ସାନ ଫ୍ରାନ୍ସିସ୍କୋ: ଭାରତରେ ଯୋଜନା ଅଧାରେ ରହିଯିବାରୁ ଫେସବୁକ ସିଇଓ ମାର୍କ ଜ୍ୟୁକରବର୍ଗ ବ୍ରାଜିଲର ହ୍ବାଟ୍ସଆପ୍ ୟୁଜର୍ସଙ୍କ ପାଇଁ ଲଞ୍ଚ କରିଛନ୍ତି ନୂଆ ଟେକ୍ନୋଲୋଜି । ଏହି ନୂଆ ଟେକ୍ନୋଲୋଜି ସାହାଯ୍ୟରେ ଏବେ ହ୍ବାଟ୍ସଆପ୍ରେ କରିହେବ ଟିଜିଟାଲ ପେମେଣ୍ଟ । ଏହି ଫିଚର ସାହାଯ୍ୟରେ ଏବେ ନିଜ ବନ୍ଧୁ ଓ ପରିବାରବର୍ଗଙ୍କୁ ହ୍ବାଟ୍ସଆପ ଜରିଆରେ ୟୁଜର୍ସ ପେମେଣ୍ଟ କରିପାରିବେ ବୋଲି ଜ୍ୟୁକରବର୍ଗ ସୂଚନା ଦେଇଛନ୍ତି ।
ଭାରତରେ ଏହି ଟେକ୍ନୋଲୋଜି ପ୍ରଥମେ ଲଞ୍ଚିଂ ନେଇ ଯୋଜନା ରହିଥିବା ବେଳେ 2018ରୁ ଏହାର ଟେଷ୍ଟିଂ ମଧ୍ୟ ଆରମ୍ଭ ହୋଇସାରିଥିଲା । ହେଲେ 400 ମିଲିୟନ ୟୁଜର୍ସଙ୍କ ବଢୁଥିବା ଚାହିଦା ଓ ନିର୍ଦ୍ଦିଷ୍ଟ ଡାଟା ବ୍ୟବହାର ସୀମା ରହିଥିବା କାରଣରୁ ଏହି ପ୍ରକ୍ରିୟା ଅଧାରେ ଅଟକି ରହିଥିଲା । ଫଳସ୍ବରୂପ ଏହାକୁ ବ୍ରାଜିଲରେ ପ୍ରଥମେ ଲଞ୍ଚ କରିବା ନେଇ ନିଷ୍ପତ୍ତି ନିଆଯାଇଥିଲା ।
ତେବେ ଏହି ଯୋଜନା ପଛରେ ମୂଳ ଉଦ୍ଦେଶ୍ୟ ହେଉଛି ଫଟୋ ବା ଭିଡିଓ ପଠାଇବା ପରି ସହଜ ପ୍ରକ୍ରିୟା ପରିବାରବର୍ଗ ଓ ବନ୍ଧୁଙ୍କୁ ଆର୍ଥିକ ସାହାଯ୍ୟ କରିପାରିବା । ଏହା ନା କେବଳ ଆତ୍ମୀୟ ପରିଜନଙ୍କୁ ସାହାଯ୍ୟ କରିବ ବରଂ କ୍ଷୁଦ୍ର ବ୍ୟବସାୟୀମାନେ ମଧ୍ୟ ହ୍ବାଟ୍ସଆପ୍ ଜରିଆରେ ନିଜ ବ୍ୟବସାୟ କାର୍ଯ୍ୟ ସମ୍ପାଦନ କରିପାରିବେ । ଏହି ପ୍ରକ୍ରିୟା ସମ୍ପୂର୍ଣ୍ଣ ମାଗଣା ରହିଥିବା ଜ୍ୟୁକରବର୍ଗ ପ୍ରକାଶ କରିଛନ୍ତି ।
ସୋମବାରଠାରୁ ଏହି ଫିଚର ବ୍ରାଜିଲର ହ୍ବାଟ୍ସଆପ୍ ୟୁଜର୍ସଙ୍କ ପାଇଁ ରୋଲ ଆଉଟ ହୋଇଥିବା ବେଳେ ଏହାର ସଫଳତା ଆଧାରରେ ଆଗାମୀ ଦିନରେ ଏଥିରେ ଆବଶ୍ୟକୀୟ ପରିବର୍ତ୍ତନ କରାଯିବା ନେଇ ଜଣା ପଡିଛି । ଏଥିସହ ଆଗକୁ ଏହି ଫିଚର ଅନ୍ୟ ସମସ୍ତ ଦେଶରେ ମଧ୍ୟ ଲଞ୍ଚ ହେବାର ଯୋଜନା ରହିଛି ।
@IANS
