କାବୁଲ: ଆଫଗାନିସ୍ତାନ ସରକାର ଏବଂ ତାଲିବାନ ବିଦ୍ରୋହୀଙ୍କ ମଧ୍ୟରେ ସଂଘର୍ଷ ଶେଷ ହେବାର ନାଁ ନେଉନାହିଁ । ଏହି କ୍ରମରେ ଆଫଗାନିସ୍ତାନର ଉତ୍ତର ଫରୟାବ ପ୍ରାନ୍ତରେ ତାଲିବାନ ଆତଙ୍କବାଦୀ ଏବଂ ଆଫଗାନ ସୈନ୍ୟଙ୍କ ମଧ୍ୟରେ ସଂଘର୍ଷ ହୋଇଛି । ଏଥିରେ ଅନ୍ୟୁନ୍ୟ 17 ଜଣ ତାଲିବାନ ଆତଙ୍କବାଦୀ ନିହତ ହୋଇଥିବା ବେଳେ 11 ଜଣ ଆହତ ହୋଇଛନ୍ତି । ଆଫଗାନିସ୍ତାନର ପ୍ରତିରକ୍ଷା ମନ୍ତ୍ରାଳୟ ପକ୍ଷରୁ ବୁଧବାର ଏନେଇ ସୂଚନା ଦିଆଯାଇଛି ।
ଉତ୍ତର ଫରୟାବ ପ୍ରାନ୍ତର ଦୌଲତ ଆବାଦ ଏବଂ ଆଲମାର ଜିଲ୍ଲାରେ ମଙ୍ଗଳବାର ଏହି ସଂଘର୍ଷ ହୋଇଥିଲା । ଉଭୟ ଜିଲ୍ଲାର ସୁରକ୍ଷା ଯାଞ୍ଚ ପଏଣ୍ଟରେ ଆଫଗାନ ସୈନ୍ୟଙ୍କ ଉପରେ ଆକ୍ରମଣ ଯୋଜନା କରିଥିଲେ ତାଲିବାନ ଆତଙ୍କବାଦୀ । ତେବେ ଆଫଗାନିସ୍ତାନର ବାୟୁସେନା ଏହି ଆକ୍ରମଣ ଯୋଜନାକୁ ପଣ୍ଡ କରି ପୂର୍ବରୁ ତାଲିବାନ ଆତଙ୍କବାଦୀଙ୍କ ଉପରେ ଆକ୍ରମଣ କରିଥିଲେ ।
ଆହତ ଆତଙ୍କବାଦୀଙ୍କ ମଧ୍ୟରେ ତାଲିବାନର ଜଣେ ସାମରିକ କମାଣ୍ଡର ମଧ୍ୟ ସାମିଲ ଥିବା ଜଣାପଡିଛି । ଏହା ବ୍ୟତୀତ ସଂଘର୍ଷରେ 3 ଟି ବାଇକ ଏବଂ ଆତଙ୍କବାଦୀ କ୍ୟାମ୍ପ ମଧ୍ୟ ଧ୍ବଂସ ହୋଇଥିବା ଜଣାପଡିଛି । ସେପଟେ ଏନେଇ ତାଲିବାନ ପକ୍ଷରୁ ଏବେସୁଦ୍ଧା କୌଣସି ପ୍ରତିକ୍ରିୟା ମିଳିପାରିନାହିଁ।
