ନ୍ୟୁୟର୍କ: ଆମେରିକାରେ ନ୍ୟୁୟର୍କ ଷ୍ଟେଟରେ କୋରୋନା ଜାରି ରଖିଛି ନିଜର ତାଣ୍ଡବ ଲୀଳା । ଇତି ମଧ୍ୟରେ ଆର୍ଥିକ ଅବସ୍ଥା ମଧ୍ୟ ଧିରେ ଧିରେ ବିପର୍ଯ୍ୟସ୍ତ ହେବାରେ ଲାଗିଛି । ହେଲେ ଆଉ ଅପେକ୍ଷା ନକରି ପୁଣି କାରବାର ଆରମ୍ଭ କରିବା ପାଇଁ ଅଣ୍ଟା ଭିଡିଛି ନ୍ୟୁୟର୍କ । ଏଥିପାଇଁ ନ୍ୟୁୟର୍କର ସ୍ବାସ୍ଥ୍ୟ ବିଭାଗ ଖୁବଶୀଘ୍ର ଲଞ୍ଚ କରିବାକୁ ଯାଉଛି ବୃହତ ମାତ୍ରାର ଆଣ୍ଟିବଡି ଟେଷ୍ଟ ।
ରାଜ୍ୟପାଳ ଆଣ୍ଡିୟୁ କ୍ୟୁଓମୋଙ୍କ କହିବା ଅନୁଯାୟୀ ଯୁକ୍ତରାଷ୍ଟ୍ରରେ ଏହା ହେଉଛି ଆଗାମୀ ଦିନରେ ହେବାକୁ ଥିବା ସବୁଠାରୁ ବଡ ଆଣ୍ଟିବଡି ଟେଷ୍ଟିଂ । ତେବେ ଏହା ଦ୍ବାରା ଜଣା ପଡିବ କି କେଉଁମାନେ କୋରୋନାରେ ଆକ୍ରାନ୍ତ ହୋଇସାରିଛନ୍ତି ଓ ପରେ ସୁସ୍ଥ ହୋଇଛନ୍ତି । ଯାହା ରାଜ୍ୟରେ ସମ୍ପୂର୍ଣ୍ଣ ସୁସ୍ଥଙ୍କ ସଂଖ୍ୟା ଆକଳନ କରିବାରେ ସହାୟକ ହେବ । ଏଥିସହ କାରବାର ଆରମ୍ଭ ପାଇଁ ପରିସ୍ଥିତି କେତେ ଠିକ ତାହା ମଧ୍ୟ ଜଣା ପଡିବ ।
ଗତ 24 ଘଣ୍ଟା ମଧ୍ୟରେ ନ୍ୟୁୟର୍କରେ 507 ଜଣ ଆଖି ବୁଜିସାରିଛନ୍ତି । ସେଥିମଧ୍ୟରୁ 30 ଜଣ ନର୍ସିଂହୋମରେ ହିଁ ପ୍ରାଣ ହରାଇଛନ୍ତି । ଏଥିସହ କେବଳ ନ୍ୟୁୟର୍କରେ ମୃତ୍ୟୁ ସଂଖ୍ୟା 18,298ରେ ପହଞ୍ଚିଛି ।
