ଟାଇଟାନିକ ଜାହାଜ ବୁଡା କଥା କାହାକୁ ବା ଅଜଣା । ଛୁଆଠାରୁ ଆରମ୍ଭ କରି ବୁଢା ଯାଏଁ ସମସ୍ତେ ଇତିହାସର ଏହି ଚର୍ଚ୍ଚତ ଘଟଣା ବିଷୟରେ ଅଳ୍ପ ବହୁତେ ଧାରଣା ରଖନ୍ତି । ଯାହା କିଛି ବି ଲୋକେ ଅଜ୍ଞ ଥିଲେ, ଟାଇଟାନିକ ଚଳଚ୍ଚିତ୍ର ଏହି ବିଖ୍ୟାତ ଘଟଣା ଉପରେ ସମ୍ୟକ ଆଲୋକପାତ କରିବାରେ ସଫଳ ହୋଇଥିଲେ । ତେବେ ଏହି ଘଟଣାରେ ପ୍ରାୟ 40 ଜଣ ଯାତ୍ରୀ ବର୍ତ୍ତି ଥିବା ବେଳେ ସେମାନଙ୍କ ମଧ୍ୟରେ ରହିଥିଲେ ଜଣେ ଏପରି ମହିଳା ଯାହାଙ୍କୁ ବିଶ୍ବର ଏକମାତ୍ର ସୌଭାଗ୍ୟବତୀ ଅଭାଗିନୀର ଆଖ୍ୟା ଦିଆଯାଇଥିଲା । ସେ ହେଉଛନ୍ତି ଭାଓଲେଟ ଜେସୋପ ।
ଆର୍ଜେଣ୍ଟିନାରେ ଜନ୍ମଗ୍ରହଣ କରିଥିବା ଜେସୋପ ପେଶାରେ ଜଣେ ନର୍ସ ଓ ଷ୍ଟେୱାର୍ଡସ ବା ଖାଦ୍ୟ ବିତରକ ଭାବେ ଜାହାଜମାନଙ୍କରେ କାର୍ଯ୍ୟ କରୁଥିଲେ । ତାଙ୍କୁ ଏପରି ଆଖ୍ୟ ଦିଆଯିବା ପଛରେ କାରଣ ହେଉଛି ସେ ଟାଇଟାନିକ ପରି ଦୁର୍ଭାଗ୍ୟଜନକ ଜାହାଜବୁଡି ସମେତ ଅନ୍ୟ 2 ଭୟଙ୍କର ଜାହାଜ ବୁଡିର ମଧ୍ୟ ଶିକାର ହୋଇଥିଲେ । ହେଲେ ଭାଗ୍ୟବଶତଃ ସମସ୍ତ ଜାହାଜବୁଡିରୁ ସେ ସୁରକ୍ଷିତ ଭାବେ ବର୍ତ୍ତି ଯାଇଥିଲେ ।
ୱିଲିୟମ ଓ କ୍ୟାଥେରିନ ଜେସୋପଙ୍କ ଔରସରୁ ଜନ୍ମ ନେଇଥିବା ପ୍ରଥମ ସନ୍ତତି ଥିଲେ ଭାଓଲେଟ ଜେସୋପ । 1887 ମସିହା ଅକ୍ଟୋବର 2 ତାରିଖରେ ଆର୍ଜେଣ୍ଟିନାର ବହିଆ ବ୍ଲାନକାରେ ତାଙ୍କର ଜନ୍ମ ହୋଇଥିଲା । ଭାଇ ଭଉଣୀଙ୍କ ମଧ୍ୟରେ ବଡ ହୋଇଥିବାରୁ ସବୁବେଳେ ଜଣେ ମା’ ଭଳି ଆଦର ସହ ସେ ନିଜ ସାନ ଭାଇ ଭଉଣୀଙ୍କ ସେବା କରୁଥିଲେ । ମାତ୍ର 16 ବର୍ଷତ ବୟସରେ ସେ ନିଜ ପିତାଙ୍କୁ ହରାଇଥିବା ବେଳେ ମା’ଙ୍କ ସହ ସେମାନେ ଇଂଲଣ୍ଡ ସ୍ଥାନାନ୍ତର ହୋଇଥିଲେ । ଘରର ପ୍ରତିପୋଷଣ ପାଇଁ ମା’ ଜଣେ ଖାଦ୍ୟ ବିତରକ ଭାବେ ବିଭିନ୍ନ ସ୍ଥାନରେ କାର୍ଯ୍ୟ କରୁଥିବାରୁ ସ୍କୁଲ ଯିବା ସହ ସାନ ଭାଇ ଭଉଣୀଙ୍କ ଦେଖାଶୁଣା କରୁଥିଲେ ଜେସୋପ ।
