ବେଜିଂ: ନିଜ ପଡୋଶୀ ଦେଶଙ୍କୁ ଲଗତାର ଶକ୍ତି ପ୍ରୟୋଗ କରି ଡରାଇବାକୁ ଚେଷ୍ଟା କରୁଛି ଚୀନ । ଭାରତ ଏବଂ ହଂକଂ ପରେ ଏବେ ଭିଏତନାମ ସହ ବିବାଦ ଆରମ୍ଭ କରିଛି ଡ୍ରାଗନ ଚୀନ । ଏକ ଡାଟା ଅନୁଯାୟୀ, ଚୀନର ଏକ ତଟରକ୍ଷକ ଜାହାଜ ଦକ୍ଷିଣ ଚୀନ ସାଗରରେ ବେନେଗାର୍ଡ ନିକଟରେ ଠାବ ହୋଇଛି । ଏହା ଚୀନ ଏବଂ ଭିଏତନାମ ମଧ୍ୟର ବିବାଦୀୟ ସ୍ଥଳ ବୋଲି ଜଣାପଡିଛି ।
ସୂଚନା ଅନୁଯାୟୀ, ଚୀନ ପକ୍ଷରୁ ଦକ୍ଷିଣ ଚୀନ ସାଗରରେ ସର୍ଭେ ପୋତ ପଠାଇବାର ପ୍ରାୟ 1 ସପ୍ତାହ ମଧ୍ୟରେ ଏହି କ୍ଷେତ୍ରରେ ଚୀନର ଜାହାଜ ଦୃଶ୍ୟମାନ ହୋଇଛି । ଭିଏତନାମ ତେଲ ଶୋଧକ ବ୍ଲକର 30 ମାଇଲ ଭିତରେ ଚୀନର ତଟରକ୍ଷକ ଜାହାଜ 5402 କୁ ଦେଖିବାକୁ ମିଳିଛି । ଏହି ଜାହାଜ ବ୍ଲକ 06.01 ନିକଟରେ ପାଟ୍ରୋଲିଂ କରୁଥିଲା ।
ଭିଏତନାମର ଏହି ତେଲ ଶୋଧକ ବ୍ଲକର ଲାଇସେନ୍ସ ଋଶ କମ୍ପାନୀ ରୋଜନେଫ୍ଟକୁ ଦିଆଯାଇଥିଲା । ଏହି ବ୍ଲକରେ ଭିଏତନାମ ପକ୍ଷରୁ ଶୋଧ ଯୋଜନା କରାଯାଇଥିବାରୁ ଏହାକୁ ନେଇ ଗତବର୍ଷ ଚୀନ ଏବଂ ଭିଏତନାମ ମଧ୍ୟରେ ବିବାଦ ବଢିଯାଇଥିଲା ।
ତେବେ ଏହି ଜାହାଜର ଉପସ୍ଥିତି ଚୀନ ଏବଂ ଭିଏତନାମ ମଧ୍ୟରେ ଦୀର୍ଘ ଦିନରୁ ଚାଲିଥିବା ବିବାଦକୁ ଆହୁରି ବଢାଇଦେଇଛି । ତେବେ ନିକଟ ଅତୀତରେ ପୂର୍ବ ଲଦାଖରେ ଭାରତ ଏବଂ ଚୀନ ମଧ୍ୟରେ ସଂଘର୍ଷ ଏବଂ ଚୀନର ନୂତନ ସୁରକ୍ଷା ଆଇନକୁ ନେଇ ହଂକଂରେ ବ୍ୟାପକ ବିରୋଧ ଆଦି ଚୀନର ଆକ୍ରୋଶକୁ ପ୍ରତିଫଳିତ କରୁଛି ।
