ଆଟଲାଣ୍ଟା: କୋରୋନା ସଂକ୍ରମଣର ଭୟାବହତା ଦିନକୁ ଦିନ ବଢିବାରେ ଲାଗିଛି । ଏହାର ଲକ୍ଷଣ ଓ ଚିକିତ୍ସାକୁ ବୁଝିବା ପାଇଁ ଗବେଷକମାନେ ଯେତିକି ଚେଷ୍ଟା କରୁଛନ୍ତି ଏହାର ପ୍ରକାରଭେଦ ସେତିକି ବଢିବାରେ ଲାଗୁଛି । ଏମିତିରେ ଏହାର ଚିକିତ୍ସା ପାଇଁ କେଉଁ ସହୁ ଉପାଦାନ ଲାଭଦାୟୀ ସେନେଇ ଚାଲୁଛି ଅନେକ ପରୀକ୍ଷା ନିରୀକ୍ଷା । ଇତିମଧ୍ୟରେ ବୈଜ୍ଞାନିକ ତଥା ଗବେଷକଙ୍କ ନଜର ପଡିଛି କାନାବିସ(ଗଞ୍ଜେଇ) ଉପରେ । ଏଥିରେ ଥିବା ଆଣ୍ଟି-ଇନଫ୍ଲେମେଟୋରୀ ଗୁଣ କୋରୋନା ମୁକାବିଲା ପାଇଁ କେତେ ଲାଭଦାୟୀ ସେନେଇ ଆରମ୍ଭ ହୋଇଛି ପରୀକ୍ଷା ।
ବର୍ତ୍ତମାନ ସୁଦ୍ଧା କୋରୋନା ଚିକିତ୍ସା ପାଇଁ କାନାବିସର ବ୍ୟବହାର ନେଇ କେବଳ ପ୍ରସ୍ତାବ ଉଠିଛି । ହେଲେ ଏପର୍ଯ୍ୟନ୍ତ ଏଥିରେ ସହମତିରେ ମୋହର କୌଣସି ଗବେଷକ ମାରି ନଥିବା ଜଣା ପଡିଛି । ସେପଟେ କୋରୋନା ଭୂତାଣୁର ଶରୀର ଉପରେ ପ୍ରଭାବ ଦର୍ଶାଇବାକୁ ଯାଇ ଗବେଷକ କହିଛନ୍ତି କି କୋରୋନା ସଂକ୍ରମଣ ବଢିବା ଦ୍ବାରା ଶରୀରର ରୋଗ ପ୍ରତିରୋଧକ ଶକ୍ତି ନିୟନ୍ତ୍ରଣ ବାହାରକୁ ପଳାଏ । ଫଳରେ ଶରୀରରେ ସାଇଟୋକାଇନ କ୍ଷରଣର ତୀବ୍ରତା ବଢିଯାଏ । ଅନ୍ୟ ଶବ୍ଦରେ କହିବାକୁ କଲେ ଶରୀରରେ ସାଇଟୋକାଇନ ଝଡ ସୃଷ୍ଟି ହୁଏ । ଯାହାକୁ ନିୟନ୍ତ୍ରଣ କରାନଗଲେ ଆକ୍ରାନ୍ତଙ୍କ ଅବସ୍ଥା ସଙ୍କଟାପନ୍ନ ହୋଇପଡେ ।
ତେବେ ଶରୀରରେ ସାଇଟୋକାଇନ ଝଡ ସୃଷ୍ଟି ହେବା ଦ୍ବାରା ମାଂସପେଶୀରେ ପୀଡା, ଶରୀର ବ୍ୟଥା, ଥଣ୍ଡା, ତୀବ୍ର ଜ୍ବର ଓ ଶ୍ବାସକ୍ରିୟାରେ କଷ୍ଟ ଅନୁଭବ ହୋଇଥାଏ । ସେପଟେ ପୂର୍ବରୁ ସିବିଡି ଦ୍ବାରା ସାଇଟୋକାଇନ କ୍ଷରଣକୁ ନିୟନ୍ତ୍ରଣ କରାଯାଇପାରୁଥିବା ବେଳେ ନେଇ ଗବେଷକମାନେ ଜାଣିବାକୁ ପାଇଥିଲେ । ତେଣୁ କୋରୋନା ମୁକାବିଲାରେ କାନାବିସର ଏହି ଗୁଣକୁ ବ୍ୟବହାର କରାଯାଇପାରିବ କି ନାହିଁ ସେନେଇ ଗବେଷକମାନେ ପରୀକ୍ଷା ଆରମ୍ଭ କରିଥିବା ଜଣା ପଡିଛି ।
ଆମେରିକାରେ ଅଣାୟତ ହୋଇପଡିଥିବା କୋରୋନା ସଂକ୍ରମଣ ସ୍ଥିତିକୁ ନିୟନ୍ତ୍ରଣ କରିବା ପାଇଁ ବର୍ତ୍ତମାନ ଗବେଷକମାନେ ବିଭିନ୍ନ ସାମଗ୍ରୀକୁ ଚିକିତ୍ସାରେ ବ୍ୟବହାର କରାଯାଇପାରିବ କି ନାହିଁ ସେନେଇ ପରୀକ୍ଷା କରୁଛନ୍ତି । ତେବେ କାନାବିସର କାର୍ଯ୍ୟକାରିତା ନେଇ ୟୁନିଭର୍ସିଟି ଅଫ ନେବ୍ରାସ୍କା ଓ ଟେକ୍ସାସ ବାୟୋମେଡିକାଲ ରିସର୍ଚ୍ଚ ଇନଷ୍ଟିଚ୍ୟୁଟ ମିଳିତ ଭାବେ ଏହି ଅନୁଧ୍ୟାନ ଜାରି ରଖିଥିବା ଜଣା ପଡିଛି ।
