ସାନ ଫ୍ରାନ୍ସିସ୍କୋ: କୋରୋନା ପ୍ରଭାବରେ ଘରୁ ବାହାରି ନପାରି ଅନଲାଇନ ପ୍ଲାଟଫର୍ମରେ ନିଜ ପ୍ରତିଭା ଦେଖାଇବା ଆରମ୍ଭ କରିଛନ୍ତି ୟୁଜର୍ସ । ଏମିତିରେ ଅନେକ କ୍ଷୁଦ୍ର ଓ ମଧ୍ୟମ ବର୍ଗର ପ୍ରକାଶକମାନଙ୍କୁ ନିଜ ପ୍ରତିଭା ଦେଖାଇବା ପାଇଁ ମାଧ୍ୟମର ଆବଶ୍ୟକତା ଥିବା ବେଳେ ଏମାନଙ୍କ ପାଇଁ ଗୁଗୁଲ ଘୋଷଣା କରିଛି ନୂଆ ପ୍ରୋଗ୍ରାମ । ସୋମବାର ଘୋଷଣା ହୋଇଥିବା ଏହି ନୂଆ ଟ୍ରେନିଂ ପ୍ରୋଗ୍ରାମରେ କ୍ଷୁଦ୍ର ଓ ମଧ୍ୟମ ବର୍ଗର ପ୍ରକାଶକମାନଙ୍କୁ ଡିଜିଟାଲ ପ୍ଲାଟଫର୍ମରେ ପ୍ରକାଶନ ପାଇଁ ମାଗଣା ଟ୍ରେନିଂ ଦିଆଯିବ ।
ଏହି ପ୍ରୋଗ୍ରାମର ନାମ ‘ଡିଜିଟାଲ ଗ୍ରୋଥ ପ୍ରୋଗ୍ରାମ’ ଦିଆଯାଇଥିବା ବେଳେ ଏହା ଗୁଗୁଲ ନ୍ୟୁଜ ଇନିସିଏଟିଭ(ଜିଏନଆଇ) ଅଧିନରେ ପରିଚାଳିତ ହେବ । ଅନଲାଇନ ବ୍ୟବସାୟର ବିକାଶ ସହ ନୂଆ ପ୍ରକାଶକ ମଣ୍ଡଳୀଙ୍କ ପ୍ରତିଭାର ବିକାଶ ପାଇଁ ଏହା ଏକ ପ୍ରକୃଷ୍ଟ ମାଧ୍ୟମ । ପାରମ୍ପରିକ ପ୍ରକାଶନ ଶୈଳୀ ବାଦେ ନୂଆ ଲେଖକ ଓ ପ୍ରକାଶକମାନେ କିପରି ଅନଲାଇନ ପ୍ଲାଟଫର୍ମରେ ନିଜ ଜ୍ଞାନ ବଢାଇପାରିବେ ସେନେଇ ଏହି ଟ୍ରେନିଂ ପ୍ରୋଗ୍ରାମରେ ସମସ୍ତ ବ୍ୟବସ୍ଥା କରାଯାଇଛି । ପ୍ରଥମେ ଏହି ପ୍ରୋଗ୍ରାମ ୟୁରୋପ ମହାଦେଶରେ ଲଞ୍ଚ ହେବାକୁ ଥିବା ବେଳେ ସ୍ପେନ, ୟୁକେ, ଜର୍ମାନୀ, ଇଟାଲୀ, ପୋଲାଣ୍ଡ ଓ ଫ୍ରାନ୍ସ ଆଦି ଦେଶରେ ୟୁଜର୍ସ ଏହାର ଲାଭ ଉଠାଇପାରିବେ ।
ଆଗାମୀ ମାସରେ ଏହି ପ୍ରୋଗ୍ରାମକୁ ଅନ୍ୟ ଦେଶମାନଙ୍କରେ ମଧ୍ୟ ରୋଲ ଆଉଟ କରିବାର ଯୋଜନା ରହିଛି । ଏଥିପାଇଁ ଏହି ପ୍ରୋଗ୍ରାମରେ ସମସ୍ତ ଆଞ୍ଚଳିକ ଭାଷାକୁ ସାମିଲ କରିବାର ପ୍ରକ୍ରିୟା ଆରମ୍ଭ ହୋଇସାରିଛି । ସେପଟେ ଗତ ମାସରେ ଟେକ ଜାଏଣ୍ଟ ଆଉ ଏକ ଗୁରୁତ୍ବପୂର୍ଣ୍ଣ ଘୋଷଣା ମଧ୍ୟ କରିଥିଲା । ଯେଉଁଥିରେ ଉଚ୍ଚକୋଟୀର କଣ୍ଟେଣ୍ଟ ଅନଲାଇନ ପ୍ଲାଟଫର୍ମରେ ପ୍ରସ୍ତୁତ କରାଯାଇ ପବ୍ଲିସ କରିବା ପାଇଁ ଏକ ଲାଇସେନ୍ସିଂ ପ୍ରୋଗ୍ରାମର ବ୍ୟବସ୍ଥା କରାଯାଉଥିବା ପ୍ରକାଶ କରାଯାଇଥିଲା । ଏହାର କାର୍ଯ୍ୟ ବର୍ତ୍ତମାନ ଜାରି ରହିଥିବା ବେଳେ ଚଳିତ ବର୍ଷ ଶେଷ ସୁଦ୍ଧା ଏହା ଲଞ୍ଚ ହେବାର ସମ୍ଭାବନା ରହିଛି ।
@IANS
