ୱାଶିଂଟନ: ରାଷ୍ଟ୍ରପତି ଟ୍ରମ୍ପଙ୍କୁ ଡରାଇଲା କୋରୋନା ! ପ୍ରଥମ ଥର ମାସ୍କ ପିନ୍ଧି ନଜର ଆସିଲେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ପ୍ରଥମରୁ ମାସ୍କ ପିନ୍ଧିବାକୁ ବାରଣ କରୁଥିବା ଟ୍ରମ୍ପ ଶନିବାର ମାସ୍କ ପିନ୍ଧିଥିବାର ଦେଖିବାକୁ ମିଳିଛି । ତାଙ୍କର ମାସ୍କ ପିନ୍ଧିବାକୁ ନେଇ ଗଣମାଧ୍ୟମରେ ଚର୍ଚ୍ଚା ଜୋର ଧରିଛି ।
ପ୍ରଥମରୁ ମାସ୍କ ପିନ୍ଧିବାକୁ ମନା କରୁଥିଲେ ଟ୍ରମ୍ପ । ସାର୍ବଜନୀନ ସ୍ଥାନରେ ମଧ୍ୟ ମାସ୍କ ପିନ୍ଧିବାକୁ ସେ ରୋକଠୋକ ମନା କରିଦେଉଥିଲେ । କିନ୍ତୁ ଶନିବାର ଏକ ହସ୍ପିଟାଲକୁ ଗସ୍ତ ଅବସରରେ ମାସ୍କ ପିନ୍ଧିଥିବା ନଜର ଆସିଥିଲେ ଟ୍ରମ୍ପ ।
ୱାଲ୍ଟର୍ ରିଡ ଗସ୍ତରେ ଯାଇ ସେଠାରେ ଆହତ ସୈନିକଙ୍କୁ ଦେଖା କରିଥିଲେ ଆମେରିକା ରାଷ୍ଟ୍ରପତି । ଏହି ସମୟରେ ସେ ମାସ୍କ ପିନ୍ଧିଥିଲେ । କୋରୋନାରେ ବିଶ୍ବରେ ସର୍ବାଧିକ ପ୍ରଭାବିତ ଆମେରିକା ହୋଇଛି । ଗତକାଲି ଦୈନିକ ସର୍ବାଧିକ ସଂକ୍ରମିତ ମାମଲା 71 ହଜାର ମାମଲା ରିପୋର୍ଟ କରାଯାଇଛି । ଏପରି ସ୍ଥିତିରେ ଦେଶରେ ମାସ୍କ ପିନ୍ଧିବା ଜରୁରୀ ହୋଇପଡିଛି ।
ସେପଟେ ଏନେଇ ଟ୍ରମ୍ପ କହିଛନ୍ତି, ମୁଁ କେବେ ମଧ୍ୟ ମାସ୍କ ବିପକ୍ଷରେ ନୁହେଁ । ସମୟ ଓ ସ୍ଥାନ ଦେଖି ଏହା ବ୍ୟବହାର କରିବା ଉଚିତ । ଯେତେବେଳେ ଆପଣ ହସ୍ପିଟାଲ ଗସ୍ତ କରୁଛନ୍ତି ଓ ଅନେକ ଲୋକଙ୍କ ସହ ମିଶିବାର ଅଛି, ସେହି ସମୟରେ ମାସ୍କ ପିନ୍ଧିବା ଜରୁରୀ ବୋଲି ଟ୍ରମ୍ପ କହିଛନ୍ତି।
@ANI
