ରିୟାଦ: ୟେମେନରେ ସାଉଦି ଆରବ ଏବଂ ହୁତି ବିଦ୍ରୋହୀଙ୍କ ମଧ୍ୟର ବିବାଦ ବଢିବାରେ ଲାଗିଛି । ୟେମେନରେ ନିଜ ବିମାନ ଦୁର୍ଘଟଣା ହେବା ପରେ ହୁତି ବିଦ୍ରୋହୀଙ୍କ ଉପରେ ଆକ୍ରମଣ କରି ଏହାର ପ୍ରତିଶୋଧ ନେଇଛି ସାଉଦି ଆରବ । ଶନିବାର ସାଉଦି ଆରବର ନେତୃତ୍ବାଧୀନ ସେନା ୟେମେନରେ ଏୟାର ଷ୍ଟ୍ରାଇକ କରିଛନ୍ତି । ଏଥିରେ 31ଜଣ ସାଧାରଣ ନାଗରିକଙ୍କର ମୃତ୍ୟୁ ଘଟିଥିବା ଜଣା ପଡିଛି ।
ସୂଚନା ମୁତାବକ, ଶୁକ୍ରବାର ୟେମେନର ଅଲ ଜବାଫ ପ୍ରାନ୍ତରେ ସାଉଦି ଆରବର ଏକ ଯୁଦ୍ଧ ବିମାନ ଦୁର୍ଘଟଣାଗ୍ରସ୍ତ ହୋଇଥିଲା । ୟେମେନ ସରକାରଙ୍କ ସାହାଯ୍ୟ ପାଇଁ ଏକ ଅପରେସନରେ ଭାଗ ନେଇଥିବାବେଳେ ବିମାନଟି ଦୁର୍ଘଟଣାଗ୍ରସ୍ତ ହୋଇଥିଲା । ଶନିବାର ଏହି ଦୁର୍ଘଟଣାଗ୍ରସ୍ତ ବିମାନକୁ ଦେଖିବା ପାଇଁ ଲୋକ ଜମା ହୋଇଥିବାବେଳେ ସାଉଦି ଆରବ ପକ୍ଷରୁ ଏୟାର ଷ୍ଟ୍ରାଇକ କରାଯାଇଥିବା ଜଣା ପଡିଛି ।
ସେପଟେ ସାଉଦି ଆରବର ଏହି ବିମାନ ଦୁର୍ଘଟଣାର କାରଣ ଏବେ ସୁଦ୍ଧା ୟେମେନ କିମ୍ବା ସାଉଦି ସରକାର ସ୍ପଷ୍ଟ କରିନାହାଁନ୍ତି । କିନ୍ତୁ ଏହି ଦୁର୍ଘଟଣା ପାଇଁ ୟେମେନର ହୁତି ବିଦ୍ରୋହୀ ନିଜକୁ ଦାୟୀ କରିଥିଲେ । ଆଡଭାନ୍ସ ସରଫେସ ଟୁ ଏୟାର ମିସାଇଲ ଦ୍ବାରା ଏହି ବିମାନକୁ ଖସାଇଥିବା ସେମାନେ କହିଥିଲେ ।
@ANI
