ୱାଶିଂଟନ: ଆମେରିକାରେ ଆଗକୁ ଆସୁଛି ରାଷ୍ଟ୍ରପତି ନିର୍ବାଚନ । ଏନେଇ ପ୍ରସ୍ତୁତି ଆରମ୍ଭ ହୋଇସାରିଥିବା ବେଳେ ମଙ୍ଗଳବାର ଟ୍ରମ୍ପଙ୍କୁ ନେଇ ନିଜ ମତ ଦେଇଛନ୍ତି ବରିଷ୍ଠ ରାଜନୀତିଜ୍ଞ ତଥା ଗୃହ ସଚିବ ନାନସୀ ପେଲୋସୀ । ତାଙ୍କ କହିବା ଅନୁଯାୟୀ ନିର୍ବାଚନ ଫଳାଫଳକୁ ଗ୍ରହଣ କରିବା ପୂର୍ବରୁ ଟ୍ରମ୍ପ ଜାଣିବା ଦରକାର କି ତାଙ୍କୁ ହ୍ବାଇଟ ହାଉସରୁ ଯିବାକୁ ହେବ । ଏପରି ମତାମତ ଦେଇ ପେଲୋସି ଗଣମାଧ୍ୟମର ଦୃଷ୍ଟି ଆକର୍ଷଣ କରିଥିବା ବେଳେ ଏନେଇ ଅନେକ ତର୍କ ବିତର୍କ ମଧ୍ୟ ଆରମ୍ଭ ହୋଇଛି ।
ମଙ୍ଗଳବାର ଏପରି ମନ୍ତବ୍ୟ ଦେଇ ପେଲୋସୀ କହିଛନ୍ତି କି ହ୍ବାଇଟ ହାଉସ କୌଣସି ନିର୍ଦ୍ଦିଷ୍ଟ ବ୍ୟକ୍ତିଙ୍କର ସମ୍ପତ୍ତି ନୁହେଁ । ନା ଏଠାରେ ସେ ଚିର ସ୍ଥାୟୀ । ହ୍ବାଇଟ ହାଉସରେ ଜନନେତାଙ୍କ ରହଣୀ ପାଇଁ ଏକ ପ୍ରକ୍ରିୟା ରହିଛି । ସାମ୍ବିଧାନିକ ପ୍ରଣାଳୀ ଓ ନିର୍ବାଚନ ପରେ ହିଁ ଜଣଙ୍କ ହ୍ବାଇଟ ହାଉସରେ ଏକ ନିର୍ଦ୍ଧିଷ୍ଟ ଅବଧି ପାଇଁ ରହିବାକୁ ହୁଏ । ସେହି ଅବଧି ପୁଣି ଶେଷ ବି ହୁଏ । ସେପଟେ ପେଲୋସୀଙ୍କ ଏପରି ମତ ଦେବାର ଗୋଟିଏ ଦିନ ପୂର୍ବରୁ ଟ୍ରମ୍ପ ଏକ ସାକ୍ଷାତକାରରେ ପ୍ରକାଶ କରିଥିଲେ କି ଆସନ୍ତା ନଭେମ୍ବର 3ରେ ହେବାକୁ ନିର୍ବାଚନର ଫଳାଫଳ ଗ୍ରହଣ କରିବାକୁ ସେ ରାଜି ନାହାନ୍ତି ।
ଟ୍ରମ୍ପଙ୍କ ଏପରି ମନ୍ତବ୍ୟକୁ ନେଇ ପେଲୋସୀ ସମସ୍ତ ମତଦାତା ଓ ସମ୍ବିଧାନିକ ପ୍ରଣାଳୀକୁ ପରାମର୍ଶ ଦେଇ କହିଛନ୍ତି କି 2021 ବର୍ଷରେ ଟ୍ରମ୍ପ ହ୍ବାଉଟ ହାଉସରୁ ବିଦା ହେବା ଦରକାର । ତେଣୁ ଏନେଇ ଟ୍ରମ୍ପ ଜାଣନ୍ତୁ ଅବା ନଜାଣନ୍ତୁ, ସେ ହ୍ବାଇଟ ହାଉସ ଛାଡୁଛନ୍ତି ବୋଲି ଦୃଢୋକ୍ତି ପ୍ରକାଶ କରିଛନ୍ତି ପେଲୋସୀ । ସେ ଏହା ମଧ୍ୟ କହିଛନ୍ତି କି ଟ୍ରମ୍ପ ହ୍ବାଇଟ ହାଉସରୁ ଯିବାକୁ ଚାହୁଁ ନାହାନ୍ତି, ଏହାର ଅର୍ଥ ନୁହେଁ କି ସେ କେବେ ଏଠାରୁ ବାହାରିବେ ନାହିଁ କି ନୂଆ ରାଷ୍ଟ୍ରପତିଙ୍କୁ ସ୍ବାଗତ କରିବେ ନାହିଁ ।
ତେବେ ପେଲୋସୀଙ୍କ ଏପରି ମତ କିଛି ପୂର୍ବାନୁମାନ ରିପୋର୍ଟ ପ୍ରକାଶ ପାଇବା ପରେ ଦିଆଯାଇଥିବା ଆକଳନ କରାଯାଉଛି । ଏହି ରିପୋର୍ଟ ମୁତାବକ ପ୍ରତିଦ୍ବନ୍ଦୀ ଜୋ ବିଡେନଙ୍କଠାରୁ ଟ୍ରମ୍ପ 15 ପଏଣ୍ଟ ପଛରେ ରହିଥିବା ଜଣା ପଡିଛି । ଜୁନ ମାସରୁ ଏପରି 9ଟି ରିପୋର୍ଟ ପ୍ରକାଶ ପାଇଥିବା ବେଳେ ଏଥିରୁ 7ଟିରେ ବିଡେନ ଦୁଇ ଅଙ୍କ ପଏଣ୍ଟ ବ୍ୟବଧାନରେ ଟ୍ରମ୍ପଙ୍କୁ କଡା ଟକ୍କର ଦେଉଥିବା ଦେଖାଯାଇଛି । ହେଲେ ଏସବୁ ରିପୋର୍ଟକୁ ଫେକ ବା ମିଛ କହିଛନ୍ତି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ।
@IANS
