ସିଓଲ: ଦକ୍ଷିଣ କୋରିଆରେ ପହଞ୍ଚି ଜଣେ ପରେ ଜଣେ ଆମେରିକୀୟ ଯବାନ କୋରୋନାରେ ସଂକ୍ରମିତ ହେବାରେ ଲାଗିଛନ୍ତି । ଏମିତିରେ ରବିବାର ଦକ୍ଷିଣ କୋରିଆରେ ଯୋଗ ଦେଇଥିବା 7 ଜଣ ଆମେରିକୀୟ ପୁଣି କୋରୋନାରେ ସଂକ୍ରମିତ ହୋଇଥିବା ଜଣା ପଡିଛି । ଏଥିସହ ସେମାନଙ୍କ 5 ଜଣ ସହଯୋଗୀ ମଧ୍ୟ ପଜିଟିଭ ଚିହ୍ନଟ ହୋଇଥିବା ଜଣା ପଡିଛି । ଏନେଇ ୟୁଏସ ଫୋର୍ସ କୋରିଆ ସୋମବାର ସୂଚନା ଦେଇଛନ୍ତି ।
ସୂଚନା ଅନୁଯାୟୀ ସଦ୍ୟ କାର୍ଯ୍ୟରେ ଯୋଗ ଦେଇଥିବା ଏହି ଯବାନଙ୍କ ମଧ୍ୟରୁ 5 ଜଣ ସର୍ଭିସ ସଦସ୍ୟ ଓ ସେମାନଙ୍କର 3 ଜଣ ପରିବାର ସଦସ୍ୟ ପ୍ୟେଓଙ୍ଗଟେକର ଓସାନ ଏୟାରବେସରେ ଗତ ଜୁଲାଇ 14, 19, 20 ଓ 22ରେ ପର୍ଯ୍ୟାଯକ୍ରମେ ଆସି ପହଞ୍ଚିଥିଲେ । ଏହି ଏୟାରବେସଟି ସିଓଲଠାରୁ 70 କିଲୋମିଟର ଦୂରରେ ଅବସ୍ଥିତ । ତେବେ ଆମେରିକୀୟ ସରକାର ଏମାନଙ୍କୁ ଚାର୍ଟର୍ଡ ବିମାନ ଯୋଗେ ଦକ୍ଷିଣ କୋରିଆ ପଠାଇବାର ବ୍ୟବସ୍ଥା କରିଥିଲେ ।
ଏମାନଙ୍କ ବ୍ୟତୀତ ଅନ୍ୟ ସର୍ଭିସ ସଦସ୍ୟ ଓ ସେମାନଙ୍କ ପରିବାରବର୍ଗ ଆମେରିକାରୁ ଆସି ଇଞ୍ଚିଓନ ଅନ୍ତର୍ଜାତୀୟ ବିମାନବନ୍ଦରରେ ପହଞ୍ଚିଥିଲେ । ଏହି ବିମାନବନ୍ଦରଟି ସିଓଲର ପଶ୍ଚିମାଞ୍ଚଳରେ ଥିବା ବେଳେ ଜବାନମାନେ ବାଣିଜ୍ୟିକ ବିମାନ ଯୋଗେ ଗତ ଜୁଲାଇ 22 ଓ 24ରେ ଆସି ଏଠାରେ ପହଞ୍ଚିଥିଲେ । ସିଓଲରେ ପହଞ୍ଚିବା ପରେ କ୍ବାରେଣ୍ଟାଇନକୁ ପଠାଯିବା ପୂର୍ବରୁ ଏହି ସମସ୍ତ ସର୍ଭିସ ସଦସ୍ୟଙ୍କର କୋରୋନା ଟେଷ୍ଟିଂ କରାଯାଇଥିଲା । ଯେଉଁଥିରେ ପ୍ରାଥମିକ ପର୍ଯ୍ୟାୟରେ 10 ଜଣ ପଜିଟିଭ ଚିହ୍ନଟ ହୋଇଥିବା ବେଳେ ପରବର୍ତ୍ତୀ ଟେଷ୍ଟରେ ଅନ୍ୟ 2 ଜଣ ପଜିଟିଭ ଚିହ୍ନଟ ହୋଇଥିଲେ ।
ତେବେ ପଜିଟିଭ ଚିହ୍ନଟ ହେବା ପରେ ପ୍ରତ୍ୟେକଙ୍କୁ ଆଇସୋଲେସନରେ ରଖାଯିବାର ବ୍ୟବସ୍ଥା କରାଯାଇଛି । ଏଥିସହ ସେମାନେ ଗସ୍ତ କରିଥିବା ଅଞ୍ଚଳଗୁଡିକୁ ସାନିଟାଇଜ ମଧ୍ୟ କରାଯାଇଛି । ସଦ୍ୟ ଚିହ୍ନଟ 12 ନୂଆ ମାମଲା ସହ ଦକ୍ଷିଣ କୋରିଆରେ ୟୁଏସଏଫକେ ସମ୍ବନ୍ଧୀୟ ଆକ୍ରାନ୍ତ ସଂଖ୍ୟା 123ରେ ପହଞ୍ଚିଥିବା ଜଣା ପଡିଛି । ଏମାନଙ୍କ ମଧ୍ୟରୁ 87 ଜଣ କେବଳ ଜୁଲାଇ ମାସରେ ଚିହ୍ନଟ ହୋଇଥିବା ବେଳେ ସମସ୍ତେ ଆମେରିକାରୁ ଆସି କାର୍ଯ୍ୟରେ ସଦ୍ୟ ଯୋଗ ଦେଇଥିବା ସ୍ପଷ୍ଟ ହୋଇଛି ।
ସେପଟେ ଦକ୍ଷିଣ କୋରିଆରେ ଗତ 24 ଘଣ୍ଟା ମଧ୍ୟରେ 25 ନୂଆ ମାମଲା ଚିହ୍ନଟ ହୋଇଛି । ଏଥିମଧ୍ୟରୁ 16ଟି ମାମଲାରେ ବିଦେଶ ଲିଙ୍କ ରହିଛି । ଏଥିସହ ଦକ୍ଷିଣ କୋରିଆରେ ମୋଟ ଆକ୍ରାନ୍ତ ସଂଖ୍ୟା 14,175ରେ ପହଞ୍ଚିଥିବା ବେଳେ ମୃତ୍ୟୁ ସଂଖ୍ୟା 299ରେ ସ୍ଥିର ରହିଛି । ଏନେଇ ସୂଚନା ଦେଇଛି କୋରିଆ ସେଣ୍ଟର୍ସ ଫର୍ ଡିଜିଜ କଣ୍ଟ୍ରୋଲ ଆଣ୍ଡ ପ୍ରିଭେନ୍ସନ(କେସିଡିସି) ।
@IANS
