ସାନ ଫ୍ରାନ୍ସିସ୍କୋ: ଖୁବଶୀଘ୍ର ଟେକ୍ନୋଲୋଜି ମାର୍କେଟରେ ଆପଲ ଲଞ୍ଚ କରିବାକୁ ଯାଉଛି ନିଜର ଦୁଇଟି ନୂଆ ଡିଭାଇସ । ଏହି ଡିଭାଇସ ଦ୍ବୟ ଆଇପ୍ୟାଡର ଦୁଇଟି ନୂଆ ଭାରିଏଣ୍ଟ ହେବ ବୋଲି କୁହଯାଇଛି । ଏହି ଡିଭାଇସ ଦୁଇଟି ହେଉଛି 10.8 ଇଞ୍ଚର ଆଇପ୍ୟାଡ ଓ 8.5 ଇଞ୍ଚର ଆଇପ୍ୟାଡ ମିନି । ପ୍ରଥମ ଭାରିଏଣ୍ଟଟି ଚଳିତବର୍ଷ ଶେଷ ସୁଦ୍ଧା ଲଞ୍ଚ ହେବାର ଯୋଜନା ଥିବା ବେଳେ ଅନ୍ୟଟି 2021ରେ ଲଞ୍ଚ ହେବା ନେଇ ଆପଲ ସ୍ପଷ୍ଟ କରିଛି ।
ଏନେଇ ଆପଲ ଆନାଲିଷ୍ଟ ମିଙ୍ଗ-ଚି କୁଓଙ୍କ କହିବା ଅନୁଯାୟୀ ବର୍ତ୍ତମାନ ପ୍ରଚଳିତ 10.2 ଇଞ୍ଚ ମଡେଲ କିମ୍ବା 10.5 ଇଞ୍ଚର ଆଇପ୍ୟାଡ ଏୟାରର ବିକଳ୍ପ ଭାବେ 10.8 ଇଞ୍ଚର ଆଇପ୍ୟାଡ ଲଞ୍ଚ କରାଯିବ । ଏକ ଟ୍ବିଟ ଜରିଆ ମିଙ୍ଗ ଏହା ସ୍ପଷ୍ଟ କରିଛନ୍ତି । ସେପଟେ ଲଞ୍ଚ ହେବାକୁ ଥିବା 8.5 ଇଞ୍ଚର ଆଇପ୍ୟାଡ ମିନି ସିରିଜର ପ୍ରଥମ ଡିଭାଇସ ହେବ ।
ଲଞ୍ଚ ହେବାକୁ ଥିବା ଉଭୟ ଡିଭାଇସ ସହ ଆପଲ 20 ୱାଟ୍ର ପାୱାର ଆଡପ୍ଟର ମଧ୍ୟ ଯୋଗାଇବା ନେଇ ସୂଚନା ଦେଇଛି । ହେଲେ ଆଇଫୋନ 12 କ୍ଷେତ୍ରରେ ଏହି ନିୟମ କମ୍ପାନୀ ଲାଗୁ କରିବ ନାହିଁ । ମିଙ୍ଗ ଏନେଇ ଖୁଲାସା କରିଛନ୍ତି କି କମ୍ପାନୀ ଆଗାମୀ ଦିନରେ ମିନି-ଏଲଇଡି ଡିସପ୍ଲେ ଟେକ୍ନୋଲୋଜିର ବ୍ୟବହାର କରି ହାର୍ଡଓୟାର ପ୍ରଡକ୍ଟ ପ୍ରସ୍ତୁତ କରିବାର ଯୋଜନା ରଖିଛି ।
ଯଦି ଏହି ଟେକ୍ନୋଲୋଜିର ବ୍ୟବହାର ହୁଏ ତେବେ 2021ରେ ଆପଲ୍ ମିନି-ଏଲଇଡି ପ୍ରଡକ୍ଟ ସିପମେଣ୍ଟ 300 ପ୍ରତିଶତ ଓ 2022ରେ ଏହା 225 ପ୍ରତିଶତ ବଢିବାର ସମ୍ଭାବନା ରହିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
