ବ୍ୟସ୍ତ ବହୁଳ ଜୀବନରେ ଟିକେ ଫୁରସତ ସମୟ ମିଳିଲେ ଲୋକେ ଯୋଜନା କରନ୍ତି ବୁଲିଯିବା ପାଇଁ । ସେ ଧାର୍ମିକ ସ୍ଥଳ ହେଉ ଅବା ମନୋରଞ୍ଜନ ଭିତ୍ତିକ ସ୍ଥାନ, ପ୍ରତ୍ୟେକ ସ୍ଥାନରେ ଛୁଟି ଦିନ ହେଲା ମାନେ ଜମେ ପର୍ଯ୍ୟଟକଙ୍କ ଖଚାଖଚ ଭିଡ । କିଏ ପ୍ରକୃତିକୁ ଉପଭୋଗ କରିବା ପାଇଁ ବୁଲିବାକୁ ବାହାରିଯାଏ ତ କିଏ ପୁଣି ବିଭିନ୍ନ କଲା, ସଂସ୍କୃତି ଓ ପରମ୍ପରାକୁ ବୁଝିବା ପାଇଁ ବୁଲିବା ପସନ୍ଦ କରନ୍ତି । କିଛି ଏପରି ବି ଅଛନ୍ତି ଯେଉଁମାନେ କେବଳ ମନ ଓ ମସ୍ତିଷ୍କ ଶାନ୍ତ କରିବା ପାଇଁ ଓ ବ୍ୟସ୍ତ ଜୀବନରୁ ସମୟ କାଢି ନିଜକୁ ସମୟ ଦେବା ପାଇଁ ବାହାରିଯାଆନ୍ତି ଲଙ୍ଗ ଟୁରରେ ।
ଏମିତିରେ ଆଜି ଆମେ କହୁଛୁ ଏକ ଏପରି ସ୍ଥାନର କଥା ଯାହାକୁ ଆପଣ ବି କେବେ ନା କେବେ ନିଶ୍ଚୟ ଯିବାକୁ ଚାହିଁବେ । ଆଉ ଦେଖିବାକୁ ଚାହିଁବେ ପ୍ରକୃତିର ବିରଳ ଓ ଆଶ୍ଚର୍ଯ୍ୟକର ରଚନା । ଏହି ସ୍ଥାନଟି ହେଉଛି ଦକ୍ଷିଣ ଆମେରିକାର ବୋଲିଭିଆସ୍ଥିତ ‘ସଲାର ଦେ ଉୟୁନି’ । ପ୍ରାକୃତିକ ସୌନ୍ଦର୍ଯ୍ୟ ସାଙ୍ଗକୁ ରହସ୍ୟରେ ଭରା ଏହି ସ୍ଥାନ । ବିଶ୍ବର ବୃହତ୍ତମ ଆଇନା ଭାବେ ଏହି ସ୍ଥାନ ବେଶ ଜଣା ଶୁଣା । ସାଧାରଣତଃ ମୁହଁ ଦେଖିବା ପାଇଁ ଲୋକେ ଆଇନାର ବ୍ୟବହାର କରିଥାଆନ୍ତି । ବେଳେ ବେଳେ ପ୍ରକୃତିର ସମୂଦ୍ର ଜଳରାଶିରେ ଏହାର ଭ୍ରମ ସୃଷ୍ଟି ହେବାର ମଧ୍ୟ ନଜିର ରହିଛି । ହେଲେ ଏତେ ବିଶାଳକାୟ ଆକାରରେ ଆଇନାର ଭ୍ରମ ସୃଷ୍ଟି କରିବାର ରେକର୍ଡ ରଖିଛି ସଲାର ଦେ ଉୟୁନି ।
ଏହି ସ୍ଥାନଟି ବୋଲିଭିଆର ପ୍ରସିଦ୍ଧ ସଲ୍ଟ ଫ୍ଲାଟ ବା ଲୁଣି ସମତଳ ଭାବେ ମଧ୍ୟ ବେଶ ପରିଚିତ । ତେବେ ଏହି ସ୍ଥାନ ବିଷୟରେ ଆସନ୍ତ ଜାଣିବା କିଛି ଏପରି କଥା, ଯାହା ହୁଏତ ଖୁବ କମ ଲୋକେ ଶୁଣିଥିବେ ଓ ଜାଣିଥିବେ...
