ୱାଶିଂଟନ: ଡୋନାଲ୍ଡ ଟ୍ରମ୍ପକୁ ପୁଣି ଝଟକା । 2023 ଯାଏଁ ବ୍ୟାନ ହେଲା ଟ୍ରମ୍ପଙ୍କ ଫେସବୁକ୍ ଆକାଉଣ୍ଟ । ଦୁଇ ବର୍ଷ ପାଇଁ ଫେସବୁକ ଡୋନାଲ୍ଡ ଟ୍ରମ୍ପଙ୍କ ଆକାଉଣ୍ଟକୁ ସସପେଣ୍ଡ କରିଛି ଏବଂ ପରବର୍ତ୍ତୀ ସମୟରେ ଏହି ଅବଧି ବଢାଯିବାର ସମ୍ଭାବନା ରହିଥିବା କହିଛି ।
ନିକଟରେ ଟ୍ବିଟର, ୟୁଟ୍ୟୁବ ଭଳି ପ୍ରମୁଖ ସୋସିଆଲ ମିଡିଆ ପ୍ଲାଟଫର୍ମ ମଧ୍ୟ ଆମେରିକାର ପୂର୍ବତନ ରାଷ୍ଟ୍ରପତି ଟ୍ରମ୍ପଙ୍କ ଆକାଉଣ୍ଟ ବ୍ୟାନ କରିଛନ୍ତି । ରିପବ୍ଲିକାନ ନେତାଙ୍କ ଭାଷଣ ଯୋଗୁଁ ଆମେରିକା କ୍ୟାପିଟାଲ ହିଲ ହିଂସାକାଣ୍ଡକୁ ଦୃଷ୍ଟିର ରଖି ସୋସିଆଲ ମିଡିଆ ପ୍ଲାଟଫର୍ମଗୁଡିକ ଏଭଳି ନିଷ୍ପତ୍ତି ନେଇଛନ୍ତି ।
ସୂଚନାଥାଉ କି, ଗତ ଜାନୁୟାରୀ 6 ତାରିଖରେ ହଜାର ହଜାର ସଂଖ୍ୟକ ଡୋନାଲ୍ଡ ଟ୍ରମ୍ପ ସମର୍ଥକ କ୍ୟାପିଟାଲ ବିଲ୍ଡିଂରେ ପଶିଥିଲେ ଏବଂ ପୋଲିସ ସହ ମୁହାଁମୁହିଁ ହୋଇଥିଲେ । ଯେଉଁଥିରେ 4 ଜଣଙ୍କ ମୃତ୍ୟୁ ଘଟିଥିଲା ଏବଂ ନଭେମ୍ବର 3 ନିର୍ବାଚନରେ ଜୋ ବିଡେନଙ୍କ ବିଜୟ ସୁନିଶ୍ଚିତ କରିବାକୁ କଂଗ୍ରେସ ଦ୍ବାରା ସାମ୍ବିଧାନକ ପ୍ରକ୍ରିୟାରେ ବାଧା ସୃଷ୍ଟି ହୋଇଥିଲା ।
ତେବେ ଏହି ବ୍ୟାନ ଘଟଣାରେ ଫେସବୁକ ଗ୍ଲୋବାଲ ଆଫାୟାର୍ସର ଭାଇସ ପ୍ରେସଡେଣ୍ଟ ନିକ୍ କ୍ଲେଜ କହିଛନ୍ତି, ଆମେ ଜାଣିଛୁ ଯେ ଆମେ ଲାଗୁ କରୁଥିବା ଯେକୌଣସି ଦଣ୍ଡବିଧାନ ବିବାଦ ପରିସରକୁ ଆସିବ । ଫେସବୁକ ଭଳି ଏକ ଘରୋଇ କମ୍ପାନୀ ବିଦାୟୀ ରାଷ୍ଟ୍ରପତି ଟ୍ରମ୍ପଙ୍କ ଆକାଉଣ୍ଟ ବ୍ୟାନ କରିବା ନିଷ୍ପତ୍ତିକୁ ଅନେକ ଲୋକେ ଗ୍ରହଣ କରିବେ ନାହିଁ ଏବଂ ଆଉ କିଛି ଚିର ଦିନ ପାଇଁ ବ୍ୟାନ କରିବା ଉଚିତ୍ ବୋଲି ମତ ରଖିବେ । ଏପରିକି ଅନେକ ଦଳ ସମର୍ଥକମାନେ ଏହାକୁ ସମାଲୋଚନା ମଧ୍ୟ କରିପାରନ୍ତି । ହେଲେ ଆମ କାର୍ଯ୍ୟ ହେଉଛି ନିରପେକ୍ଷ ଓ ସ୍ବଚ୍ଛ ଉପାୟରେ ନିର୍ଣ୍ଣୟ ନେବା ବୋଲି କ୍ଲେଜ ଏକ ବ୍ଲଗ ପୋଷ୍ଟ କରି କହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
