ରୀ ଶେଖ ଅବଦୁଲ୍ଲା(75) । ଶନିବାର ରାତିରେ ଅସୁସ୍ଥତା କାରଣରୁ ତାଙ୍କୁ ସ୍ଥାନୀୟ ମିଲିଟାରୀ ହସ୍ପିଟାଲରେ ଭର୍ତ୍ତି କରାଯାଇଥିଲା । ସେଠାରେ ତାଙ୍କର ମୃତ୍ୟୁ ହୋଇଥିଲା । ହେଲେ ରବିବାର ମୃତଦେହ ବ୍ୟବଚ୍ଛେଦ ପରେ ସେ କୋରୋନାରେ ଆକ୍ରାନ୍ତ ଥିବା ଜଣା ପଡିଥିଲା । ମୃତ୍ୟୁ ପୂର୍ବରୁ ସେ ଶ୍ବାସକ୍ରିୟାରେ ବାଧା, ଛାତିରେ ଯନ୍ତ୍ରଣା ଆଦି ଅନୁଭବ କରୁଥିବା ଜଣା ପଡିଥିଲା । ତେବେ ବାଂଲାଦେଶରେ କୋରୋନାରେ ଆଖି ବୁଜିଥିବା ସବୁଠାରୁ ବୟସ୍କ ବ୍ୟକ୍ତି ହେଉଛନ୍ତି ଅବଦୁଲ୍ଲା ।
ଦେଶରେ ବର୍ତ୍ତମାନ ଅନ୍ୟ ଦୁଇ ମନ୍ତ୍ରୀ ମଧ୍ୟ କୋରୋନା ପଜିଟିଭ ଚିହ୍ନଟ ହୋଇଛନ୍ତି । ସେମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ସେମାନଙ୍କ ଚିକିତ୍ସା ଜାରି ରହିଛି । ସୂଚନା ମୁତାବକ ବାଂଲାଦେଶରେ ଶନିବାର 2856 ନୂଆ ମାମଲା ସହ ମୋଟ ଆକ୍ରାନ୍ତ ସଂଖ୍ୟା 84,379ରେ ପହଞ୍ଚିଛି । ସେପଟେ ମୃତ୍ୟୁ ସଂଖ୍ୟା 1139ରେ ପହଞ୍ଚିଥିବା କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ସ୍ପଷ୍ଟ କରିଛି ।
@IANS
