ୱାଶିଂଟନ: ଆଖି ବୁଜିଛନ୍ତି ଦେଶର ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀ । ସୋମବାର ତାଙ୍କର ବିୟୋଗ ନେଇ ଦେଶ ବିଦେଶରୁ ଛୁଟିଛି ଶୋକର ବାର୍ତ୍ତା । ଏମିତିରେ ଆମେରିକାର ରାଷ୍ଟ୍ରପତି ନିର୍ବାଚନରେ ଡେମୋକ୍ରାଟିକ ପାର୍ଟ ପକ୍ଷରୁ ପ୍ରତିଦ୍ବନ୍ଦିତା କରୁଥିବା ପୂର୍ବତନ ଉପରାଷ୍ଟ୍ରପତି ଜୋ ବିଡେନ ମଧ୍ୟ ଟ୍ବିଟ ଯୋଗେ ଶୋକ ପ୍ରକାଶ କରିଛନ୍ତି । ଏଥିରେ ସେ ପ୍ରଣବଙ୍କୁ ଜଣେ ସଚ୍ଚୋଟ ଲୋକ ସେବକ ବୋଲି କହିଛନ୍ତି ।
ସେ ଏହା ମଧ୍ୟ ଲେଖିଛନ୍ତି କି ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀ ଆମେରିକା ସହ ଏକ ଦୃଢ ସମ୍ପର୍କରେ ବିଶ୍ବାସ କରୁଥିଲେ । କେବଳ ସେତିକି ନୁହେଁ ଦୁଇ ରାଷ୍ଟ୍ର ମିଳିତ ଭାବେ ଅନେକ ବୈଶ୍ବିକ ସମସ୍ୟାର ସମାଧାନ କରିପାରିବେ ବୋଲି ତାଙ୍କର ଦୃଢ ବିଶ୍ବାସ ରହିଥିଲା । ସେ ଥିଲେ ଜଣେ ସଚ୍ଚୋଟ ଲୋକ ସେବକ । ତାଙ୍କ ବିୟୋଗରେ ଜିଲ(ବିଜେନଙ୍କ ପତ୍ନୀ) ଓ ସେ ଗଭୀର ଭାବେ ଦୁଃଖିତ ବୋଲି ମଧ୍ୟ ସେ ଟ୍ବିଟରେ ଉଲ୍ଲେଖ କରିଥିଲେ । ଏଥିସହ ସେ ପ୍ରଣବଙ୍କ ପରିବାର ପ୍ରତି ସମବେଦନା ଓ ଭଲ ପାଇବା ମଧ୍ୟ ଜଣାଇଥିଲେ ।
ଏହି ପୋଷ୍ଟ ସହ ବିଡେନ ପ୍ରଣବଙ୍କ ସହ ନିଜର ଏକ ପୁରୁଣା ଫଟୋ ମଧ୍ୟ ଯୋଡିଥିଲେ । ସୂଚନା ଅନୁଯାୟୀ ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀ ଗତ ଅଗଷ୍ଟ 10ରୁ ନୂଆଦିଲ୍ଲୀର ଆର୍ମି ହସ୍ପିଟାଲରେ ଚିକିତ୍ସିତ ଥିଲେ । ଏହା ପୂର୍ବରୁ ସେ କୋରୋନା ପଜିଟିଭ ଚିହ୍ନଟ ହୋଇଥିଲେ । ତେବେ ବ୍ରେନ ସର୍ଜରୀ ପରେ ତାଙ୍କର ଅବସ୍ଥା ସଙ୍କଟାପନ୍ନ ରହିଥିଲା । ଫଳରେ ସୋମବାର ସେ ଆଖି ବୁଜିଥିଲେ ।
@IANS