ସମୟ କ୍ରମେ ମାତ୍ରାଧିକ ଚିନ୍ତା ଓ କାର୍ଯ୍ୟବ୍ୟସ୍ତତା ଯୋଗୁଁ ଅସୁସ୍ଥ ହେବାରେ ଲାଗିଲେ ଜେସୋପଙ୍କ ମା’ । ଏମିତିରେ ଉପାୟଶୂନ୍ୟ ହୋଇ ନିଜ ପଢା ଛାଡି ମାତ୍ର 21 ବର୍ଷ ବୟସରେ ଜେସୋପ 1908 ମସିହାରେ ରୟାଲ ମେଲ ଲାଇନରେ ଖାଦ୍ୟ ବିତରକ ଭାବେ କାର୍ଯ୍ୟ ଆରମ୍ଭ କରିଥିଲେ । ଏହାର 3 ବର୍ଷ ପରେ ସେ ଆରଏମଏସ ଅଲିମ୍ପିକରେ କାର୍ଯ୍ୟ ଆରମ୍ଭ କରିଥିଲେ । 1911 ମସିହାର ଏହା ବୃହତ୍ତମ ବେସାମରିକ ସର୍ଭିସ ବୋଲି ଜଣା ଯାଉଥିଲା ।
1911 ମସିହା ସେପ୍ଟେମ୍ବର 20 ତାରିଖରେ ସେ ଏହି ଜାହାଜରେ ଯାତ୍ରା ଆରମ୍ଭ କରିଥିଲେ । ଇଂଲଣ୍ଡର ସାଉଥମ୍ପଟନରୁ ଏହା ଯାତ୍ରା ଆରମ୍ଭ କରିବା ପରେ ଏହା ବ୍ରିଟିଶ ଯୁଦ୍ଧପୋତ ଏଚଏମଏସ ହକ ସହ ଧକ୍କା ହୋଇଥିଲା । ଏଥିରେ କେହି ମୃତାହତ ହୋଇନଥିବା ବେଳେ ସୁରକ୍ଷିତ ଭାବେ ଏହା ସମୂଦ୍ର କୂଳକୁ ଫେରିଆସିବାରେ ସକ୍ଷମ ହୋଇଥିଲା । ପରେ 1912 ମସିହା ଏପ୍ରିଲ 10 ତାରିଖରେ ସେ ଆରଏମଏସ ଟାଇଟାନିକରେ ଯାତ୍ରା ଆରମ୍ଭ କରିଥିଲେ । ହେଲେ ମାତ୍ର 4 ଦିନ ପରେ ଏହା ବିଶାଳକାୟ ବରଫଖଣ୍ଡ ସହ ଧକ୍କା ହୋଇ ସମୂଦ୍ର ମଝିରେ ହିଁ ବୁଡି ଯାଇଥିଲା । ଏଥିରେ ପ୍ରାୟ 1500 ଯାତ୍ରୀ ବୁଡିଯାଇ ପ୍ରାଣ ହରାଇଥିବା ବେଳେ ଜେସୋପ ସୌଭାଗ୍ୟବଶତଃ ଏଥିରୁ ବର୍ତ୍ତି ଯାଇଥିଲେ ।
ଏହି ଘଟଣା ପରେ ପ୍ରଥମ ବିଶ୍ବଯୁଦ୍ଧ ସମୟରେ ସେ ବ୍ରିଟିଶ ରେଡ କ୍ରସ ଅଧିନରେ ପୁଣି କାର୍ଯ୍ୟ ଆରମ୍ଭ କରିଥିଲେ । ଏହି ସମୟରେ 1916 ମସିହା ନଭେମ୍ବର 21ରେ ସେ ଏଚଏମଏସ ବ୍ରିଟାନିକରେ ଯାତ୍ରୀ ଆରମ୍ଭ କରିଥିଲେ । ଯାହା କୌଣସି କାରଣବଶତଃ ସମୂଦ୍ର ମଝିରେ ବୁଡିୟାଇଥିଲା । ପରବର୍ତ୍ତୀ ସମୟରେ ଏହା ପଛରେ ବିସ୍ଫୋରଣ ଦାୟୀ ବୋଲି ଜଣା ପଡିଥିଲା । ଏହିପରି 3ଟି ଜାହାଜବୁଡିରୁ ବର୍ତ୍ତିଥିବା ଏକମାତ୍ର ମହିଳା ଭାବେ ଲକି ଗାର୍ଲର ପରିଚୟ ହାସଲ କରିଛନ୍ତି ଜେସୋପ ।
ହେଲେ ଏ ସମସ୍ତ ଘଟଣା ସତ୍ତ୍ବେ ସେ ନିଜ ଦାୟିତ୍ବ ସମ୍ପର୍ଣ୍ଣରେ ହେଳା କରିନଥିଲେ । ପାରୁ ପର୍ଯ୍ୟନ୍ତ ସେ ସେବା ଜାରି ରଖିଥିଲେ । ଏହିପରି ଭାବେ ସେ ସମୂଦ୍ରରେ ନିଜ ଜୀବନର ପ୍ରାୟ 42 ବର୍ଷ ବିତାଇଥିଲେ । ଶେଷରେ 1971 ମସିହା ମେ’ ମାସ 5 ତାରିଖରେ ଆଖି ବୁଜିଥିଲେ ଲକି ଗାର୍ଲି ଭାଓଲେଟ ଜେସୋପ ।
