ୱାଶିଂଟନ: ଆମେରିକାର କାଲିଫର୍ଣ୍ଣିଆ ସହରରେ ଗୁଳିକାଣ୍ଡ । କାଲିଫର୍ଣ୍ଣିଆ ସ୍ଥିତ ସାନ ଜୋସେର ଏକ ଭ୍ୟାଲି ଟ୍ରାନ୍ସପୋର୍ଟ ଅଥରିଟି(VAT) ୟାର୍ଡରେ ବୁଧବାର ସକାଳେ ଜଣେ ବ୍ୟକ୍ତି ଆଖିବୁଜା ଗୁଳିମାଡ କରିଛି । ଏଥିରେ 8 ଜଣଙ୍କ ମୃତ୍ୟୁ ଘଟିଥିବା ସୁନିଶ୍ଚିତ କରାଯାଇଥିବାବେଳେ ଆଉ ଜଣେ ବ୍ୟକ୍ତିଙ୍କର ମଧ୍ୟ ମୃତ୍ୟୁ ହୋଇଥିବା ସନ୍ଦେହ କରାଯାଉଛି । ଗୁଳିମାଡରେ ଜଣେ ଆହତ ହୋଇଛନ୍ତି । ସ୍ଥାନୀୟ କର୍ତ୍ତୃପକ୍ଷ ଏନେଇ ସୂଚନା ଦେଇଛନ୍ତି ।
ସାଣ୍ଟା କ୍ଲାରା କାଉଣ୍ଟି ସରିଫ ଅଫିସର ତଥ୍ୟ ମୁତାବକ, ଏହି ଗୁଳିମାଡରେ 8 ଜଣଙ୍କର ଘଟଣାସ୍ଥଳରେ ହିଁ ମୃତ୍ୟୁ ଘଟିଛି ଏବଂ ଜଣେ ଗୁରୁତରଙ୍କ ମେଡିକାଲ ନିଆଯାଇଥିବାବେଳେ ତାଙ୍କ ଅବସ୍ଥାରେ ସମ୍ପର୍କରେ କିଛି ସୂଚନା ମିଳିନାହିଁ । ଘଟଣାରେ ବନ୍ଧୁକଧାରୀ(ଗନମ୍ୟାନ) ମଧ୍ୟ ପ୍ରାଣ ହରାଇଛି । ମୃତ ବନ୍ଧୁକଧାରୀ ଜଣକ 57 ବର୍ଷୀୟ VTA ପରିଚାଳନାର କର୍ମୀ ସାମୁଏଲ କାସିଡି ବୋଲି ଜଣାପଡିଛି । ସେ ମୁଖ୍ୟତଃ VTA କର୍ମଚାରୀଙ୍କ ଉଦ୍ଦେଶ୍ୟରେ ହିଁ ଗୁଳିମାଡ କରିଥିବା ଜଣାପଡିଛି । ଯେଉଁଥିରେ ପ୍ରାଣ ହରାଇଥିବା ମୃତକଙ୍କ ମଧ୍ୟରୁ ଅନେକ VTA କର୍ମୀ ଅଟନ୍ତି । ତେବେ କଣ ପାଇଁ ସେହି ବ୍ୟକ୍ତିଟି ଏହି ବର୍ବର କାଣ୍ଡ ଭିଆଇଲା ସେନେଇ କିଛି ସ୍ପଷ୍ଟ ହୋଇନାହିଁ ।
ସୂଚନାଯୋଗ୍ୟ, ବୁଧବାର ସକାଳ ପ୍ରାୟ ସାଢେ 6ଟା ସମୟରେ ସାନ୍ ଜୋସେ ପୋଲିସ VTA ୟାର୍ଡରେ ବନ୍ଧୁକଧାରୀର ଗୁଳିକାଣ୍ଡ ସମ୍ପର୍କରେ ଏକାଧିକ କଲ୍ ପାଇଥିଲା । ଏହାପରେ ପୋଲିସ ଘଟଣାସ୍ଥଳରେ ପହଞ୍ଚି ଗୁଳିମାଡର ପାଲଟା ଜବାବ ଦେଇଥିଲା । ଯଦ୍ବାରା ପୋଲିସର ଗୁଳିମାଡରେ ବନ୍ଧୁକଧାରୀଟି ଘଟଣାସ୍ଥଳରେ ଆଖି ବୁଜିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
