କାବୁଲ: ପିତାମାତାଙ୍କ ହତ୍ୟାକାରୀକୁ ମାରି ପ୍ରତିଶୋଧ ନେଲା ଝିଅ । 2 ଆତଙ୍କବାଦୀଙ୍କୁ ଜୀବନରୁ ମାରି ବଦଲା ନେଇଛି ଜଣେ ନାବାଳିକା । ତାଲିବାନୀ ସଙ୍ଗଠନର 2 ଆତଙ୍କୀଙ୍କୁ ହତ୍ୟା କରିବା ସହ ଅନେକଙ୍କୁ ଆହତ କରିଛି । ଘଟଣାଟି ଆଫଗାନିସ୍ତାନର ଘୋର ପ୍ରଦେଶର ଏକ ଗାଁରେ ଘଟିଛି । ଯାହାକି ଏବେ ଚର୍ଚ୍ଚାର ବିଷୟ ପାଲଟିଛି ।
ଗଲ୍ଫ ନ୍ୟୁଜ ମୁତବାକ ସରକାର ଏହି ଘଟଣା ଉପରେ ପୃଷ୍ଟି କରିଛନ୍ତି । ଗତ ସପ୍ତାହରେ ଘୋର ପ୍ରଦେଶର କମାର ଗୁଲଙ୍କ ଘରେ ପଶି ଆତଙ୍କବାଦୀ ତାଙ୍କ ବାପାଙ୍କୁ ଖୋଜାଖୋଜି କରିଥିଲେ । ଏନେଇ ସ୍ଥାନୀୟ ପୋଲିସ ମୁଖ୍ୟ ହବିବୁରାହମାନ ମଲେକଜଡା ଗଣମାଧ୍ୟମକୁ ସୂଚନା ଦେଇଛନ୍ତି । କମାରଙ୍କ ବାପା ସରକାରୀ ସମର୍ଥକ ହୋଇଥିବାକୁ ଆତଙ୍କୀବାଦୀ ତାଙ୍କୁ ଘରକୁ ଭିତରୁ ଘୋଷାଡି ଆଣିଥିଲେ । ଏହାକୁ ଯେତେବେଳେ ତାଙ୍କ ପତ୍ନୀ ବିରୋଧ କରିଥିଲେ, ତାଲିବାନ ଆତଙ୍କବାଦୀମାନେ ଏହି ଦମ୍ପତିଙ୍କୁ ନିଜ ଘର ବାହାରେ ହତ୍ୟା କରିଥିଲେ ବୋଲି ମଲେକଜଡା କହିଛନ୍ତି ।
ଏହି ସମୟରେ ଘର ଭିତରେ ଥିବା କାମାର ଗୁଲ ଘରେ ଥିବା AK-47 ବନ୍ଧୁକ ନେଇ ପ୍ରଥମେ ଦୁଇ ଆତଙ୍କବାଦୀଙ୍କୁ ହତ୍ୟା କରିଥିଲେ । ଯେଉଁମାନେ ତାଙ୍କ ପିତାମାତାଙ୍କୁ ହତ୍ୟା କରିଥିଲେ ଏବଂ ପରେ ଅନ୍ୟ କେତେକଙ୍କୁ ଆହତ କରିଥିଲେ। କମାରଙ୍କ ବୟସ ପାଖାପାଖି 14ରୁ 16 ବର୍ଷ ହେବ ବୋଲି ସରକାରୀ ସୂତ୍ରରୁ ଜଣାପଡିଛି ।
ପରେ ତାଲିବାନର ଅନ୍ୟ କେତେ ଜଣ ଆତଙ୍କବାଦୀ ତାଙ୍କ ଘରକୁ ଆକ୍ରମଣ କରିବାକୁ ଆସିଥିଲେ, କିନ୍ତୁ ବନ୍ଧୁକଧାରୀ ପରେ କିଛି ଗ୍ରାମବାସୀ ତଥା ସରକାରୀ ସମର୍ଥକ ମିଳି ସେମାନଙ୍କୁ ଘଉଡାଇ ଦେଇଥିଲେ।
ବ୍ୟୁରୋ ରିପୋର୍ଟ,ଇଟିଭି ଭାରତ
