ସାନ ଫ୍ରାନ୍ସିସ୍କୋ: ବିଶ୍ବରେ ମହାମାରୀରେ ପରିଣତ ହୋଇଛି କୋରୋନା ସଂକ୍ରମଣ । ଏହି ସଂକ୍ରମଣ ଯୋଗୁଁ ଲକ୍ଷ ଲକ୍ଷ ମୁଣ୍ଡ ଗଡିଥିବା ବେଳେ ଏହାର ପୂର୍ବାନୁମାନ ନେଇ ଜୋର ଧରିଛି ଚର୍ଚ୍ଚା । ଏମିତିରେ ଫେସବୁକ ଲଞ୍ଚ କରିବାକୁ ଯାଉଛି ଏକ ଏପରି ଆପ୍ ଯାହା କୋରୋନା ପରି ମହାମାରୀର ପୂର୍ବାନୁମାନ ଉପରେ ଆଲୋଚନା ପାଇଁ ଖୋଲିଛି ନୂଆ ପ୍ଲାଟଫର୍ମ । ଆଇଓଏସରେ ଲଞ୍ଚ ହେବାକୁ ଥିବା ଏହି ଆପ୍ ବିଶ୍ବସ୍ତରୀୟ ଇଭେଣ୍ଟକୁ ନେଇ କମ୍ୟୁନିଟି ଗଠନ କରିବ । ଏହି କମ୍ୟୁନିଟିର ସଦସ୍ୟମାନେ ଆଗକୁ ହେବାକୁ ଥିବା ଏପରି ଅନେକ ଇଭେଣ୍ଟ ସମ୍ପର୍କିତ ପ୍ରଶ୍ନର ଉତ୍ତର ଦେବା ସହ ଭବିଷ୍ୟତ ସ୍ଥିତି ନେଇ ପୂର୍ବାନୁମାନ କରିପାରିବେ ।
ବର୍ତ୍ତମାନ ଏହି ଆପ୍ କେବଳ ଆମନ୍ତ୍ରଣ ଆଧାରିତ ବେଟା ଭର୍ସନରେ ସୀମିତ ରହିଛି । ଏନେଇ କମ୍ପାନୀ ସୂଚନା ଦେଇ କହିଛି କି ବିଭିନ୍ନ ଇଭେଣ୍ଟର ପୂର୍ବାନୁମାନକୁ ନେଇ ଗଠିତ କମ୍ୟୁନିଟି ଉପରେ କମ୍ପାନୀ ବିଶ୍ବାସ କରେ । ଏହା ନା ଯେ କେବଳ ଲୋକଙ୍କ ବିଭିନ୍ନ ସୂଚନା ଦେବାରେ ସକ୍ଷମ ବରଂ ଏହା ଅନଲାଇନ ପ୍ଲାଟଫର୍ମରେ ବିଭିନ୍ନ ବିଷୟ ଉପରେ ବାର୍ତ୍ତାଳାପକୁ ସଶକ୍ତ କରିବାରେ ମଧ୍ୟ ସକ୍ଷମ ।
ଫେସବୁକର ଏନପିଇ ଟିମ୍ ନାମକ ଅନ୍ତରୀଣ ରିସର୍ଚ୍ଚ ଓ ଡେଭେଲପମେଣ୍ଟ ଗ୍ରୁପର ସୂଚନା ମୁତାବକ ପ୍ରାଥମିକସ୍ତରରେ ଏହି ଆଇଓଏସ ଆପ୍ ଆମେରିକା ଓ କାନାଡାରେ କାର୍ଯ୍ୟକାରୀ ହେବ । ତେବେ ଲୋକମାନଙ୍କ ମଧ୍ୟରେ ବିଭିନ୍ନ ଇଭେଣ୍ଟକୁ ନେଇ ହେଉଥିବା ବାର୍ତ୍ତାଳାପ ସାର୍ବଜନୀନ ରହିବା ସହ ଏହା ସେୟାର ଉପଯୋଗୀ ବୋଲି ଫେସବୁକ ସ୍ପଷ୍ଟ କରିଛି । ଏନେଇ କମ୍ପାନୀ ସ୍ବାସ୍ଥ୍ୟ, ଅନୁସନ୍ଧାନ ଓ ଶିକ୍ଷା କ୍ଷେତ୍ରରେ ଗଠିତ କମ୍ୟୁନିଟିକୁ କୋରୋନା ମହାମାରୀ ଓ ବିଶ୍ବ ଉପରେ ଏହାର ପ୍ରଭାବ ସମ୍ପର୍କରେ ନିଜ ୟୁଜର୍ସଙ୍କ ସହ ଆଲୋଚନା କରିବାର ସୁଯୋଗ ଦେବା ପାଇଁ ସ୍ଥିର କରିଛି ।
- ଫୋରକାଷ୍ଟ ଏକ ଏପରି ସ୍ଥାନ ଯେଉଁଠି ପ୍ରଶ୍ନ ପଚାରିବାର ସ୍ବାଧୀନତା ରହିଛି । ଏଥିସହ ଏଥିରେ ଥିବା ଇନ-ଆପ୍ ପଏଣ୍ଟ ଦ୍ବାରା ୟୁଜର୍ସ ମଧ୍ୟ କୌଣସି ବିଷୟରେ ପୂର୍ବାନୁମାନ କରିପାରିବେ ।
- କମ୍ୟୁନିଟି ସମସ୍ତ ପ୍ରଶ୍ନ ଗ୍ରହଣ କରିବା ସହ ଫେସବୁକର ନିୟମାବଳୀ ଆଧାରରେ ଏହାର ଉତ୍ତର ଦେଇଥାଏ ।
- ଫୋରକାଷ୍ଟ ବା ପୂର୍ବାନୁମାନ ପଛରେ ଥିବା ପ୍ରକୃତ ଯୁକ୍ତି ସମ୍ପର୍କରେ ମଧ୍ୟ ୟୁଜର୍ସ ଆଲୋଚନା କରିପାରିବେ । ଏହାଛଡା ଆଲୋଚନାରେ ସାମିଲ ଜଣେ ୟୁଜରଙ୍କ ପ୍ରୋଫାଇଲକୁ ଯାଇ ତାଙ୍କ ପୂର୍ବାନୁମାନ ଓ ଯୁକ୍ତି ମଧ୍ୟ ଦେଖାଯାଇପାରେ । ଯଦି କାହାର ପୂର୍ବାନୁମାନ ଓ ଯୁକ୍ତି ଅନ୍ୟ ୟୁଜର୍ସଙ୍କୁ ସୁହାଏ ତେବେ ସେମାନ ତାଙ୍କୁ ଫଲୋ କରି ନୋଟିଫିକେଶନ ପାଇପାରିବେ ।
- ଫୋରକାଷ୍ଟରମାନେ ନିଜ ପ୍ରତ୍ୟେକ ପୂର୍ବାନୁମାନର ଟ୍ରାକ ରେକର୍ଡ ମଧ୍ୟ ରଖିପାରିବେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
