ଇଲଲାମବାଦ: ବାଲୋକୋଟରେ ହୋଇଥିବା ଏୟାର ଷ୍ଟ୍ରାଇକୁ ପୁରିଛି 3 ମାସ । କିନ୍ତୁ ଏବେବି ଲିଭୁନି ପାକିସ୍ତାନ ମନରୁ ଭୟ । ଯେଉଁଥିପାଇଁ ସୀମା ଜଗିଛନ୍ତି 300ରୁ ଉର୍ଦ୍ଧ୍ବ ପାକ ସେନା ଟ୍ୟାଙ୍କର । ସୂତ୍ରନୂଯାୟୀ, ଯୁଦ୍ଧ କରିବା ସ୍ଥିତିରେ ଶକରଗଡ ସେକ୍ଟରରେ ପାକର ଯବାନ ପ୍ରସ୍ତୁତ ରହିଛନ୍ତି ।
14 ଫେବୃଆରୀରେ ଜମ୍ମୁ କଶ୍ମୀର ସ୍ଥିତ ପୁଲଓ୍ବାମା ଆଟାକ ପରେ ପାକ ସେନା ବହୁଳ ମାତ୍ରାରେ ଯବାନଙ୍କୁ ସୀମାରେ ନିୟୋଜିତ କରି ଦେଇଥିଲା । କିନ୍ତୁ ଏହାପରେ କିଛି ଯବାନଙ୍କୁ ହଟାଇ ଦିଆଯାଇଥିଲା । ଖବର ମୁତାବକ ପୁଣିଥରେ ସୀମାରେ ପାକ ସେନା ପକ୍ଷରୁ 3 ଜଣ ମେଜର ବ୍ରିଗେଡ, 124 ଆର୍ମଡ ବ୍ରିଗେଡ, 125 ଆର୍ମଡ ବ୍ରିଗେଡଙ୍କ ବ୍ୟତୀତ 8 ରୁ 15 ଡିଭିଜନକୁ ନିୟୋଜିତ କରାଯାଇଛି ।
ଅନ୍ୟପଟେ ଭାରତକୁ ଲାଗି ରହିଥିବା ଆକାଶମାର୍ଗକୁ ମଧ୍ୟ ପାକିସ୍ତାନ ବନ୍ଦ ରଖିଛି । ପାକିସ୍ତାନର ବେସାମରିକ ବିମାନ ଚଳାଚଳ ମନ୍ତ୍ରାଳୟର ସୂଚନାନୂଯାୟୀ, ଭାରତୀୟ ବିମାନ ପାଇଁ ଏୟାରସ୍ପେସ ଖୋଲିବା ନେଇ ଆସନ୍ତା 15 ତାରିଖରେ ବିଚାର କରାଯିବ । ଫେବୃଆରୀ 26ରେ ବାଲାକୋଟରେ ହୋଇଥିବା ଏୟାରଷ୍ଟ୍ରାଇକ ପରଠାରୁ ଏୟାରସ୍ପେସ ବନ୍ଦ ରଖିଛି ପାକିସ୍ତାନ ।
ମାର୍ଚ୍ଚ 27 ତାରିଖରେ ସମସ୍ତ ବିମାନ ପାଇଁ ଆକାଶମାର୍ଗ ଖୋଲି ଦେଇଥିଲା । କିନ୍ତୁ ଦିଲ୍ଲୀ, ବ୍ୟାଙ୍କକ ଓ କ୍ୱାଲାଲାମପୁର ଯିବାକୁ ଥିବା ବିମାନ ଓ ସେପଟୁ ଆସିବାକୁ ଥିବା ବିମାନ ପାଇଁ ଏହି ମାର୍ଗ ବନ୍ଦ ରଖିଛି ପାକିସ୍ତାନ । ତେବେ ପାକ ପ୍ରଧାନମନ୍ତ୍ରୀ ଇମ୍ରାନ ଖାନ, ବିଜ୍ଞାନ ଓ ପ୍ରଯୁକ୍ତି ବିଦ୍ୟା ମନ୍ତ୍ରୀ ଫବାଦ ଚୌଧୂରୀ ଏକ ଗଣମାଧ୍ୟମକୁ ସୂଚନା ଦେଇଛନ୍ତି ଯେ, ଭାରତର ଲୋକସଭା ନିର୍ବାଚନ ନସରିବା ପର୍ଯ୍ୟନ୍ତ ହିଁ ଏହି ମାର୍ଗ ବନ୍ଦ ରହିବ । ଆଉ ନିର୍ବାଚନ ପୂର୍ବରୁ ପାକ ଓ ଭାରତ ସମ୍ପର୍କରେ କିଛି ସୂଧାର ଆସିବା ପରି ଲାଗୁନାହିଁ ବୋଲି ମନ୍ତ୍ରୀ ଫବାଦ ଚୌଧୂରୀ କହିଛନ୍ତି ।