- ବିଶ୍ବର ସବୁଠାରୁ ଦୀର୍ଘତମ ଲୁଣି ସମତଳ ଭାବେ ସଲାର ଦେ ଉୟୁନିର ଖ୍ୟାତି ରହିଛି । ଏହା 10,582 କିଲୋମିଟର ପର୍ଯ୍ୟନ୍ତ ବ୍ୟାପ୍ତ ।
- ଏହି ସ୍ଥାନର ଅନ୍ୟତମ ଆକର୍ଷଣ ହେଉଛି ଟ୍ରେନର ଶ୍ମଶାନ ଘାଟ । ବିଶ୍ବାସ କରାଯାଏ କି ଏଠାରେ ଟ୍ରେନର ଏକ ଶ୍ମଶାନ ଘାଟ ରହିଛି । ଯେଉଁଠାରେ 1940 ମସିହାରେ ଖଣି ବୋହିବା ପାଇଁ ବ୍ୟବହୃତ ହେଉଥିବା ଟ୍ରେନ ସବୁର ଅବଶିଷ୍ଟାଂଶ ପୋତା ଯାଇଛି । ଏହି ସ୍ଥାନକୁ ଦେଖିବା ପାଇଁ ଆଜି ବି ହଜାର ହଜାର ପର୍ଯ୍ୟଟକ ଦେଶ ତଥା ଦେଶ ବାହାରୁ ଆସିଥାଆନ୍ତି ।
- ବର୍ଷର ଏକ ନିର୍ଦ୍ଦିଷ୍ଟ ସମୟରେ ଏହି ସମତଳ ସଫା ଜଳ ଦ୍ବାରା ଆଚ୍ଛାଦିତ ହୁଏ । ଯାହା ଏହି ସମତଳକୁ ବିଶ୍ବର ବୃହତ୍ତମ ଆଇନାରେ ପରିଣତ କରେ ।
- ଏହି ସ୍ଥାନର ଅନ୍ୟ ଏକ ନାମ ହେଉଛି ସଲାର ଦେ ତୁନାପା । ସ୍ପାନିଶ ଭାଷାରେ ଏହାର ଅର୍ଥ ହେଉଛି ଲୁଣି ସମତଳ ସଂରକ୍ଷଣ ।
- ଏହି ସମତଳରେ ପ୍ରାୟ 11 ବିଲିୟନ ଟନ ଲୁଣ ଗଚ୍ଛିତ ରହିଥିବା ଆକଳନ କରାଯାଇଛି ।
- ମହାକାଶରେ ନିଜ ଉପଗ୍ରହର ସ୍ଥାନ ନିରୂପଣ କରିବା ପାଇଁ ନାସା ଏହି ବୃହତ୍ତମ ଆଇନା ବା ସଲାର ଦେ ଉୟୁନିର ସାହାଯ୍ୟ ନେଇଥାଏ ।
- ଏହି ସମତଳକୁ ପ୍ରତିବର୍ଷ ପ୍ରାୟ 80 ପ୍ରଜାତିର ଦେଶୀ ଓ ବିଦେଶୀ ପକ୍ଷୀ ଆସିଥାଆନ୍ତି । ଯେଉଁଥିରେ ରହିଛି 3 ପ୍ରଜାତିର ଫ୍ଲେମିଙ୍ଗୋ ।
- ପ୍ରାରମ୍ଭିକ ପର୍ଯ୍ୟାୟରେ ସଲାର ଦେ ଉୟୁନି ସମ୍ପୂର୍ଣ୍ଣ ସମତଳ ଭୂମି ରହିଥିବା ବେଳେ ସମୟକ୍ରମେ ଏଥିରେ କୋଠରୀ ଆକାରର ବ୍ଲକ ଦେଖାଯାଇଥିଲା । ଯାହା ଏବେ ବି ମହଜୁଦ ରହି ଏହି ସ୍ଥାନର ସୌନ୍ଦର୍ଯ୍ୟକୁ ଦ୍ବିଗୁଣିତ କରୁଛି ।
